Roma, 1 dekabr, AZƏRTAC

Romada, tarixi Ferrajoli sarayında İtaliya-Azərbaycan Əməkdaşlıq və Dostluq Cəmiyyətinin təqdimat mərasimi keçirilib.

Tədbirin aparıcısı, Azərbaycanı yaxından tanıyan təcrübəli italiyalı jurnalist Cianni Perrelli ölkəmizə səfəri ilə bağlı təəssüratlarını bölüşüb. Bildirib ki, Avropa ilə Asiya arasında körpü rolunu oynayan Azərbaycan önəmli strateji məkanda yerləşir. Zəngin tarixi və mədəni irsə malik belə bir ölkənin İtaliya ictimaiyyəti tərəfindən yaxından tanınması olduqca önəmlidir.

Mərasimdə çıxış edən cəmiyyətin həmsədri, tanınmış jurnalist Dündar Keşaplı İtaliya və Azərbaycan arasında mövcud dostluq münasibətlərindən bəhs edib. Vurğulayıb ki, qurumun əsas məqsədi bu ölkələr arasında turizm, mədəniyyət, təhsil, idman və digər sahələrdə əlaqələri gücləndirmək və münasibətlərin inkişafına töhfə verməkdir. O deyib: “Son illər sürətlə inkişaf edən Azərbaycan-İtaliya əlaqələrinin müxtəlif səviyyələrdə təbliği əsas məqsədimizdir. Cəmiyyət hər iki ölkədən olan idmançıları, jurnalistləri, incəsənət və iş adamlarını bir araya gətirərək xalqlarımız arasında əlaqələrin dərinləşməsinə xidmət edəcək”.

Azərbaycanın İtaliyadakı səfirliyinin müşaviri Vüqar Hacıyev çıxış edərək ölkəmiz ilə İtaliya arasındakı əlaqələrdən bəhs edib. Qeyd edib ki, belə bir qurumun təsis olunması iki ölkənin əməkdaşlığının davamlı inkişafından xəbər verir. “Yeni qurulan bu təşkilat xüsusilə idman və mədəniyyət sahələrində ölkələrimiz arasında əlaqələrin dərinləşməsinə xidmət edəcək. Biz bu cür təşəbbüsləri səfirlik olaraq dəstəkləyirik. Bu kimi qurumların sayının artması hər iki tərəfə qarşılıqlı fayda verəcək”, - deyə o bildirib.

Ölkəmizin müstəqilliyini bərpa etdikdən sonra keçdiyi inkişaf yolu haqqında məlumat verən diplomat Azərbaycanın Cənubi Qafqazda lider ölkəyə, beynəlxalq arenada etibarlı tərəfdaşa çevrildiyini bildirib.

Azərbaycanda multikultural ənənələrin kök saldığını deyən V.Hacıyev ölkəmizdə bütün dinlərin nümayəndələrinə bərabər hüquqların verildiyini diqqətə çatdırıb. Sülh içində birgəyaşayış və tolerantlıq Azərbaycanda tarixən formalaşmş ənənələrdir.

İtaliya-Azərbaycan Əməkdaşlıq və Dostluq Cəmiyyətinin Azərbaycan tərəfdən həmsədri Rəşad Qurbanov çıxış edərək ölkələrimizin bundan sonra da daha fəal əməkdaşlıq etmələri üçün qurumun səylə çalışacağını bildirib. Vurğulayıb ki, cəmiyyət italiyalıların Azərbaycanın idman və mədəni həyatı ilə yaxından tanış olmalarına şərait yaradacaq.

İtaliyanın incəsənət, idman, moda aləminin tanınmış simaları çıxış edərək qurumun fəaliyyətinə hər zaman dəstək olacaqlarını bildirib və təşkilatın iki ölkə arasında mədəni əlaqələrin daha da inkişaf etdirilməsinə töhfə verəcəyinə əminliklərini vurğulayıblar.

Tədbirdə dünya şöhrətli müğənni Albano Korrizinin, “Formula-1” yarışlarının sabiq pilotu Cankarlo Fisikellanın qurumun təsis edilməsi münasibətilə təbrik məktubları səsləndirilib.

Sonra qurumun fəaliyyətinə töhfə verənlərə xatirə hədiyyələri təqdim olunub.

Sonda Azərbaycan ilə bağlı videoçarxın nümayiş olunduğu tədbirdə iştirakçılar milli mətbəximizin nümunələrinə qonaq ediliblər.

Mərasimdə Romada akkreditə olunmuş diplomatik nümayəndəliklərin təmsilçiləri, İtaliyanın mədəniyyət, idman, moda sahələrində fəaliyyət göstərən məşhurlar, jurnalistlər, azərbaycanlı tələbələr və ölkəmizə maraq göstərən ictimaiyyətin nümayəndələri iştirak ediblər.

Maqsud Dadaşov

AZƏRTAC-ın xüsusi müxbiri

Roma