Lənkəran, 21 aprel, Bağır Əliyev, AZƏRTAC

Aprelin 20-də Mədəniyyətşünaslıq üzrə Elmi-Metodiki Mərkəzin təşkilatçılığı ilə Lənkəran şəhərində keçirilən treninqdə cənub bölgəsinin gənc mədəniyyət işçiləri İKT-nin imkanlarından istifadə yollarını müzakirə ediblər.

AZƏRTAC xəbər verir ki, Lənkəran Regional Mədəniyyət və Turizm İdarəsinin tabeliyində olan Astara, Lənkəran və Lerik rayon mədəniyyət müəssisələrinin gənc əməkdaşlarının iştirakı ilə keçirilən tədbirdə “Google Maps internet saytının imkanlarından istifadə qaydaları” və “Vikipediyadan istifadə qaydaları” müzakirə mövzusu olub.

Təlim məşğələsində informasiya texnologiyaları üzrə mütəxəssis Məmməd Əliyev “Google Maps” və digər məşhur onlayn xəritələrdən, axtarış sistemlərindən istifadə etməklə regionlarda yerləşən muzeylər, tarixi abidə və qoruqlar, otellər, restoranlar və bu kimi digər müəssisələr haqqında məlumatların asanlıqla tapılmasının təmin edilməsindən danışıb.

Mədəniyyətşünaslıq üzrə Elmi-Metodiki Mərkəzin innovasiyalar və yeni texnologiyaların tətbiqi şöbəsinin sektor müdiri Toğrul Hidayətzadə “Vikipediya”da müasir informasiya texnologiyalarının və kreativ üsulların tətbiqi kimi məsələlərin olduqca aktual olduğunu diqqətə çatdırıb.

Lənkəran Regional Mədəniyyət və Turizm İdarəsinin rəisi Vüsal Nəsirli, Mədəniyyətşünaslıq üzrə Elmi-Metodiki Mərkəzin direktoru Asif Usubəliyev internet resurslarında təxribat xarakterli və təhrif olunmuş məlumatların yayılmasından danışaraq, onların aşkar olunmasında hər bir azərbaycanlının fəallıq göstərməli olduğunu bildiriblər.

Sonda gənc mədəniyyət işçilərinin sualları cavablandırılıb.