Gəncə, 3 mart, Sabir Əliyev, AZƏRTAC

Ölkəmizin ikinci böyük şəhəri olan Gəncə bu gün, sözün əsl mənasında, özünün yeni inkişaf dövrünü yaşayır. Son illər şəhərdə aparılan geniş abadlıq və quruculuq işləri demək olar, bu qədim şəhərin simasını başdan-başa dəyişib. Salınan yeni park və xiyabanlar, əsaslı şəkildə yenidən qurulan küçə və prospektlər, eləcə də ən müasir üslubda inşa edilən binalar Gəncəni Avropanın inkişaf etmiş şəhərləri səviyyəsinə yüksəldib.

AZƏRTAC xəbər verir ki, bütün bunlar barədə 2014-cü ilin yekunları və cari ildə qarşıda duran vəzifələrin müzakirəsinə həsr edilmiş hesabat yığıncağında ətraflı məlumat verilib.

Görülən işlərə dair videofilmin nümayişindən sonra hesabat məruzəsi ilə çıxış edən Gəncə Şəhər İcra Hakimiyyətinin başçısı Elmar Vəliyev deyib ki, keçən il Prezident İlham Əliyevin və Heydər Əliyev Fondunun prezidenti Mehriban xanım Əliyevanın Gəncəyə tarixi səfərləri unudulmaz və yaddaqalan olub. Şəhər sakinləri bu səfərlərin xoş təsiri altında daha böyük uğurlara imza atıblar. Nəticədə şəhər üzrə məhsul istehsalının həcmi 18 faiz artaraq 820 milyon manata çatıb. İstehsal edilən məhsulun 35 faizi xarici ölkələrə ixrac olunub.

Ötən il Gəncədə orta aylıq əmək haqqı 318 manata çatıb. DET-Al alüminium kompleksində 2 zavod məhsul istehsalına başlayıb. Sənaye və İqtisadiyyat Nazirliyinin Sahibkarlığa Kömək Milli Fondu tərəfindən Gəncənin 32 sahibkarına 4 milyon manatdan çox güzəştli kredit verilib, nəticədə 6 min yeni iş yeri açılıb.

Bildirilib ki, hesabat ilində Gəncədə regionda ilk dəfə olaraq vaqon istehsalı müəssisəsinin təməli qoyulub. Heydər Əliyev park-kompleksində əyləncə mərkəzinin, 17 hektar sahəsi olan Gəncə Olimpiya Parkının, dövlət filarmoniyasının, “Mətbuat evi”nin inşası başa çatdırılıb, dövlət dram teatrı üçün yeni binanın tikintisinə başlanılıb. Orta əsr Azərbaycan memarlığının qiymətli abidələrindən olan “İmamzadə” tarixi-dini memarlıq abidəsində son tamamlama işləri görülür.

Şəhərdə fərdi evlərin və ictimai binaların hasarları qırmızı kərpiclə üzlənib. 300-ə yaxın çoxmərtəbəli yaşayış binasının, 1000-dən artıq həyət evinin dam örtüyü dəyişdirilib. 200 mindən çox ağac və gül kolları əkilib, 6 hektar ərazidə yeni yaşıllıq zonaları yaradılıb. Şəhərin 19 küçəsi və qəsəbə yolları asfaltlanıb, gecə işıqlandırılması üçün 876 işıq dirəyi quraşdırılıb. Hesabat ilində 9 məktəb binası əsaslı şəkildə təmir olunub, 3 məktəb üçün əlavə tədris korpusları inşa edilib. Həmçinin şəhər təhsil idarəsi üçün yeni inzibati bina istifadəyə verilib. 4 xəstəxana, 2 poliklinika, eləcə də təcili tibbi yardım xəstəxanasında iki şöbə əsaslı təmir olunaraq tamamilə yenidən qurulub.

Hesabat dövründə əhalinin işıq, qaz və içməli su ilə təchizatında da etibarlılıq təmin edilib.

Şəhərin idarə və təşkilatlarının nümayəndələri, eləcə də Prezident Administrasiyasının məsul işçisi Vəfadar Bağırov çıxış edərək, ötən il Gəncədə görülən işlərə münasibətlərini bildiriblər.

Yığıncaqda cari ildə görüləcək işlərə dair qərar qəbul edilib.

Sonda Azərbaycan Prezidentinə müraciət qəbul olunub.