Bakı, 31 iyul, AZƏRTAC

Xətai Rayon İcra Hakimiyyətində 2015-ci ilin altı ayının sosial-iqtisadi inkişafının yekunları və qarşıda duran vəzifələrə həsr olunan hesabat yığıncağı keçirilib.

Tədbirdə çıxış edən rayon icra hakimiyyətinin başçısı Razim Məmmədov deyib ki, ötən dövr rayonun sosial-iqtisadi və mədəni həyatında irəliləyişlərlə yadda qalıb. Bu ilin birinci yarısında rayonun iqtisadi və sosial sahələrinin inkişafı üçün əsas kapitala bütün maliyyə mənbələrindən 99 milyon 851 min manatlıq investisiya yönəldilib ki, bu da əvvəlki ilin müvafiq dövrünə nisbətən 8,9 faiz çox olub. İstehlak bazarı dinamik inkişaf edib, rayon ərazisində pərakəndə ticarət şəbəkələrindən əhaliyə 597 milyon 830 min manatlıq və ya əvvəlki ilin müvafiq dövrünə nisbətən 19,6 faiz çox əmtəə satılıb. Satılmış əmtəələrin 21,1 faizi hüquqi şəxs statuslu, 74,5 faizi hüquqi şəxs yaratmadan ticarət fəaliyyəti göstərən fərdi sahibkarların müəssisələrində, 4,4 faizi rayonda fəaliyyət göstərən bazarda realizə olunub. Realizə olunmuş istehlak mallarının 66,6 faizini-398 milyon 155 min manatlığını ərzaq məhsulları, 33,4 faizini-199 milyon 715 min manatlığını isə qeyri-ərzaq məhsulları təşkil edib.

Bildirilib ki, 2015-ci ilin birinci yarısında rayonda 2484 yeni iş yeri yaradılıb. Ümumiyyətlə, son 12 ildə rayonda 40591 yeni iş yeri açılıb ki, bunun da 40385-i daimidir. Hesabat dövründə ünvanlı sosial yardımla bağlı müraciət edən 1168 ailədən 1137 ailəyə bu yardım təyin olunub. Bir ailəyə düşən orta aylıq yardımın məbləği keçən ilin birinci yarısındakı 142,11 manatdan 160 manatadək yüksəlib.

Hesabat məruzəsində rayonda aparılan abadlıq və yenidənqurma işləri haqqında da ətraflı məlumat verilib.

Bildirilib ki, bu ilin aprelində Zığ yolu 16 ünvanında baş vermiş yanğın nəticəsində əşya və avadanlıqlarına ziyan dəymiş 60 ailənin hər birinə Nazirlər Kabinetinin müvafiq qərarı ilə 15 min manat maddi yardım verilməsi təmin olunub, mənzillər təmir edilib, sakinlər öz evlərinə qayıdıblar. Vətəndaşların müraciətlərinə baxılmasına diqqət artırılıb.

Yığıncaqda çıxış edən YAP Xətai rayon təşkilatının sədri, Milli Məclisin deputatı Hüseynbala Mirələmov, Azərbaycan Milli Elmlər Akademiyasının Neft-Kimya Prosesləri İnstitutunun direktoru Vaqif Abbasov və başqaları ötən müddətdə Xətai rayonunda görülən işlərdən, əldə olunan uğurlardan danışıblar.