Bakı, 3 iyun, AZƏRTAC

Bakı Slavyan Universitetində (BSU) dahi ingilis şairi və dramaturqu Uilyam Şekspirin vəfatının 400 illiyinə həsr olunan anma tədbiri keçirilib.

BSU-dan AZƏRTAC-a bildiriblər ki, tədbirdə universitetin rektoru, professor Asif Hacıyev Uilyam Şekspirin dünya ədəbiyyatında tutduğu mövqedən danışıb. Şekspirin əsərlərinin 400 ildir ki, dünya teatr səhnələrindən düşmədiyini bildirən professor dahi dramaturqun məşhur əsərlərinin tələbələr tərəfindən səhnələşdirilməsini yüksək dəyərləndirib, BSU-nun yaradıcı gənclərə daim dəstək olduğunu vurğulayıb. Universitetin təhsil və mədəniyyət sahəsində əldə etdiyi uğurlardan danışan rektor yaradıcı tələbələrin peşəkar teatr işçiləri ilə birgə gördüyü işlərdən söz açıb, gənclərə uğurlar arzulayıb.

Bədii gecənin təşkilatçılarından olan BSU-nun əməkdaşı Elxan Mirzəyev və “Yuğ” teatrının baş rejissoru İmran Kərimli təəssüratlarını bölüşüblər. “Yuğ” teatrı ilə BSU-nun uzun müddət davam edən əməkdaşlığından danışan İ.Kərimli tələbələrin teatra olan marağını yüksək dəyərləndirib. Bildirilib ki, bu ali təhsil ocağında milli mədəni dəyərlərin qorunub saxlanması elmə verilən vacib töhfədir. Teatr səhnəsində daim yaradıcı gənclərə ehtiyac olduğunu deyən rejissor bu istiqamətdə BSU gənclərinə hər zaman dəstək göstərəcəyini vurğulayıb.

Sonra BSU-nun tələbələri Şekspirin “Kral Lir”, “Romeo və Cülyetta”, “Hamlet”, “Otello” əsərlərindən Gümrah Ömərovun quruluş verdiyi səhnələri ingilis dilində təqdim ediblər.