CƏMİYYƏT
Daxili İşlər Nazirliyinin Daxili Qoşunları Ali Hərbi Məktəbə tələbə qəbulu elan edir
Bakı, 8 fevral, AZƏRTAC
Azərbaycan Respublikası Daxili İşlər Nazirliyinin Daxili Qoşunları (DQ) Ali Hərbi Məktəbə 2016/2017-ci tədris ili üçün tələbə qəbulu elan edir.
DQ-nin mətbuat xidmətindən AZƏRTAC-a bildiriblər ki, Daxili Qoşunların Ali Hərbi Məktəbinə qəbula namizədlər Azərbaycan dilini sərbəst bilən, boyu 165 santimetrdən yuxarı, çağırışçı kimi Səfərbərlik və Hərbi Xidmətə Çağırış üzrə Dövlət Xidmətinin yerli idarə, şöbə və bölmələrində qeydiyyatda olan, buraxılış siniflərində oxuyan və ya tam orta təhsilli, 17 yaşı tamam olan və 19 yaşı tamam olmayan Azərbaycan Respublikasının kişi cinsli vətəndaşları sırasından seçilirlər.
Abituriyentlər Daxili Qoşunların Baş İdarəsində yaradılmış hərbi həkim və mandat komissiyalarından, Daxili İşlər Nazirliyi tərəfindən müəyyən edilmiş fiziki hazırlıq normativləri üzrə sınaqdan keçməlidirlər. Fiziki hazırlıq üzrə minimal normativlərə turnikdə 6 dəfə dartınma, 100 metr məsafəni 15 saniyəyə, 1000 metr məsafəni 4 dəqiqəyə qaçmaq, qollar üzərində bədənin döşəmədən 18 dəfə qaldırılıb endirilməsi və gövdənin döşəmədən 18 dəfə qaldırılıb endirilməsi daxildir.
Sınaq və müvafiq yoxlamalardan müvəffəqiyyətlə keçən abituriyentlərin siyahısı müsabiqədə iştirak etmək üçün Tələbə Qəbulu üzrə Dövlət Komissiyasına göndərilir.
İmtahanlar test üsulu ilə 4-cü ixtisas qrupunun fənləri üzrə Azərbaycan və rus dillərində keçirilir.
Qəbul imtahanlarının keçirilməsi ilə bağlı bütün təşkilati tədbirlər, sənədləşmə, imtahanların vaxtı, yeri və digər şərtlər Tələbə Qəbulu üzrə Dövlət Komissiyası tərəfindən müəyyən edilir və abituriyentlər bu məqsədlə Komissiyanın internet saytında və ya kütləvi informasiya vasitələrində verilən elanları izləməlidirlər.
Ali Hərbi Məktəbə qəbul olunmuş abituriyentlər dövlət hesabına geyim forması, yataqxana və yeməklə təmin edilirlər. Məktəbdə tədris Azərbaycan dilində aparılır və təhsil müddəti dörd ildir.
Məzunlara müvafiq hərbi iхtisаslаrlа bərabər, fiziki tərbiyə və çağırışaqədərki hazırlıq müəllimliyi ixtisası və leytenant hərbi rütbəsi verilərək Daxili Qoşunlarda müvafiq vəzifələrə təyin edilirlər. İkili vətəndaşlığı, digər dövlətlər qarşısında öhdəlikləri olan, 2016-cı ilin aprel və iyul çağırışlarında hərbi xidmətə getməli olan çağırışçılar, din xadimləri, məhkəmənin qanuni qüvvəyə minmiş qərarı ilə fəaliyyət qabiliyyəti olmayan və ya məhdud fəaliyyət qabiliyyətli hesab edilən, cinayət törətdiyinə görə əvvəllər məhkum olunan, habelə barəsində cinayət işinin icraatına bəraətverici əsaslar olmadan xitam verilən, eləcə də Daxili Qoşunlarda xidmətə qəbul üçün müəyyən olunmuş digər şərtlərə uyğun gəlməyən abituriyentlər Ali Hərbi Məktəbə qəbul edilmirlər.
Ali Hərbi Məktəbə qəbul üçün namizədlər şəxsiyyət vəsiqəsini, doğum haqqında şəhadətnaməni (əsli və notarial qaydada təsdiq olunmuş surəti), təhsil müəssisəsinin buraxılış sinfində oxuması haqqında Daxili Qoşunların Baş İdarəsinə təqdim olunması üçün arayışı və ya tam orta təhsil haqqında sənədi (attestatın əsli və notarial qaydada təsdiq olunmuş surəti), yaşayış yeri üzrə tibb müəssisəsindən Daxili Qoşunların Baş İdarəsinə təqdim olunması üçün sağlamlıq haqqında arayışı, ilkin hərbi qeydiyyata alınma haqqında vəsiqəni (əsli və notarial qaydada təsdiq olunmuş surəti), oxuduğu təhsil müəssisəsi tərəfindən Daxili Qoşunların Baş İdarəsinə təqdim olunması üçün verilmiş xasiyyətnaməni, 9x12 santimetr ölçüdə 2 ədəd, 4x6 santimetr ölçüdə 4 ədəd fotoşəkili (papaqsız, rəngli, donuq kağızda) Daxili Qoşunların Baş İdarəsinə (ünvan: Bakı şəhəri, Binəqədi rayonu, Q.Musabəyov küçəsi, 4) şəxsən təqdim etməlidirlər.
Ərizə və sənədlərin qəbulu 2016-cı il martın 1-dən aprelin 10-dək (bayram və bazar günləri istisna olmaqla) hər gün saat 10:00-dan 17:00-dək həyata keçiriləcək.
Məlumat üçün əlaqə telefonları: (012)-590-65-07, (012)-560-27-00.