CƏMİYYƏT
Müdafiə Sənayesi Nazirliyinin tabeli müəssisələrində ilin doqquz ayının yekunları müzakirə edilib
Müdafiə Sənayesi Nazirliyinin (MSN) tabeli müəssisələrində cari ilin doqquz ayının yekunlarına həsr edilmiş səyyar kollegiya iclasları keçirilib.
Nazir Yavər Camalovun sədrliyi ilə keçirilən iclaslarda MSN-in birlik və müəssisələrinin istehsal, maliyyə-təsərrüfat fəaliyyətlərinin yekunları və qarşıda duran məsələlər geniş müzakirə olunub. Bildirilib ki, aparılan məqsədyönlü işlər nəticəsində nazirliyin müəssisələrində müvafiq proqramlar əsasında müdafiə təyinatlı məmulatların hazırlanması və istehsalı üçün yeni istehsal sahələrinin yaradılması işləri davam etdirilib.
MSN-in mətbuat xidmətindən AZƏRTAC-a bildiriblər ki, hesabat dövründə cari il üçün nəzərdə tutulan tədbirlərin icrası davam etdirilib, respublikanın güc strukturlarının sifarişləri üzrə bağlanmış müqavilələr əsasında müdafiə təyinatlı məmulatlar istehsal edilərək sifarişçilərə təhvil verilib. Eyni zamanda, mülki məmulatların istehsalının genişləndirilməsi üzrə işlər davam etdirilib.
Cari ilin doqquz ayında nazirliyin müəssisələrində istehsal olunmuş məhsulların ümumi həcminin 86 faizini müdafiə və xüsusi təyinatlı, 14 faizini isə mülki təyinatlı məhsullar təşkil edib. İl ərzində təhvil verilmiş müdafiə təyinatlı məmulatların çeşidlərinin sayı 1,3 dəfə artıb.
Bu ilin Yaradılma Proqramına uyğun olaraq, nazirliyin müəssisələri tərəfindən 66 mövzunu və 169 mərhələni əhatə edən elmi-tədqiqat və təcrübi konstruktor işləri aparılır. Nazirliyin Elmi-Tədqiqat İnstitutunda cari ildə dövlət sifarişi ilə 10 mövzu üzrə elmi-tədqiqat və təcrübi konstruktor işləri davam etdirilib. MSN-də fəaliyyət göstərən Elmi-Texniki Şuranın müvafiq bölmələrinin üç iclası keçirilib, iş planına daxil olunmuş müxtəlif səpkidə mövzular üzrə müzakirələr aparılıb, konkret təklif və rəylər qəbul edilib.
Hesabat dövründə nazirliyin qarşısında qoyulmuş tapşırıqların vaxtında təmin olunması üçün dünyanın inkişaf etmiş dövlətlərinin hərbi sənaye kompleksinə daxil olan şirkət və qurumları ilə hərbi-texniki sahədə əməkdaşlıq davam etdirilib.
Kollegiyada qeyd olunub ki, 2009-cu ildən etibarən nazirliyin müəssisələrində yaradılan və istehsal olunan məmulatlar mütəmadi olaraq beynəlxalq sərgilərdə nümayiş etdirilir.
Bildirilib ki, MSN-in təşəbbüsü və təşkilatçılığı ilə cari il sentyabrın 11-dən 13-dək Bakı Sərgi Mərkəzində “ADEX-2014” birinci Azərbaycan Beynəlxalq Müdafiə Sənayesi sərgisi keçirilib. Sərgidə Türkiyə, ABŞ, Fransa, Polşa, İsrail, Belarus, Rusiya, Cənubi Afrika və s. daxil olmaqla dünyanın 34 ölkəsindən 200 şirkət və 22 rəsmi nümayəndə heyəti iştirak edib. Sərgidə Azərbaycan, Türkiyə, Rusiya, Belarus, Koreya Respublikası, Polşa, İsrail və Ukraynanın səkkiz milli qrupu öz ekspozisiyalarını nümayiş etdiriblər. Ekspozisiya meydançasının min kvadratmetrlik sahəsini əhatə edən Milli Pavilyonda Azərbaycan müdafiə sənayesinin yenilikləri nümayiş olunub.
Diqqətə çatdırılıb ki, 2009-cu ildə ilk qatıldığı beynəlxalq sərgidə 27 adda müdafiə təyinatlı məmulatla təmsil olunan Müdafiə Sənayesi Nazirliyi “ADEX-2014” sərgisində 168 adda məmulat nümayiş etdirib. Sərgidə nazirliyin nümayiş etdirdiyi məmulatlar yerli və xarici nümayəndə heyətləri tərəfindən böyük maraqla qarşılanıb.
Sərgi çərçivəsində hərbi-texniki əməkdaşlığın müxtəlif istiqamətləri üzrə danışıqlar aparılıb və bir sıra yeni layihələrin reallaşdırılması məsələləri müzakirə olunub.
Azərbaycan Prezidenti, Ali Baş Komandan İlham Əliyevin, digər dövlət və hökumət nümayəndələrinin “ADEX-2014” sərgisini ziyarət etməsi onun əhəmiyyətini daha da artırıb.
Sərginin yüksək səviyyədə keçirilməsi və MSN-in müəssisələrində istehsal olunan müdafiə təyinatlı məmulatların nümayişi ölkənin müdafiə qüdrətinin gündən-günə möhkəmlənməsinə və Azərbaycan Silahlı Qüvvələrinin regionda qüdrətli ordulardan birinə çevrilməsinə xidmət edir.
İclaslarda birlik və müəssisə rəhbərlərinin hesabatları dinlənilib.
Kollegiya iclaslarında nazir Yavər Camalov hesabat dövründə tabeli birlik və müəssisələr tərəfindən görülmüş işləri müsbət qiymətləndirib.
Nazir Azərbaycan Prezidenti İlham Əliyev tərəfindən ölkənin müdafiə sənayesinin inkişafı ilə bağlı verilən tapşırıqların yerinə yetirilməsi istiqamətində struktur bölmə, birlik və müəssisə rəhbərlərinə göstərişlər verib.