Azərbaycanda ahıl vətəndaşlar dövlətin xüsusi diqqət və qayğısı ilə əhatə olunublar
Bakı, 1 oktyabr, AZƏRTAC
Bakının bir sıra rayonlarında 1 oktyabr - Beynəlxalq Ahıllar Günü qeyd edilib.
Nəsimi Rayon İcra Hakimiyyətində rayonun ahıl, kimsəsiz, əlil və qayğıya ən çox ehtiyacı olan vətəndaşlarının bir qrupu ilə görüş keçirilib.
Görüşdə çıxış edən rayon icra hakimiyyətinin başçısı Asif Əsgərov ölkəmizdə hər bir ahıl vətəndaşın dövlət tərəfindən diqqət və qayğı ilə əhatə olunduğunu bildirib. Qeyd edilib ki, bu gün Nəsimi rayonunda əhalinin 16 min nəfərini yaşı 65-dən yuxarı olan ahıllar təşkil edir. Nəsimi rayon Əhalinin Sosial Müdafiə Mərkəzində 269 nəfər tənha, əlil qeydiyyatdadır.
* * *
Beynəlxalq Ahıllar Günü Səbail rayonunda da qeyd olunub. Bayıl yaşayış sahəsində rayonun ahıl, kimsəsiz, əlil və qayğıya ən çox ehtiyacı olan vətəndaşlarının bir qrupu üçün rayon icra hakimiyyəti tərəfindən bayram süfrəsi açılıb.
İcra hakimiyyəti başçısının birinci müavini Xalidə Bayramova qeyd edib ki, bu gün Səbail rayonunda yaşayanların 6,5 faizini (6075 nəfər) yaşı 65-dən çox olan ahıllar təşkil edir. 2978 nəfər müxtəlif növ və kateqoriyalar üzrə sosial müavinət, 187 ailə (709 nəfər ailə üzvü) ünvanlı sosial yardım alır. Ümumilikdə isə rayonda 13165 nəfər təqaüdçü yaşayır. Səbail rayon Əhalinin Sosial Müdafiə Mərkəzisində 372 nəfər tənha, əlil qeydiyyatdadır.
* * *
Beynəlxalq Ahıllar günü münasibətilə Qaradağ Rayon İcra Hakimiyyəti də əhalinin bu təbəqəsinin nümayəndələri ilə görüş keçirib.
Rayon icra hakimiyyəti başçısının müavini Təranə İsmayılova görüşdə çıxış edərək deyib ki, Qaradağda 70 yaşdan yuxarı 2815 nəfər insan yaşayır. İcra hakimiyyəti onların qayğıları ilə mütəmadi məşğul olur. Ahıllar, ağsaqqallar rayonun ictimai-siyasi həyatında fəal iştirak edirlər. Onlar gənc nəslin tərbiyəsində, hərbi-vətənpərvərlik ruhunda yetişməsində böyük rol oynayırlar.
Rayon Ağsaqqallar Şurasının sədri Təhməz Abbasov, 88 yaşlı Mariya Ryabitsina göstərilən diqqət və qayğıya görə ölkə rəhbərliyinə ahıllar adından təşəkkürünü bildiriblər.
* * *
Beynəlxalq Ahıllar günü münasibətilə daha bir tədbir Suraxanı Rayon İcra Hakimiyyəti və rayon Əhalinin Sosial-Müdafiə Mərkəzinin birgə təşkilatçılığı ilə keçirilib.
Rayon icra hakimiyyətinin başçısı İlqar Abbasov tədbirdə çıxış edərək deyib ki, respublikamızda qəbul edilmiş “Ahıl vətəndaşların sosial müdafiəsinin gücləndirilməsi üzrə Dövlət Proqramı”na uyğun olaraq Suraxanıda da müvafiq işlər görülür. Hazırda rayonda 70 yaşdan yuxarı 5761 nəfər yaşayır. Onların hamısı dövlət tərəfindən təqaüdlə təmin olunub. Rayonda yaşayan tənha və başqasının köməyinə ehtiyacı olan ahıl insanlara evdə qulluq göstərilir. Suraxanıda 216 kimsəsiz ahıl yaşayır. Ahıl insanlar rayon Əhalinin Sosial Müdafiə Mərkəzi tərəfindən qeydiyyata alınıb.
Digər çıxış edənlər bu zümrədən olan insanların sosial müdafiəsinin gücləndirilməsi və hüquqlarının təmin edilməsi sahəsində həyata keçirilən tədbirlər barədə danışıb, diqqət və qayğıya görə Azərbaycan Prezidenti İlham Əliyevə minnətdarlıqlarını bildiriblər.
* * *
Beynəlxalq Ahıllar Günü ilə əlaqədar Pirallahı Rayon İcra Hakimiyyətinin təşkil etdiyi tədbirdə icra hakimiyyəti başçısının müavini Vəzir Səfixanov Azərbaycan dövləti tərəfindən ahıllara göstərilən diqqət və qayğıdan bəhs edib.
Tədbirdə iştirak edən ahıllar onlara göstərilən diqqətə görə ölkə rəhbərliyinə minnətdarlıqlarını bildiriblər.
* * *
Görüşlərdə iştirak edən ahıllara rayon icra hakimiyyətləri tərəfindən hədiyyələr, maddi yardımlar, ərzaq sovqatları təqdim edilib.
Bölmənin digər xəbərləri
