Bakı, 13 oktyabr, AZƏRTAC

Azərbaycan Respublikası Dövlət Miqrasiya Xidmətinin rəis müavini Pərviz Musayevin rəhbərlik etdiyi nümayəndə heyəti Rusiya Federasiyasının BRİCS qrupuna (Braziliya, Rusiya, Hindistan, Çin və Cənubi Afrika Respublikasını birləşdirən qrup) sədrliyi çərçivəsində miqrasiya orqanları rəhbərlərinin nazirlər səviyyəsində təşkil olunmuş görüşündə “Miqrasiyanın idarə edilməsinin yeni strategiyaları - cəmiyyətin uğurlu inkişafının rəhni kimi” mövzusunda “dəyirmi masa”da iştirak etmək üçün Soçidə səfərdə olub.

Dövlət Miqrasiya Xidmətindən AZƏRTAC-a bildiriblər ki, “dəyirmi masa”da Rusiya, Hindistan, Çin, Cənubi Afrika Respublikası, Azərbaycan, Qırğızıstan, Monqolustan, Pakistan, Tacikistan, Ermənistan, Beynəlxalq Miqrasiya Təşkilatı, BMT-nin Qaçqınlar üzrə Ali Komissarlığı, BMT-nin Narkotik və Cinayətkarlıq üzrə İdarəsi, MDB, ATƏT və Avrasiya İqtisadi Komissiyasının nümayəndələri iştirak ediblər.

“Dəyirmi masa” iştirakçıları dünyanın sosial-iqtisadi və demoqrafik vəziyyətinə təsiri kontekstində cəmiyyətin uğurlu inkişafının amili kimi miqrasiya proseslərinin rolu, miqrasiya axınlarının mövcud şəraitində yeni çağırışlar və strategiyalar, həmçinin beynəlxalq himayə və informasiya mübadiləsi barədə məruzələrlə çıxış ediblər.

Azərbaycan Respublikası nümayəndə heyətinin rəhbəri Pərviz Musayev ölkəmizdə miqrasiya sahəsində görülmüş işlər və əldə olunmuş nailiyyətlər barədə iştirakçılara məlumat verib. O, çıxışında Ermənistan Respublikasının ötən əsrin 80-ci illərinin sonu 90-cı illərinin əvvəllərində planlı şəkildə həyata keçirdiyi etnik təmizləmə siyasəti nəticəsində 250 min azərbaycanlının doğma yurdlarından zorla qovularaq Azərbaycana pənah gətirməsi, Ermənistan silahlı qüvvələri tərəfindən Azərbaycan Respublikası ərazisinin 20 faizinin – Dağlıq Qarabağın, həmçinin ona bitişik olan 7 rayonun işğal olunması və 700 min nəfərədək vətəndaşımızın doğma yurdunda məcburi köçkünə çevrilməsi barədə faktları iştirakçıların diqqətinə çatdırıb.

Qeyd edilib ki, enerji-nəqliyyat sahələrində beynəlxalq və regional layihələrin həyata keçirilməsi, ölkədə mövcud ictimai-siyasi və iqtisadi sabitlik, yüksək sürətli iqtisadi inkişaf əcnəbilərin ölkəmizə axınına səbəb olan əsas amillərdir. Həmçinin Azərbaycanda tolerantlığın yüksək səviyyəsi miqrasiya proseslərinə təsir göstərən, heç də az əhəmiyyət kəsb etməyən amil kimi qeyd olunub. Vurğulanıb ki, bu günə qədər miqrantlara münasibətdə milli, etnik və dini zəmində hüquq pozuntusu qeydə alınmayıb. Azərbaycan Respublikası miqrasiya, xüsusən də əmək miqrasiyası proseslərinin daha səmərəli tənzimlənməsi üçün mümkün beynəlxalq alətlərdən istifadə edir. Belə ki, əməkçi miqrantların və onların ailə üzvlərinin hüquqlarının müdafiəsinin təmin edilməsi məqsədilə Azərbaycan Respublikası bir sıra ölkələrlə ikitərəfli və çoxtərəfli sazişlər imzalayıb. Həmçinin son illərdə Azərbaycan Respublikasında miqrasiya qanunvericiliyinin sadələşdirildiyi, region ölkələrində ilk dəfə Miqrasiya Məcəlləsinin ölkəmizdə qəbul edildiyi də iştirakçıların diqqətinə çatdırılıb.

“Dəyirmi masa”nın sonunda BRİCS ölkələrinin miqrasiya orqanları rəhbərlərinin birgə bəyanatı qəbul olunub.