MƏDƏNİYYƏT
Heydər Əliyev adına Tbilisi Dövlət Azərbaycan Dram Teatrı üçün yeni torpaq sahəsi ayrılıb
Tbilisi, 18 aprel, AZƏRTAC
Bu gün Gürcüstanda Azərbaycan mədəniyyətinin, incəsənətinin, mətbuatının inkişafında mühüm rol oynamış bir sıra mədəniyyət ocaqları var. Onların sırasında Nəriman Nərimanovun, Cəlil Məmmədquluzadənin ev-muzeyləri, M.F.Axundzadə adına Azərbaycan Mədəniyyəti Muzeyi, Heydər Əliyev adına İstirahət Parkı və başqaları var. Bu cür mədəniyyət ocaqlarından biri də Tbilisi Dövlət Azərbaycan Dram Teatrıdır. Bu teatrda İbrahim İsfahanlı, Ələkbər Seyfi, Möhsün Sənani, Ülvi Rəcəb kimi teatr nəhəngləri çalışıblar. Bu teatrın səhnəsində dünya və Azərbaycan dramaturgiyasının müxtəlif pyesləri səhnələşdirilib. Tarix kitablarında bu teatrın müxtəlif dövrlərdə başqa teatrlara yardım etdiyi, digər teatrların tamaşalarını maliyyələşdirdiyi yazılır.
Bu mühüm tarixi mədəniyyət abidəsi hazırda ümummilli lider Heydər Əliyevin adını daşıyır.
Amma təəssüf ki, bu gün Azərbaycan və gürcü xalqlarının ortaq mədəni abidəsi sayılan Heydər Əliyev adına Tbilisi Dövlət Azərbaycan Dram Teatrı çox acınacaqlı vəziyyətdədir.
Aktyorların istifadə etdikləri kostyumlar çirkli və ətrafa səpələnmiş, döşəmə-tavanı uçulmuş, teatr üçün mühüm olan bütün avadanlıqlardan məhrum qalmış bu teatrın ciddi təmirə ehtiyacı var.
Teatrın direktorunun texniki işlər üzrə müavini Vaqif Bayramov deyib ki, teatrın yerləşdiyi bina 1900-cü ildə tikilib istifadəyə verilib. Tbilisinin mərkəzində Qoqasali küçəsi 1 ünvanında yerləşən bu binanın 746 kvadratmetri (22 faizi) teatra məxsus olub. Teatr Gürcüstanın o zaman yaranmaqda olan teatrlarına da köməklik edib. Sənədlə teatrın cəmi 19 otağı var. Amma hazırda teatrın yerləşdiyi binada 16 ailə yaşayır, 2 mağaza, 1 restoran, 1 rəssamın iş otağı və 1 Xalq Çalğı Alətləri Muzeyi var. Teatr 1947-ci ildə bağlanıb, 2003-cü ildə Tbilisi Bələdiyyə Teatrı kimi yenidən fəaliyyətini bərpa edib. 2004-cü ildə tetra Azərbaycan xalqının ulu öndəri Heydər Əliyevin adı verilib.
Teatrın direktor müavini, Azərbaycanın Əməkdar Mədəniyyət İşçisi Namiq Hacıyev deyib: “Tbilisidəki Heydər Əliyev adına Azərbaycan Dövlət Dram Teatrının kollektivi indiyədək bir çox tamaşaların premyerasına imza atıb. Lakin hazırda teatrın binası qəzalı və bərbad vəziyyətdə olduğu üçün biz tamaşalarımızı paytaxtdakı digər teatrlarda oynayırıq. Bu isə bizim üçün maliyyə sarıdan çox çətindir. Amma buna baxmayaraq, biz bundan sonra da çalışacaq və istedadlı aktyorlarımızın səyi nəticəsində daha çox tamaşalarda oynayacağıq”.
Direktor müavini qeyd edib ki, bütün çətinliklərə baxmayaraq, teatrda 12 aktyor çalışır. Onlardan 7 nəfəri ulu öndər Heydər Əliyevin və Gürcüstanın keçmiş Prezidenti Eduard Şevardnadzenin təşəbbüsü ilə Şota Rustaveli adına Tbilisi Teatr və Kino İnstitutunun teatr və kino aktyoru ixtisasını bitirib.
Bu günlərdə Azərbaycanın Gürcüstandakı səfiri Dursun Həsənov və Milli Məclisin Azərbaycan-Gürcüstan parlamentlərarası əlaqələr üzrə işçi qrupun rəhbəri Əflatun Amaşov teatrda olub, kollektivlə görüşüb, onların problemləri ilə maraqlanıblar.
Teatrın bədii rəhbəri Varlam Nikoladze görüşdə deyib: “Mən bu teatra təyin olunmamışdan əvvəl Türkiyədə çalışmışam və türk dilini mükəmməl bilirəm. Bu teatr mənə doğmadır. Təəssüf ki, teatrımızda tamaşalar hazırlamaq və oynamaq üçün istədiyimiz şərait yoxdur. Düşünürəm ki, bir ölkədə bir dövlət teatrı fəaliyyət göstərirsə, onun öz teatrı olmalıdır”.
Dursun Həsənov deyib ki, Heydər Əliyev adına Tbilisi Dövlət Azərbaycan Dram Teatrının kollektivi çətin şəraitə baxmayaraq, bir sıra tamaşalar hazırlayıb, Azərbaycan mədəniyyətinin təbliği istiqamətində mühüm işlər görüb. Teatrın binasının qəzalı vəziyyətdə olması barədə hər iki ölkənin əlaqədar təşkilatlarına məlumat verilib. Səfirlik teatrın binasının yenidən qurulması və ya yeni bina ilə təmin olunması üçün bütün imkanlardan istifadə edəcək.
Deputat Əflatun Amaşov isə bildirib ki, bu gün Tbilisinin mərkəzində belə bir mədəniyyət ocağının acınacaqlı vəziyyətdə olması çox pisdir. Biz də deputatlar olaraq teatrın binasının təmiri və ya yeni bina ilə təmin olunması üçün əlimizdən gələni edəcəyik.
Gürcüstanın Mədəniyyət və Abidələrin Mühafizəsi naziri Mixail Georqadze bildirib Heydər Əliyev adına Tbilisi Dövlət Azərbaycan Dram Teatrının binası həqiqətən də qəzalı vəziyyətdədir. Biz əvvəlcə bu binanın yenidən qurulması və təmiri üçün smeta hazırlamışdıq. Lakin sonradan müəyyən problemlər yarandığı üçün biz teatr üçün yeni binanın tikilməsi barədə qərar qəbul etdik. Artıq teatr binası üçün Azərbaycan səfirliyinin yanında torpaq sahəsi də ayrılıb. Hazırda sənədləşmə işləri aparılır və düşünürəm bu, çox vaxt aparmaz.
Nazirin sözlərinə görə, teatrın yeni binasının tikintisi ilə SOCAR məşğul olacaq. Bununla əlaqədar Gürcüstan hökuməti SOCAR-la danışıqlar aparır.
Xətayi Əzizov
AZƏRTAC-ın xüsusi müxbiri
Tbilisi