İQTİSADİYYAT


“Bakı Ağ Şəhər” layihəsi 5 illiyini qeyd edir

Bakı, 24 dekabr, AZƏRTAC 

Ümummilli lider Heydər Əliyev müstəqilliyin bəxş etdiyi ilk fürsətdə Qara Şəhərin ölkəmizin cənnət guşələrindən birinə çevrilməsini prioritet məsələlərdən biri kimi müəyyənləşdirmişdi. 2011-ci il dekabrın 24-də “Bakı Ağ Şəhər”in təməli qoyulub. Bu gün “Bakı Ağ Şəhər” 5 illiyini yeni məhəllələrin ilk sakinlərə təhvilə tam hazırlığı ilə qeyd edir. Layihənin reallaşması zamanı Prezident İlham Əliyevin müvafiq tapşırıq və tövsiyələri, həmçinin “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər planı” əsas götürülüb. 221 hektar ərazidə yenidənqurma işləri gündən-günə vüsət alıb.

“Bakı Ağ Şəhər” layihəsinin mətbuat xidmətindən AZƏRTAC-a bildirilib ki, müxtəlif memarlıq üslubları, ekoloji məsələləri və “Ağ Şəhər”in paytaxtın digər hissələri ilə qovuşmasını özündə birləşdirən layihənin reallaşması sırf peşəkarlara etibar olunub. Yerli şirkətlərlə yanaşı “Atkins”, “UN Studio”, “Foster and Partners”, “F+A Architects” və digər dünya şöhrətli memarlıq qurumları bu layihəyə cəlb edilib. “Bakı Ağ Şəhər” layihəsi nəinki respublikamızda, eləcə də beynəlxalq səviyyədə tanınmış layihədir. Ötən illər ərzində layihə “CityScape Global”, “MİPİM Asia”, həmçinin digər sərgilərdə “Ən Yaxşı Şəhərsalma Layihəsi” və digər nominasiyalarda birincilik qazanıb.

Fransanın sabiq Prezidenti Nikola Sarkozinin Azərbaycana rəsmi səfəri çərçivəsində imzalanan müvafiq saziş əsasında Bakıda Fransız Liseyinin tikintisi məhz “Bakı Ağ Şəhər”də başlayıb. 2014-cü ildə liseyin tikintisi ilə Prezident İlham Əliyev, xanımı Mehriban Əliyeva və ölkədə rəsmi səfərdə olan Fransa Respublikasının Prezidenti Fransua Olland tanış olublar. Müasir memarlıq üslubu və xüsusi təhsil şəraitinə malik liseydə 320 şagird təhsil ala bilər.

Böyük uğurla nəticələnmiş “Bakı Ağ Şəhər”in ilk əsas hissəsi və giriş qapısı sayılan yüksək səviyyəli “Bakı Ağ Şəhər” ofis binası hələ layihələndirildiyi dövrdə beynəlxalq memarlıq aləmində tanınmış “Asia-Pacific Property Awards - 2011”, “Azeri Business Awards - 2011”, “İlin Şirkəti - 2014” mükafatları ilə təltif edilib. Ofis binasının açılışı Prezident İlham Əliyevin və xanımı Mehriban Əliyevanın iştirakı ilə 2014-cü il dekabrın 24-də baş tutub. “BREEAM” beynəlxalq ekoloji sertifikata layiq görülmüş bu biznes mərkəzi Azərbaycanda ekoloji sertifikasiyadan keçmiş ilk binadır.

2015-ci ildə istismara verilən 110 min kilovoltluq “Ağ Şəhər-1” elektrik yarımstansiyası yaxınlıqda yerləşən “Liman” yarımstansiyası ilə birlikdə ətraf ərazilərin, eləcə də “Bakı Ağ Şəhər”in keyfiyyətli və dayanıqlı elektrik enerjisi ilə təchizatını təmin edir. Elektrik şəbəkəsi daxilində Yaşıl Ada kvartalında 3 ədəd yarımstansiya tikilib.

Nobel prospekti ilə paralel inşa olunmuş dənizkənarı yol da dövlət başçısının tapşırığına əsasən, “Bakı Ağ Şəhər”in ən müasir standartlara uyğun abadlaşdırılması və yeni görkəm alması istiqamətində görülən mühüm işlərin tərkib hissəsidir. Füsunkarlığı ilə diqqət çəkən “Ağ Şəhər” bulvarı buradan dənizə açılan mənzərəni daha da cazibədar edir. Uzunluğu 5 kilometr olan bu məkan dünyanın diqqət mərkəzində olan İlk Avropa Oyunları zamanı turistlərin ən çox üz tutduqları istirahət yerlərindən biri olub. “Bakı Ağ Şəhər”in ilk 5 ulduzlu “Boulevard Hotel”i “Absheron Hotel Group”a daxildir.

Layihənin icrası müddətində 700 min kubmetr həcmində neft tullantıları ilə çirklənmiş böyük ərazi təmizlənərək şəhər təsərrüfatında istifadə üçün yararlı vəziyyətə gətirilib. “Bakı Ağ Şəhəri”in 10 rayonundan 6-sı ekoloji baxımdan tamamilə təmizlənərək inşa edilir.

“Ağ Şəhər”in mərkəzində yeni Fəvvarələr Meydanı yerləşir. Yeddimərtəbəli müasir üslublu yaşayış binaları, park, piyada keçidi və ictimai parkinqdən ibarət bu kvartalda tikinti işləri gedir. Nobel prospekti boyunca Fəvvarələr Meydanının əsas hissəsi sayılan Şərq-Qərb ofis binaları yerləşəcək. Bu ofis binalarının mərkəzində yeni “Central Plaza” meydanı Hollandiyanın “UN Studio” memarlıq bürosu tərəfindən layihələndirilib. Bu ofis kompleksi, həmçinin tikilməkdə olan “Ağ Şəhər” metro stansiyasının çıxışlarından birini də özündə cəmləşdirir.

Ümumi sahəsi 24 hektar olan Park rayonunda da tikinti davam edir. Burada 20 mərtəbəli hündür yaşayış binaları tikilir. Sahənin relyefinə uyğun olaraq amfiteatr üslubunda olan Park rayonundan Dənizkənarı bulvara və Bayraq Meydanına gözəl mənzərə açılır. Binaların üstünlükləri sırasına şəhərin ən iri parklarından olan Nizami parkı ilə qonşuluq da daxildir.

“Ağ Şəhər”in lüks səviyyəli “Knightsbridge” (Naytsbric) yaşayış kompleksi də Park rayonunda inşa edilir. London şəhərinin eyniadlı eksklüziv yaşayış kvartalını təkrarlayan “Knighstbridge” kompleksi vaxtını və komfortunu dəyərləndirənlər üçün layihələndirilib. Beş yaşayış binası, biznes mərkəzi və məktəbdən ibarət kompleksdə yaşıl zonalar da nəzərdə tutulub. Mənzillərin pəncərələrindən Nizami parkına və Fəvvarələr Meydanına mənzərə açılacaq. 6-7 mərtəbədən ibarət yaşayış binalarında geniş abad həyət və yeraltı parkinq də nəzərdə tutulub.

Bakı Metropoliteninin yeni stansiyalarının 3-ü məhz “Ağ Şəhər” ərazisində salınır. Bu stansiya metronun “Yaşıl xətti”ni genişləndirəcək. Hazırda Neft Emalı Zavodunun qarşısında “Y-15” stansiyasında tunelqazma maşınları üçün start kamerası hazırlanır. “Yaşıl xətt”ə əlavə olunan stansiyalar bu xətti dairəvi edəcək.

“Fransız məhəlləsi” adı ilə tanınmış Yaşıl Ada rayonunda abadlıq-quruculuq və yaşıllaşdırma işləri tamamlanıb. Burada layihələndirilmiş Paris evlərinin tikintisi, habelə yol və kommunikasiya infrastrukturlarının inşası başa çatıb və dövlət qurumları tərəfindən qəbul olunub. Qeyd olunan rayonun “Sahil 14” və “SETA MTK” yaşayış kompleksləri arasında “Ağ Şəhər”in ilk parkı salınıb. Uzunluğu 85 metr, eni 23 metr olan park rayonun unikal memarlıq üslubunu tamamlayır. Avtonəqliyyət vasitələrindən azad ərazidə sakinlərin komfortu və istirahəti üçün işıqlandırma, yaşıllaşdırma, velosiped dayanacaqları, küçə mebeli ilə təmin olunub. “Bakı Ağ Şəhər” layihəsinin müraciəti ilə Təhsil Nazirliyi tərəfindən 5 nömrəli Bakı Peşə Liseyində açılmış Bağban-Dekorator ixtisası üzrə təhsil alan tələbələr də artıq bu ərazidə təcrübə keçirlər.

Yaşıl Ada rayonu çərçivəsində əsaslı şəkildə yenidən qurulan Xəqani Rüstəmov küçəsi ilə Nobel prospektinin kəsişməsində “Azəravtoyol” ASC tərəfindən yeni yeraltı piyada keçidinin tikinti işləri başa çatıb. Yeraltı piyada keçidinin 4 çıxışı var. Keçidin uzunluğu 280 metr, qalereyasının eni 8 metr, hündürlüyü isə 3,2 metrdir. Keçidlərdə 8 ədəd eskalator mövcuddur. Beləliklə, “Ağ Şəhər”in simvoluna çevrilmiş “Bakı Ağ Şəhər” ofis binasının qarşısından birbaşa olaraq şəhərlilərin sevimli gəzinti məkanı olan Ağ Şəhər Bulvarına və əksinə təhlükəsiz keçid təmin edilib. “Ağ Şəhər” layihəsi üzrə Xəqani Rüstəmov və Süleyman Vəzirov küçələri də daxil olmaqla ümumi uzunluğu 22,3 kilometr, eni isə 16 metrdən 47 metrə kimi dəyişən 63 çoxsaylı kəsişən yolların təmiri və asfaltlanması həyata keçirilib. Bakının iki əsas prospektini - Babək və Nobel prospektlərini birləşdirən Xəqani Rüstəmov küçəsi 3 gediş və 3 gəliş olmaqla 6 hərəkət zolağından ibarətdir.

Bu gün “Bakı Ağ Şəhər” layihəsi Azərbaycanda investisiyalar üçün yaradılan əlverişli biznes mühitinin, sahibkarlığın inkişafına dövlətin hərtərəfli dəstəyinin və insan amilinin əsas meyar olmasının əyani təcəssümüdür. İdeyanın möhtəşəmliyi və görülmüş işlərin peşəkarlığı Bakının müasir şəhərsalmanın ən son tendensiyalarına inteqrasiyasını təmin edir. Bu layihənin reallaşdırılması Qara Şəhərin sənaye simasını keçmişdə qoyaraq “Bakı Ağ Şəhər” layihəsini dünyanın qabaqcıl şəhərsalma layihələri səviyyəsinə çıxarıb.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.