CƏMİYYƏT


Azərbaycan və UNICEF səmərəli əməkdaşlıq edir

Bakı, 19 dekabr, AZƏRTAC

Cəmiyyətimizin həssas təbəqəsi olan uşaqların hüquqlarının etibarlı təmin edilməsi istiqamətində Azərbaycan Prezidenti İlham Əliyevin rəhbərliyi ilə məqsədyönlü işlər aparılır, bu sahədə beynəlxalq təşkilatlarla, xüsusilə BMT-nin Uşaq Fondu - UNICEF ilə səmərəli əməkdaşlıq edilir.

Ədliyyə naziri, Məhkəmə-Hüquq Şurasının sədri Fikrət Məmmədov UNICEF-in ölkəmizdəki nümayəndəliyinin yeni rəhbəri Edvard Karvardin ilə görüşüb.

Ədliyyə Nazirliyinin mətbuat xidmətindən AZƏRTAC-a bildiriblər ki, görüşdə Azərbaycan ilə UNICEF arasında əməkdaşlığın səviyyəsindən məmnunluğunu ifadə edən nazir dövlətimizin başçısının rəhbərliyi ilə insan haqlarının, o cümlədən uşaq hüquqlarının qorunması üzrə görülən işlərdən, məhkəmə-hüquq və penitensiar sistemlərdə aparılan islahatlardan danışıb. Həmçinin yuvenal ədliyyənin inkişafına xüsusi diqqət yetirilərək, yeniyetmələrin cinayət işləri üzrə ədalət mühakiməsi həyata keçirilərkən onların hüquqlarının müdafiəsinin gücləndirilməsi, yeni yanaşmaların və müasir İKT-lərin tətbiqi, məhkumların, o cümlədən yetkinlik yaşına çatmayanların saxlanma şəraitinin yaxşılaşdırılması, habelə hakimlərin yuvenal ədliyyə sahəsində treninqi və digər tədbirlər barədə məlumat verib. F.Məmmədov bu sahədə UNICEF-in dəstəyini qeyd edərək E.Karvardinə fəaliyyətində uğurlar arzulayıb.

UNICEF-in ölkəmizlə çox uğurlu əməkdaşlıq etdiyini söyləyən qonaq Azərbaycanda uşaq hüquqlarının qorunması istiqamətində dövlətin siyasi iradəsi ilə atılan mühüm addımları, yuvenal ədliyyənin beynəlxalq standartlara uyğunlaşdırılması üzrə görülən işləri, məhkəmə və penitensiar sistemin müasirləşdirilməsi, yetkinlik yaşına çatmayan məhkumların hüquqlarının genişləndirilməsi üzrə tədbirləri təqdir edib.

Yuvenal ədliyyənin inkişafı sahəsində Ədliyyə Nazirliyinin təşəbbüslərini və əməkdaşlığı yüksək qiymətləndirən E.Karvardin qarşılıqlı fəaliyyətin bundan sonra da dərinləşdirilməsi üçün səylərini əsirgəməyəcəyini vurğulayıb.

Görüşdə əməkdaşlığın prioritetləri, o cümlədən yuvenal ədliyyə sahəsində birgə tədris tədbirlərinin təşkili, yaxşı təcrübələrin öyrənilməsi, azyaşlılara azadlıqdan məhrumetmə ilə bağlı olmayan alternativ cəzaların tətbiqi və s. barədə faydalı fikir mübadiləsi aparılıb.

Sonra qonaq nazirlikdə Ədliyyə tarixi muzeyi ilə tanış olub.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.