CƏMİYYƏT
“Dövlət Miqrasiya Xidmətinin işçi heyətinin peşəkar bacarıqlarının artırılmasına dəstək” adlı Tvinninq layihəsi başa çatıb
Bakı, 6 mart, Məhərrəm Əlioğlu, AZƏRTAC
Martın 6-da Bakıda Avropa İttifaqı ilə Azərbaycan Respublikası Dövlət Miqrasiya Xidmətinin birgə həyata keçirdiyi “Dövlət Miqrasiya Xidmətinin işçi heyətinin peşəkar bacarıqlarının artırılmasına dəstək” adlı Tvinninq layihəsinin bağlanış mərasimi keçirilib.
AZƏRTAC xəbər verir ki, mərasimdə çıxış edən Dövlət Miqrasiya Xidməti rəisinin müavini, III dərəcəli dövlət miqrasiya xidmət müşaviri Pərviz Musayev xidmətin təşəbbüsü ilə Avropa Komissiyasına təqdim edilmiş, ümumi dəyəri bir milyon əlli min Avro məbləğində müəyyənləşdirilən və 2 il 3 aylıq dövrü əhatə edən Tvinninq layihəsi üzrə müvafiq tədbirlərin icrasının 2013-cü ilin yanvar ayından başladığını bildirib.
P.Musayev qeyd edib ki, ötən dövr ərzində Avropa İttifaqına üzv olan Niderland, Latviya və Rumıniyanın miqrasiya sahəsində fəaliyyət göstərən aidiyyəti qurumları ilə 4 komponent üzrə birgə 53 tədbir həyata keçirilib. Buraya təlimlər, seminarlar, təlim səfərləri, rüblük rəhbər görüşləri və digər tədbirlər aiddir. Layihənin hər bir komponenti üzrə bir sıra mühüm nəticələr əldə olunub. Belə ki, layihə qanunvericiliyin təkmilləşdirilməsi, sistematik təhlil yolu ilə qeyri-qanuni miqrasiyanın qarşısının alınması, təlim vasitəsilə peşəkar bacarıqların artırılması, həmçinin ictimaiyyətin maarifləndirilməsi sahəsində bir sıra yeniliklərin tətbiqinə töhfəsini verib.
O, Azərbaycanda gedən sürətli inkişaf, Prezident İlham Əliyevin rəhbərliyi ilə bütün sahələrdə qazanılan nailiyyətlər nəticəsində respublikamızın əcnəbilər üçün cəlbedici məkana çevrildiyini bildirib.
Niderlandın Repatriasiya və Geri Qaytarma Xidmətinin baş direktoru xanım Rodia Maas, Latviyanın Vətəndaşlıq və Miqrasiya Məsələləri İdarəsinin rəis müavini Janis Citskovskis, Niderlandın İmmiqrasiya və Naturalizasiya Xidmətinin baş direktoru Rob Van Lint, Rumıniyanın İmmiqirasiya üzrə Baş Müfəttişliyinin idarə rəisi Oktavian Predescu, Avropa İttifaqının Azərbaycandakı nümayəndəliyinin proqram meneceri Miquel Marko Qomez və digər çıxış edənlər layihənin uğurla başa çatdığını bildiriblər.
Qeyd olunub ki, layihə Azərbaycan ilə Aİ arasında əməkdaşlığı gücləndirmək yolunda mühüm əhəmiyyət daşıyıb və öz töhfəsini verəcək. İki il ərzində uğurla icra edilən layihədən gözlənilən nəticələr əldə olunub.
Sonda Tvinniq layihəsi üzrə Dövlət Miqrasiya Xidmətinin tərəfdaşı olmuş hər üç dövlətin - Niderland, Latviya və Rumıniyanın nümayəndələrinə, Avropa İttifaqının Azərbaycandakı nümayəndəliyinə layihənin gerçəkləşdirilməsində göstərdikləri dəstəyə görə minnətdarlıq edilib.
Tədbirdə müvafiq dövlət qurumlarının, beynəlxalq təşkilatların, xarici ölkələrin Azərbaycandakı səfirliklərinin nümayəndələri iştirak ediblər.