Bakı, 28 fevral, AZƏRTAC 

Dövlət Miqrasiya Xidmətinin (DMX) yaradılmasının 8-ci ildönümü ərəfəsində respublika ictimaiyyətinin, həmçinin əcnəbilərin və ya vətəndaşlığı olmayan şəxslərin miqrasiya qanunvericiliyindəki yeniliklər haqqında məlumatlandırılması və maarifləndirilməsi ilə bağlı tədbirlər davam etdirilir.

DMX-dən AZƏRTAC-a bildiriblər ki, Azərbaycan Tibb Universitetində keçirilən görüşdə son illər Prezident İlham Əliyevin rəhbərliyi ilə böyük uğurlara imza atan Azərbaycanın sürətli inkişafına diqqət çəkilib. Ölkəmizə səfər etmək, yaşamaq, işləmək, təhsil almaq, Azərbaycan vətəndaşı olmaq istəyənlərin sayındakı artım dinamikasına toxunulub. Hüquqi dövlət olan Azərbaycanda miqrasiya proseslərinin tənzimlənməsi ilə bağlı görülən işlərdən bəhs olunub.

Bildirilib ki, qanunvericiliyə əsasən 10 gündən artıq ölkəmizdə qalmaq istəyən əcnəbi və ya vətəndaşlığı olmayan şəxs olduğu yer üzrə qeydiyyata düşməlidir və bunun üçün heç bir rüsum ödənilmir. Əcnəbilər və ya vətəndaşlığı olmayan şəxslər qeydiyyata düşmədikləri halda inzibati məsuliyyət daşıyırlar. Görüşdə, həmçinin əcnəbilərin və ya vətəndaşlığı olmayan şəxslərin respublikamızda haqqı ödənilən əmək fəaliyyətinə cəlb edilməsinin hüquqi əsasları barədə ətraflı məlumat verilib.

Gəncə Dövlət Universitetində təşkil olunan görüşdə də miqrasiya proseslərinin idarə edilməsi sahəsində nəzarətin gücləndirilməsi, qanunsuz miqrasiyanın qarşısının alınması məqsədilə görülən işlərdən söhbət açılıb. Dövlət Miqrasiya Xidmətinin “Elektron hökumət” portalı üzərindən göstərdiyi elektron xidmətlərin sayının 10-a çatdırıldığı bildirilib.

Görüşlərdə miqrasiya sahəsində qanunvericiliyin ilbəil daha da təkmilləşdirilməsi, hüquqi sənədlərin tənzimlədiyi sahələr üzrə müvafiq prosedurların sadələşdirilməsindən danışılıb. Məsələn, Miqrasiya Məcəlləsinə əsasən bir il müddətinə verilən müvəqqəti yaşamaq üçün icazə növbəti dəfə 2 il müddətədək uzadıla bilər. Bundan əlavə, “Dövlət rüsumu haqqında” qanuna əsasən Azərbaycan Respublikasının ali və orta ixtisas təhsili müəssisələrində əyani formada təhsil alan əcnəbilərə və ya vətəndaşlığı olmayan şəxslərə ölkəmizin ərazisində müvəqqəti yaşamaq üçün icazə vəsiqəsinin verilməsinə və müddətin uzadılmasına görə rüsum digər şəxslərdən fərqli-güzəştli əsaslarla müəyyənləşdirilib.

Hər iki universitetdə keçirilən görüşdə aparılan ətraflı izahat işləri ölkəmizdə çalışan əcnəbi elm xadimləri və ali təhsil alan əcnəbi tələbələr tərəfindən maraqla qarşılanıb.

Sonda suallar cavablandırılıb.