MƏDƏNİYYƏT


Görkəmli tarzən Həbib Bayramovun xatirəsinə həsr olunmuş musiqili gecə

A+ A

Bakı, 6 dekabr, AZƏRTAC

Dekabrın 6-da Beynəlxalq Muğam Mərkəzində Azərbaycan ifaçılıq sənətinin görkəmli nümayəndəsi, məşhur tarzən, Xalq Artisti Həbib Bayramovun 90 illiyinə həsr olunmuş xatirə gecəsi təşkil olunub.

AZƏRTAC xəbər verir ki, tədbir Mədəniyyət və Turizm Nazirliyinin təşkilatçılığı ilə gerçəkləşib.

Əvvəlcə qonaqlar unudulmaz sənətkarın həyat və yaradıcılığının əks olunduğu fotosərgi ilə tanış olublar.

Tədbirdə Opera və Balet Teatrının baş rejissoru, Əməkdar İncəsənət Xadimi Hafiz Quliyev çıxış edərək sənətkarın həyat və yaradıcılığından, milli musiqimizin formalaşmasındakı xidmətlərindən danışıb.

Tədbir respublikanın tanınmış ifaçılarının iştirak etdiyi konsert proqramı ilə davam edib.

Bildirilib ki, Həbib Bayramov 1926-cı il iyunun 26-da anadan olub. Sənətkarın repertuarında “Rast”, “Şur”, “Cahargah”, “Humayun”, “Segah” və digər muğamlar əsas yeri tutur. Hər zaman sənətini yüksək ifaçılıq mədəniyyəti ilə fərqləndirməyə üstünlük verən H.Bayramov tarı milli musiqi aləti kimi sevirdi və onu öz ifaçılığı ilə xalqa hər zaman sevdirirdi.

Diqqətə çatdırılıb ki, musiqi aləmində şərəfli həyat yolu keçmiş Həbib Bayramov Bülbül, Xan Şuşinski, Zülfü Adıgözəlov, Yavər Kələntərli, Həqiqət Rzayeva, Şövkət Ələkbərova, Əbülfət Əliyev, Rübabə Muradova, Sara Qədimova kimi görkəmli sənətkarları tarda müşayiət edib. Sənətkar tarla yanaşı, həm də gözəl saz ifaçısı olub. Onun sazda ifa etdiyi “Segah”, “Humayun”, “Bayatı-Qacar” muğamları milli radionun Qızıl fondunda saxlanılır. Həbib Bayramov 1973-cü ildən ömrünün sonunadək Azərbaycan Dövlət Televiziya və Radiosunun Əhməd Bakıxanov adına Xalq Çalğı Alətləri Ansamblının bədii rəhbəri olub.

Xalq Artisti, bəstəkar Tofiq Bakıxanov çıxış edərək mahir tar ifaçısı haqqında xatirələrini bölüşüb, yaradıcılığından danışıb.

Tədbir konsert proqramı ilə davam edib.

Konsertdə Əhməd Bakıxanov adına Xalq Çalğı Alətləri Ansamblının müşayiəti ilə tanınmış və gənc xanəndələrin ifasında xalq, bəstəkar mahnıları və muğamlarımız dinlənilib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.