Bakı, 29 mart, AZƏRTAc

Parisdə İqtisadi Əməkdaşlıq və İnkişaf Təşkilatının (OECD) Şərqi Avropa və Mərkəzi Asiya üzrə Antikorrupsiya Şəbəkəsinin İstanbul Fəaliyyət Planının 15-ci Monitorinq Görüşü keçirilib.

Tədbirdə ölkəmizi Azərbaycan Respublikasının OECD təşkilatının Antikorrupsiya Şəbəkəsi üzrə milli əlaqələndiricisi, baş prokurorun müavini - Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyevin rəhbərliyi ilə nümayəndə heyəti təmsil edib.

Baş Prokurorluğun mətbuat xidmətindən AZƏRTAC-a bildiriblər ki, monitorinq görüşündə OECD təşkilatı çərçivəsində Antikorrupsiya Şəbəkəsinə üzv olan bir sira dövlətlərin III raund qiymətləndirilməsinə dair hesabatların məruzəsi, ölkəmizin dövrü hesabatının dinlənilməsi, habelə Antikorrupsiya Şəbəkəsinin IV raund üzrə yeni proqramının müzakirəsi həyata keçirilib.

Tədbirdə çıxış edən K.Əliyev Azərbaycan Respublikasının Prezidenti İlham Əliyevin siyasi iradəsinə uyğun olaraq, ölkəmizdə korrupsiyaya qarşı mübarizə sahəsində aparılan genişmiqyaslı tədbirlər, o cümlədən OECD təşkilatının Şərqi Avropa və Mərkəzi Asiya üzrə Antikorrupsiya Şəbəkəsinin İstanbul Fəaliyyət Planı çərçivəsində görülmüş işlər barədə ətraflı məlumat verib. Eyni zamanda, Azərbaycan tərəfi təşkilatın Antikorrupsiya Şəbəkəsinin IV raund üzrə yeni proqramının müzakirəsində fəal iştirak edərək ölkəmiz üçün zəruri olan bir sıra məsələlərin proqramın layihəsinə daxil edilməsinə nail olub.

Həmin məsələlər ətrafında aparılan müzakirələrdə görüş iştirakçıları tərəfindən Azərbaycan Respublikasının brendi hesab edilən “ASAN xidmət” mərkəzləri korrupsiyaya qarşı mübarizə sahəsində ən uğurlu layihələrdən biri kimi dəyərləndirilib.

Bundan başqa, 2014-cü ilin noyabrında Beynəlxalq Antikorrupsiya Akademiyasına üzv və iştirakçı ölkələrin Assambleyasının Bakıda keçirilmiş 3-cü sessiyasında Azərbaycan Respublikasının baş prokuroru Zakir Qaralov ilə Avropa Komissiyasının Dələduzluqla Mübarizə üzrə Avropa Bürosunun (OLAF) və Korrupsiyaya Qarşı Avropa Tərəfdaşları (EPAC) şəbəkəsinin rəhbəri Covanni Kessler arasında aparılan danışıqların nəticəsində əldə edilmiş razılığın davamı olaraq Brüsseldə Azərbaycan nümayəndə heyətinin həmin təşkilatların rəhbərliyi ilə görüşü baş tutub.

Görüşdə Baş Prokuror yanında Korrupsiyaya Qarşı Mübarizə Baş İdarəsinin EPAC şəbəkəsinə qoşulmasına dair baş prokuror Zakir Qaralovun müvafiq məktubu təşkilatın rəhbərliyinə təqdim edilib.

Covanni Kessler Azərbaycan Respublikasının Baş Prokuroru yanında Korrupsiyaya Qarşı Mübarizə Baş İdarəsinin nümayəndələrinin cari ilin sonunda keçiriləcək şəbəkənin illik iclasına dəvət olunmasını qeyd edib və Baş İdarənin şəbəkəyə tamhüquqlu üzv seçilməsinə ümidvar olduğunu bildirib.

Görüşdə, həmçinin Baş Prokuror yanında Korrupsiyaya Qarşı Mübarizə Baş İdarəsinin OLAF təşkilatı ilə əməkdaşlıq perspektivləri və digər zəruri məsələlər də müzakirə edilib.