Dövlət Miqrasiya Xidməti tərəfindən 71 minə yaxın şəxsin Azərbaycan vətəndaşlığına mənsubiyyəti tanınıb
Bakı, 17 fevral, AZƏRTAC
Dövlət Miqrasiya Xidməti tərəfindən Azərbaycan Respublikasının vətəndaşlığına mənsubiyyəti araşdırılmış şəxslərdən 70 min 994 şəxsin Azərbaycan vətəndaşlığına mənsubiyyəti tanınıb. Onlar Azərbaycan vətəndaşının şəxsiyyətini təsdiqləyən sənədlərlə təmin edilib.
AZƏRTAC xəbər verir ki, bu fikirlər Xəzər Universitetində Dövlət Miqrasiya Xidmətinin (DMX) yaradılmasının 10-cu ildönümünə həsr olunmuş “Azərbaycanda miqrasiya siyasəti: nailiyyətlər və inkişaf perspektivləri” mövzusunda respublika elmi-praktiki konfransda səsləndirilib.
Bildirilib ki, əsas insan hüquqlarından biri olan vətəndaşlıq hüququnun əhəmiyyəti nəzərə alınaraq, vətəndaşsızlıq halları ilə mübarizə sahəsində məlumatlılığın artırılması və bu şəxslərin hüquqi statusunun müəyyənləşdirilməsi zamanı yaranan problemlərin, o cümlədən onların hüquqlarının səmərəli müdafiəsi naminə əməkdaşlığın gücləndirilməsi məqsədilə Azərbaycan BMT-nin Qaçqınlar üzrə Ali Komissarlığının “10 ilə vətəndaşsızlığa son” kampaniyasına qoşulub. Vətəndaşsızlıq hallarının qısa bir zamanda aradan qaldırılması üçün Dövlət Miqrasiya Xidməti tərəfindən ölkənin bütün regionları üzrə müvafiq işlər görülüb və hazırda bu iş davam etdirilir.
Dövlət Miqrasiya Xidməti qanunsuz miqrasiyaya qarşı mübarizə tədbirlərini ilbəil daha da genişləndirir, əcnəbi və vətəndaşlığı olmayan şəxslərin Azərbaycan Respublikasında olma, habelə müvəqqəti və daimi yaşama qaydalarının pozulması hallarını aşkar edərək qarşısını alır. Xidmət tərəfindən aparılmış kompleks tədbirlər nəticəsində bu gün onların sayı minimuma endirilib.
Konfransda qeyd olunub ki, DMX yarandığı vaxtdan miqrasiya sahəsi üzrə beynəlxalq əməkdaşlıq daha da genişləndirilib, iki və çoxtərəfli əsaslarla münasibətlər inkişaf etdirilib, bir sıra ölkələrlə miqrasiya sahəsində təcrübə mübadiləsi aparılıb.
Bölmənin digər xəbərləri
