İQTİSADİYYAT
Azərbaycanda nəqliyyatın və rabitənin sürətli inkişafı ulu öndər Heydər Əliyevin adı ilə bağlıdır
Bakı, 6 may, AZƏRTAC
Mayın 6-da Nəqliyyat, Rabitə və Yüksək Texnologiyalar Nazirliyinin əməkdaşları Azərbaycan xalqının ümummilli lideri Heydər Əliyevin anadan olmasının 94-cü ildönümü münasibətilə Fəxri xiyabanda Ulu Öndərin məzarını ziyarət ediblər.
AZƏRTAC xəbər verir ki, nazirliyin kollektivi müasir müstəqil Azərbaycan dövlətinin memarı və qurucusu, ümummilli lider Heydər Əliyevin xatirəsini ehtiramla yad edib, məzarı önünə əklil qoyub.
Görkəmli oftalmoloq alim, akademik Zərifə xanım Əliyevanın da xatirəsi yad olunub, məzarı üstünə gül dəstələri düzülüb.
Daha sonra Nəqliyyat, Rabitə və Yüksək Texnologiyalar Nazirliyində Ulu Öndərin xatirəsini anma mərasimi keçirilib.
Tədbirdə ümummilli lider Heydər Əliyevin keçdiyi ömür yolunu əks etdirən film nümayiş olunub.
Sonra nəqliyyat, rabitə və yüksək texnologiyalar naziri Ramin Quluzadə çıxış edərək Ümummilli Liderin şərəfli və mənalı ömür yolundan, zəngin dövlətçilik təcrübəsindən və misilsiz xidmətlərindən söz açıb. Nazir Ulu Öndərin Azərbaycanın gələcək hərtərəfli inkişafının təməlini qoyduğunu qeyd edib.
Heydər Əliyevin görkəmli dövlət xadimi və müdrik siyasətçi olduğunu deyən R.Quluzadə onun gərgin səyləri nəticəsində ölkəmizdə sabitliyin, sülh və əmin-amanlığın bərqərar edildiyini, uğurlu siyasi, iqtisadi islahatların, demokratikləşmə proseslərinin həyata keçirildiyini vurğulayıb.
Nazir ulu öndər Heydər Əliyevin respublika iqtisadiyyatının bütün sahələrinə, o cümlədən nəqliyyatın inkişafına, yeni nəqliyyat infrastrukturunun yaradılmasına böyük önəm verdiyini bildirib.
“Onun rəhbərliyi nəticəsində dəmir yolunda, hava və su nəqliyyatında əsaslı işlər aparıldı, yük və sərnişin daşımalarında intensivlik artdı, daşımaların həcmi yüksəldi. Şəhər nəqliyyatı, metropoliten sürətlə inkişaf etdi, yeni stansiyalar tikildi, sərnişin nəqliyyatı parkı yeniləndi”, - deyə nazir qeyd edib.
Heydər Əliyevin Azərbaycana rəhbərliyinin bütün dövrlərində nəqliyyatla yanaşı, rabitənin də inkişafına xüsusi diqqət göstərdiyini vurğulayan nazir Ulu Öndərin uzaqgörən siyasəti nəticəsində rabitə və informasiya-kommunikasiya texnologiyaları sahəsinin müasir tələblər səviyyəsinə çatdırılması üçün geniş islahatlar aparıldığını bildirib.
Nazir deyib: “Ulu Öndərin siyasi kursunun layiqli davamçısı Azərbaycan Respublikasının Prezidenti İlham Əliyevin bu sahəni prioritet elan etməsi və sahənin inkişafını daim diqqət mərkəzində saxlaması sayəsində biz də informasiya-kommunikasiya texnologiyaları sektorunun inkişafı üçün səylərimizi əsirgəmirik”.
Digər natiqlər müasir Azərbaycan dövlətinin qurucusu Heydər Əliyevin həyat yolundan, Vətən və xalq qarşısında tarixi xidmətlərindən, o cümlədən ölkəmizdə sosial-iqtisadi həyatın bütün sahələrində qazanılan nailiyyətlərdən bəhs ediblər. Qeyd olunub ki, Ümummilli Liderin uzaqgörən siyasəti nəticəsində əldə olunmuş nailiyyətlər sonrakı illərdə ölkə iqtisadiyyatının davamlı inkişafı üçün möhkəm zəmin yaradıb.