CƏMİYYƏT
“Heydər Əliyev və müstəqil Azərbaycan” mövzusunda məqalə müsabiqəsinin qalibləri mükafatlandırılıb [YENİLƏNİB]
Bakı, 23 dekabr, Həsrət Mahmudova, AZƏRTAC
Azərbaycan Respublikasının dövlət müstəqilliyinin bərpasının 25-ci ildönümünə həsr edilən jurnalistlər arasında “Heydər Əliyev və müstəqil Azərbaycan” mövzusunda məqalə müsabiqəsinin qalibləri mükafatlandırılıb.
AZƏRTAC xəbər verir ki, müsabiqə Gənclər və İdman Nazirliyinin dəstəyi ilə Dünya Türk Gənclər Birliyi və Azərbaycan Gənclərinin Demokratik İnkişafa Yardımı İctimai birlikləri tərəfindən keçirilib.
Mükafatlandırma mərasimi Azərbaycanın dövlət himninin səsləndirilməsi ilə başlayıb.
Dünya Türk Gənclər Birliyi İctimai Birliyinin sədri Əkrəm Abdullayev, gənclər və idman nazirinin müavini İntiqam Babayev, Milli Məclisin gənclər və idman komitəsinin sədri Fuad Muradov, Prezident Administrasiyasının ictimai-siyasi məsələlər şöbəsinin gənclər təşkilatları ilə iş sektorunun müdiri Vüsal Quliyev, “Yeni Azərbaycan” qəzetinin baş redaktoru, Milli Məclisin deputatı Hikmət Məmmədov, Azərbaycan Yazıçılar Birliyinin katibi Rəşad Məcid tədbirdə çıxış edərək bildiriblər ki, müstəqilliyi qoruyub saxlamaq onu qazanmaqdan qat-qat çətindir. Azərbaycanın əldə etdiyi istiqlaliyyət çətin başa gəlsə də, xalqımız ulu öndər Heydər Əliyevin rəhbərliyi ilə müstəqilliyi qoruyub saxlaya və tarixin ən ağır sınaqlarından uğurla çıxmağa nail olub. Dahi rəhbərin qurub yaratdığı müasir müstəqil Azərbaycan dövləti bu gün etibarlı əllərdədir və Ümummilli Liderin inkişaf strategiyası Prezident İlham Əliyevin rəhbərliyi ilə uğurla reallaşdırılır.
Qeyd olunub ki, layihə tarixin çətin mərhələlərindən keçən Azərbaycanın müstəqillik mübarizəsinin təbliğinə və ulu öndər Heydər Əliyevin bu sahədə əvəzsiz rolu haqqında yeni biliklərin əldə olunmasına xidmət edir.
Diqqətə çatdırılıb ki, müsabiqəyə noyabrın 14-də start verilib. Yazılar nömrələnərək, anonim şəkildə münsiflərə təqdim olunub və qalib müvafiq qiymətləndirməyə əsasən müəyyənləşdirilib. Şərtlərə əsasən, jurnalistlərə 2016-cı il ərzində bu mövzuda dərc olunan yazılarını müsabiqəyə təqdim etmək imkanı verilib.
Münsiflər heyətinin qərarına əsasən, “Xalq qəzeti”nin müxbiri Anar Turan birinci, “Şərq” qəzetinin əməkdaşı Ayyət Abdullayev ikinci, “Odlar yurdu” qəzetinin müxbiri Günay İmanova isə üçüncü yerə layiq görülüblər.
Sonra mükafatlandırma mərasimi keçirilib.
Müsabiqənin şərtlərinə əsasən, birinci yerin sahibinə 1000, ikinci yeri tutana 800, üçüncü yerə layiq görülənə isə 600 manat məbləğində pul mükafatı verilib. Bundan başqa, müsabiqədə dörd həvəsləndirici yerin sahiblərinin hər biri 300 manatlıq pul mükafatlı ilə təltif olunub.