SİYASƏT


Gör necə əlvandır bizim Astara... FOTOREPORTAJ

Astara, 4 yanvar, Bağır Əliyev, AZƏRTAC

Müstəqil Azərbaycan Respublikasının bütün regionları kimi, Astara rayonu da bu gün inkişafının yeni mərhələsini yaşayır. Bu inkişafın təməlində xalqımızın ümummilli lideri Heydər Əliyevin əsasını qoyduğu və Prezident İlham Əliyevin uğurla davam etdirdiyi siyasət dayanır.

AZƏRTAC xəbər verir ki, dövlət müstəqilliyimizin bərpasından ötən 25 il ərzində rayonda iqtisadi yüksəliş, sosial tərəqqi müasir Astaranın reallıqlarıdır. Astaralılar bu reallıqlara dövlətimizin başçısının diqqət və qayğısı sayəsində nail olublar.

Ötən müddətdə Astara rayonunun sosial-iqtisadi həyatında əsaslı dəyişikliklər baş verib, əhalini narahat edən problemlərin həlli və infrastruktur layihələrinin yerinə yetirilməsi sahəsində mühüm tədbirlər həyata keçirilib.

Azərbaycan Respublikası regionlarının sosial-iqtisadi inkişafına dair Dövlət proqramlarında nəzərdə tutulan tədbirlərin uğurlu icrası Astarada da böyük dəyişikliklərə səbəb olub, rayonda iqtisadiyyatın bütün sahələri inkişaf edib, əhalinin maddi rifah halı yüksəlib.

Rayonda modul tipli elektrik və qaz-kompressor stansiyaları, Olimpiya İdman Kompleksi, Gənclər Evi, Boks Mərkəzi, Dənizkənarı Park-Bulvar Kompleksi, əlil və şəhid ailələri üçün 48 mənzilli 2 yaşayış binası inşa olunub, 90 çarpayılıq Mərkəzi Rayon Xəstəxanası, Mədəniyyət Mərkəzi əsaslı təmir edilib, təhsil və digər sosialyönümlü obyektlər istifadəyə verilib, genişmiqyaslı abadlıq-quruculuq işləri aparılıb, kəndlərarası avtomobil yolları yenidən qurulub.

Astara kənd təsərrüfatı rayonudur. Burada əsasən tərəvəzçilik, çayçılıq, sitrusçuluq, taxılçılıq və heyvandarlıq inkişaf edib.

Azərbaycan öz müstəqilliyinə yenidən qovuşduqdan sonra kənd təsərrüfatında yaranmış tənəzzül, dağılmış təsərrüfatlar dövlət dəstəyi ilə həyata keçirilən islahatlar nəticəsində yenidən bərpa olunmağa başladı. Məhsul istehsalçılarına verilən subsidiyalar, güzəştli kreditlər fermerlərin və torpaq mülkiyyətçilərinin aqrar bölmənin inkişafına olan marağını daha da artırıb.

Rayon statistika idarəsinin məlumatına görə, son 13 ildə Astarada ümumi məhsul və xidmətlərin həcmi 6,8 dəfə, o cümlədən sənaye məhsulları 16,7, kənd təsərrüfatı məhsulları 3,4, pərakəndə ticarət dövriyyəsi 5,2, əhaliyə göstərilən pullu xidmətlərin həcmi 8,3 dəfə artıb.

Bu dövrdə rayonda 8140 yeni iş yeri açılıb. Əhalinin orta əmək haqqı 8,4, pensiyaların orta aylıq məbləği 5 dəfə artıb.

Doğma Azərbaycanımızın bir parçası olan Astara bu gün özünün intibah dövrünü yaşayır. Ulu Öndərin Azərbaycanın cənub qapısı adlandırdığı Astara rayonu gündən-günə inkişaf edir, gözəlləşir, simasını dəyişir.

Şair Novruz İbadoğlunun Astaraya həsr etdiyi şeirində rayonun bugünkü mənzərəsi necə də gözəl təsvir olunub:

Yuyur sahilini Xəzər suları,

Ona nəğmə deyir qışı, baharı,

Sevirəm, sevirəm mən bu diyarı

Gör necə əlvandır bizim Astara,

Nurlu çıraqbandır bizim Astara...

 

Bağır Əliyev

AZƏRTAC-ın cənub bölgəsi üzrə müxbiri

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.