Bakı, 8 oktyabr, AZƏRTAC

Azərbaycan Respublikasının insan hüquqları üzrə müvəkkili Elmira Süleymanova Pakistanın ölkəmizdəki səfiri Xalid Usman Qayser ilə görüşüb.

Ombudsman Aparatından AZƏRTAC-a bildiriblər ki, gələcək əməkdaşlığın perspektivləri müzakirə olunan görüşdə səfir ölkələrimiz arasındakı dostluq və tərəfdaşlıq münasibətlərini qeyd edib. O, Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə Pakistan məktəblərinə humanitar yardımlar göstərildiyini, xüsusi qayğıya ehtiyacı olan uşaqların təhsilinə və sağlamlığına yönəlmiş layihələr həyata keçirildiyini, İslam dünyasının müqəddəs bayramları ilə bağlı mömin əhali üçün iftar süfrələri açıldığını, bu nəcib əməllərdən minlərlə insanın faydalandığını, bütün bunların iki ölkə arasında münasibətlərin inkişafında mühüm rol oynadığını diqqətə çatdırıb.

E.Süleymanova 1995-ci ildə keçirilmiş Pekin Konfransının qərarlarının qadınların, həmçinin qız uşaqlarının hüquqlarının müdafiəsi və təmini baxımından mühüm əhəmiyyət daşıdığını, hələ Azərbaycan Qadın və İnkişaf Mərkəzinin prezidenti olarkən bu dost ölkənin qadın təşkilatları ilə sıx əməkdaşlıq əlaqələri yaradıldığını və təcrübə mübadiləsi aparıldığını qeyd edib, müxtəlif illərdə Pakistanın Kəraçi, Lahor və digər şəhərlərində keçirilmiş beynəlxalq tədbirlərdə iştirak etdiyini söyləyib.

Görüşdə E.Süleymanova Ombudsman təsisatının əhalinin müxtəlif təbəqələrinin, o cümlədən həssas qruplarının, xüsusilə də əlilliyi olan şəxslərin, uşaqların və qadınların hüquqlarının müdafiəsi və təşviqi sahəsində gördüyü işlər, işgəncələrin qarşısının alınması üzrə milli preventiv mexanizm qismində fəaliyyəti, müvəkkilin təşəbbüsü ilə hər il Bakıda və ölkənin müxtəlif regionlarında müvafiq dövlət qurumlarının, vətəndaş cəmiyyəti institutlarının və beynəlxalq təşkilatların iştirakı ilə geniş miqyaslı maarifləndirmə tədbirlərinin keçirilməsi barədə məlumat verib. Müvəkkil ənənəvi olaraq hər il ombudsmanların Bakı beynəlxalq konfranslarının təşkil olunduğunu, bu mötəbər toplantıların müxtəlif ölkələrin insan hüquqları sahəsindəki fəaliyyətini öyrənmək, müsbət təcrübələrinə dair məlumatları bölüşmək baxımından böyük əhəmiyyətə malik olduğunu vurğulayıb. O, bu il keçiriləcək, sayca 13-cü olacaq konfransın “Konstitusion hüquqların təminində milli insan hüquqları təsisatlarının rolu” mövzusuna həsr ediləcəyini, həmin beynəlxalq tədbirdə Pakistan ombudsmanının və onun nümayəndələrinin iştirakından məmnun olacağını söyləyib.

Səfir Xalid Usman Qayser Ombudsman təsisatı ilə insan hüquqları sahəsində əməkdaşlıqda maraqlı olduğunu və bu istiqamətdə gələcəkdə də səylərini əsirgəməyəcəyini bildirib.