CƏMİYYƏT
“Azərbaycanda dövlət-din münasibətləri – 25 il” mövzusunda konfrans keçirilib
Bakı, 14 oktyabr, AZƏRTAC
Dini Qurumlarla İş üzrə Dövlət Komitəsinin (DQİDK) təşkilatçılığı ilə “Azərbaycanda dövlət-din münasibətləri - 25 il” mövzusunda konfrans keçirilib.
AZƏRTAC xəbər verir ki, konfransda Dini Qurumlarla İş üzrə Dövlət Komitəsinin və dini konfessiyaların rəhbərliyi, media nümayəndələri, dinşünas ekspertlər, bu sahədə fəaliyyət göstərən mütəxəssislər, eləcə də ictimaiyyət nümayəndələri iştirak ediblər.
Dövlət Komitəsinin sədr müavini Gündüz İsmayılov tədbirdə çıxış edərək bildirib ki, bu günlərdə Prezident İlham Əliyev Azərbaycanın dövlət müstəqilliyinin bərpasının iyirmi beşinci ildönümü haqqında Sərəncam imzalayıb. Həmin Sərəncamdan irəli gələn məsələlərlə bağlı bir sıra tədbirlər keçirilir. Ona görə də dövlət müstəqilliyinin bərpasının 25-ci ildönümü ilə bağlı belə bir konfransın keçirilməsi təsadüfi deyil. Konfransın keçirilməsində əsas məqsəd müstəqilliyimizin bərpasından ötən 25 il ərzində respublikamızda dövlət-din münasibətlərinin inkişaf dinamikası, dövlətin dinə qayğısı, xalqımızın multikulturalizm və tolerantlıq ənənələrinin daha da gücləndirilməsi sahəsində görülən işlər və bu sahədə qarşıda duran məsələlərin müzakirəsidir.
G.İsmayılov qeyd edib ki, Azərbaycanda həyata keçirilən din siyasətinin əsas mahiyyəti dini etiqad, vicdan azadlığının təmin edilməsidir. Bununla yanaşı, konfessiyalararası münasibətləri, dinlərarası dialoqu, tolerantlıq mühitini qoruyub saxlamaq əsas prioritet istiqamətlərdən biridir. 25 il ərzində dövlətimizin ən çətin günlərində belə tarixi-dini abidələrimizin bərpası yönündə önəmli bir kurs müəyyənləşdirilib ki, bu siyasətin memarı ulu öndər Heydər Əliyevdir. Hazırda bu siyasət Prezident İlham Əliyev tərəfindən uğurla davam etdirilir. Bu gün respublikada 2166 məscid var. Bunların 1500-ü gündəlik fəaliyyət göstərir. Məscidlərdən 692-sinin dini icması dövlət qeydiyyatından keçib. Azərbaycanda bütün ənənəvi dinlərin ibadət yerləri, məscidlər, kilsələr, sinaqoqlar və s. var və insanlar sərbəst şəkildə ibadətlərini, dini ayinlərini yerinə yetirirlər. Gündüz İsmayılov deyib ki, müstəqillik dövründə milli-mənəvi dəyərlərin qorunub saxlanması, təbliği, tarixi-dini abidələrin bərpasında birinci xanım Mehriban Əliyevanın rəhbərlik etdiyi Heydər Əliyev Fondunun xüsusi xidmətləri var.
Qafqaz Müsəlmanları İdarəsinin sədr müavini Rəşad Əliyarlı, Rus Pravoslav Kilsəsinin nümayəndəsi Aleksandr Ata, Avropa Yəhudilərinin Bakı dini icmasının sədr əvəzi Aleksandr Şarovski, Azərbaycan Respublikasının Alban-Udi Xristian dini icmasının sədri Robert Mobili, “Həyat sözü-2” dini icmasının sədri Elçin Paşayev çıxış edərək dövlət müstəqilliyinin 25 illiyi münasibətilə keçirilən konfransı yüksək qiymətləndiriblər. Bildirilib ki, bütün çətinliklərə və xarici müdaxilələrə baxmayaraq, Azərbaycanda dini konfessiyalar arasındakı vəhdət, dinlərarası dialoq həmişə qorunub və bu, digər ölkələr üçün nümunə hesab olunmalıdır. Multikultural və tolerant dəyərlər Azərbaycan xalqının həyat tərzidir. Azərbaycanın dünya dövlətlərinə təqdim etdiyi multikultural model xalqların dostluq və mehriban şəraitdə birgə yaşamasını təmin edən mükəmməl modeldir.
Konfrans işini müzakirələrlə davam etdirib.