SİYASƏT


İstanbulda keçirilən QDİƏT PM-in Baş Assambleyasının 49-cu sessiyası başa çatıb

İstanbul, 6 iyul, АZƏRTAC

İstanbulda keçirilən Qara Dəniz İqtisadi Əməkdaşlıq Təşkilatı (QDİƏT) Parlament Məclisinin Baş Assambleyasının 49-cu sessiyası, 56-cı Büro və 49-cu Daimi komitə iclasları işini başa çatdırıb.

Tədbirdə Azərbaycanı Milli Məclisin QDİƏT PM-dəki nümayəndə heyətinin rəhbəri Eldar Quliyev, QDİƏT PM-in sədr müavini Musa Quliyev, deputatlar Jalə Əliyeva və Əflatun Amaşov təmsil ediblər.

İyulun 6-da keçirilən iclasın üçüncü paneli “Mədəniyyət, təhsil və sosial məsələlər” mövzusuna həsr olunub. Bu paneldə, əvvəlcə QDİƏT PM-in sədr müavini Musa Quliyev “Qara Dəniz İqtisadi Əməkdaşlığına üzv ölkələrdə dayanıqlı səhiyyə sisteminin təmin olunmasında parlamentlərin rolu” mövzusunda məruzə edib.

Sonra QDİƏT PM-in sədr müavini Musa Quliyevin sədrliyi ilə keçirilən iclasda təşkilati məsələlərə baxılıb. İştirakçılar QDİƏT PM-nin sədrinə 6 müavin seçiblər.

İclasın dördüncü paneli Qara Dəniz İqtisadi Əməkdaşlıq Təşkilatı (QDİƏT) Parlament Məclisinə sədrliyin Türkiyə tərəfindən Ukraynaya keçməsinə həsr olunub. Beləliklə, Türkiyədən sonra Qara Dəniz İqtisadi Əməkdaşlıq Təşkilatı (QDİƏT) Parlament Məclisinə 6 ay ərzində Ukrayna sədrlik edəcək.

Sonra Türkiyə Böyük Millət Məclisinin sədri İsmayıl Qəhrəman və Ukrayna Ali Radasının sədri Andrey Parubinin çıxışları olub. Türkiyə və Ukraynanın parlament rəhbərləri çıxışlarında Qara dəniz regionunda iqtisadi inkişafa nail olmaq üçün təşkilata üzv ölkələrin ərazi bütövlüyünün qorunması və suverenliyinin toxunulmazlığı, sülh və sabitlik amillərinin qorunması məsələsinin vacibliyini ifadə ediblər. Tərəflər diqqətə çatdırıblar ki, terrorçulara, o cümlədən dövlətlərin ərazi bütövlüyünə qarşı fəaliyyət göstərən separatçı qüvvələrə istənilən formada dəstək vermək beynəlxalq hüquqa ziddir.

Qeyd edək ki, İstanbulda keçirilən QDİƏT Parlament Məclisinin Baş Assambleyasının 49-cu sessiyasının iyulun 5-də qəbul etdiyi bəyannamədə təşkilata üzv olan ölkələrin ərazi bütövlüyü və suverenliyi məsələsi iki maddədə əksini tapıb. Təşkilata üzv olan 12 ölkədən 10-u sənədin lehinə səs verib.

Bundan başqa, Azərbaycan nümayəndə heyəti Füzuli rayonunun Alxanlı kəndində erməni hərbiçilərin qətlə yetirdikləri 2 yaşlı azərbaycanlı Zəhranın qan içində olan fotosunu iclasda nümayiş etdirərək erməni deputatlardan “günahsız uşağı nə üçün qətlə yetirmişiniz” sualına təkidlə cavab istəyiblər. Erməni deputatların bu suala cavab verə bilmədikləri halda, sessiya iştirakçılarının diqqətinə çatdırılıb ki, mərhum Zəhra məhz azərbaycanlı olduğu üçün erməni hərbçilər tərəfindən vəhşicəsinə qətlə yetirilib.

Sabir Şahtaxtı

AZƏRTAC-ın xüsusi müxbiri

İstanbul

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.