CƏMİYYƏT
Biçənəklərdə baş verən yanğınların ətraf mühitə vurduğu ziyanın nəticələri açıqlanıb
Bakı, 7 avqust, AZƏRTAC
Respublika ərazisində taxıl biçinindən sonra yandırılmış biçənək sahələrində Ekologiya və Təbii Sərvətlər Nazirliyinin (ETSN) tabeli qurumları tərəfindən monitorinqlər aparılıb.
Nazirliyin mətbuat xidmətindən AZƏRTAC-a verilən məlumata görə, monitorinqlər zamanı Qazax rayonunun Xanlıqlar kəndi ərazisində 90, Şamaxı rayonunun Qurdtəpə kəndi ərazisində 9, Ağsu rayonunun Nüydü kəndi ərazisində 8, Cəlilabad rayonunda 2, Göyçay rayonunun Kürdşaban kəndi ərazisində 1 hektar sahədə üst bitki örtüyünün tamamilə yandığı müəyyən edilib.
Bundan başqa, Goranboy rayonunun Nərimanlı kəndi ərazisində 5 hektar sahədə biçilmiş taxıl sahəsi yandırıldıqdan sonra alovun Goranboy-Qızılhacılı avtomobil yolunun mühafizə zolağına keçməsi nəticəsində ikiillik 40 ədəd şam ağacı yanaraq məhv olub, 5 ədəd müxtəlif cinsli ağac isə zədələnib. Həmçinin Goranboy rayonunun Tapqaraqoyunlu kəndi ərazisində də 30 hektar biçilmiş taxıl sahəsində baş verən yanğın sonradan avtomobil yolunun kənarına keçib və nəticədə müxtəlif cinsli 5 ədəd ağac zədələnib. Qazax rayonunun Məşədilər kəndi ərazisində 700, İsmayıllı rayonunun Diyarlı kəndi ərazisində 76, Goranboy rayonunun Gürzalılır kəndi ərazisində 1150 ədəd kol yanıb.
Faktlarla bağlı təqsirkarların tapılaraq barələrində qanunamüvafiq tədbir görülməsi üçün rayon polis şöbələrinə məktub göndərilib.
ETSN tərəfindən bəzi biçənək sahələrində yanğın törədən və ətraf mühitə ziyan vuran təqsirkarların şəxsiyyəti müəyyənləşdirilib. Belə ki, Zərdab rayonunun Əlvənd kənd sakini Vəkalət Zülfüqarov tərəfindən ona məxsus pay torpağında biçənəyin yandırılması nəticəsində ərazidəki müxtəlif cinsli 70 ədəd ağacın və 679 ədəd kolun, həmin rayonun Körpükənd sakini Sonqulu Qurbanova məxsus pay torpağında biçilmiş sahənin yandırılması nəticəsində isə 39 ədəd kolun yanaraq məhv edildiyi aşkar edilib. Təbiətə 679 manat ziyan dəydiyi hesablanılaraq V.Zülfüqarov barəsində qanunvericiliyə uyğun qaydada tədbir görülməsi üçün Zərdab Rayon Prokurorluğuna müraciət edilib və bununla bağlı cinayət işinə başlanılıb. Eyni zamanda, Goranboy rayonunun Urusborisi kəndində biçənək sahəsində yanğın törədilməsi nəticəsində 10 ədəd ağacın zədələnməsində, 20 ədəd kolun məhvində təqsirli bilinən təsərrüfat rəhbəri Mariya İvannikovaya protokol tərtib edilib. İnzibati Xətalar Məcəlləsinin 92.2-ci maddəsinə əsasən onun vəzifəli şəxs qismində məsuliyyətə cəlb edilməsi üçün qanunvericiliyə müvafiq qaydada tədbirlər görülür.
Meşə yanğınlarının səbəbləri ilə bağlı mütəxəssislərin apardığı təhlillər və monitorinqlər göstərir ki, baş verən yanğın hadisələrinin əksəriyyəti taxıl biçinindən sonra biçənəklərə od vuran fermerlərin etinasızlığından irəli gəlir. Onlar nəzərə almırlar ki, belə məsuliyyətsiz hərəkətlər nəticəsində hektarlarla meşə örtüyü məhv ola bilər, ölkənin meşə fondu ani vaxt içərisində yanıb kül olmaq təhlükəsi ilə üzləşər.
Bir sıra hallarda biçənəklərə od vurulması nəticəsində yanğın meşə sahələrinə keçib, lakin insanların fədakarlığı sayəsində yüzlərlə ağacı qorumaq mümkün olub. Əgər alov daha keçilməz yüksək dağlıq sahələri əhatə etsə, meşələrimiz qarşısıalınmaz fəsadlarla üzləşər.
ETSN tərəfindən bölgələrdə yanğınlara yol verilməməsi istiqamətində bələdiyyələr, icra nümayəndələri, ayrı-ayrı torpaq istifadəçiləri (fermerlər) arasında maarifləndirmə işləri və monitorinqlər davam etdirilir.