SİYASƏT


Parlamentin yaz sessiyasının son plenar iclası keçirilib

Bakı, 31 may, AZƏRTAC

Mayın 31-də Milli Məclisin 2017-ci il yaz sessiyasının sonuncu iclası keçirilib.

AZƏRTAC xəbər verir ki, iclası parlamentin sədri Oqtay Əsədov açıb.

Gündəliyin təsdiqindən sonra müzakirələr başlanılıb. Əvvəlcə əmək və sosial siyasət komitəsinin sədri Hadi Rəcəbli Əmək Məcəlləsində dəyişikliklər edilməsi haqqında qanun layihəsi barədə məlumat verib. O, bildirib ki, yeni layihəyə görə işçilərin sayı azaldıqda və ya ştatları ixtisar olunduqda işəgötürən əmək müqaviləsinin ləğvi barədə xəbərdarlıq edərkən onların əmək stajını nəzərə alacaq. İşçinin bir ilədək əmək staji olduqda ona ixtisar və ştatının ləğv olunacağı barədə xəbərdarlıq müqavilə ləğv edilməzdən azı iki təqvim həftəsi əvvəl, stajı bir ildən beş ilədək olduqda azı dörd təqvim həftəsi əvvəl, stajı bir ildən on ilədək olduqda azı 6 təqvim həftəsi əvvəl, stajı on ildən çox olduqda azı doqquz təqvim həftəsi əvvəl edilməlidir. İşdən çıxarma müavinətləri ödənilərkən işçinin stajı nəzərə alınacaq. İşçinin bir ilədək əmək stajı olduqda ona orta aylıq əmək haqqı miqdarında, bir ildən beş ilədək stajı olduqda orta aylıq əmək haqqının azı 1,4 misli miqdarında, beş ildən on ilədək stajı olduqda 1,7 misli miqdarında, on ildən çox stajı olduqda azı iki misli miqdarında müavinət ödəniləcək. Qanun layihəsi səsə qoyularaq qəbul edilib.

Sonra iqtisadi siyasət, sənaye və sahibkarlıq komitəsinin sədri Ziyad Səmədzadə “Azərbaycan Respublikasının 2016-cı il dövlət büdcəsinin icrası haqqında” qanun layihəsi barədə məlumatı təqdim edib. O, qeyd edib ki, 2016-cı il Azərbaycan tarixində islahatlar ili kimi yadda qalıb. Dünya ölkələri arasında toqquşmaların, ziddiyyətlərin artmasına baxmayaraq, ölkəmiz daxili stabillik nümayiş etdirib. Bunun nəticəsidir ki, Azərbaycan iqtisadiyyatı öz inkişafını davam etdirir. Vurğulanıb ki, sənəd və hesabat “Büdcə sistemi haqqında” Qanuna uyğun olaraq hazırlanıb. Hesabat 2016-cı il dövlət büdcəsində nəzərdə tutulan xərclərin icra vəziyyəti ilə bağlı göstəricilərlə yanaşı, dövlət borcları və ona xidmət, Azərbaycan Prezidentinin ehtiyat fondunun, dövlət büdcəsinin ehtiyat fondunun vəsaitindən istifadə haqqında və digər zəruri məlumatları özündə əks etdirir. Ziyad Səmədzadə bildirib ki, qlobal mühitdəki proseslərə cavab olaraq Prezident İlham Əliyevin Azərbaycan iqtisadiyyatının inkişaf perspektivləri üzrə təsdiq etdiyi Strateji Yol Xəritəsinin icrası istiqamətində atılan çevik addımlar, həyata keçirilən qabaqlayıcı və tənzimləyici tədbirlər dünya iqtisadiyyatında baş vermiş proseslərin ölkə iqtisadiyyatında yarana biləcək mənfi təsirlərini neytrallaşdırmağa imkan verib. Büdcə gəlirlərinin artıqlaması ilə yerinə yetirilməsi hesabına 2017-ci il 1 yanvar tarixinə 2 307 milyon manat həcmində sərbəst xəzinə qalığı yaranıb. ÜDM-də gəlirlərin xüsusi çəkisi yüksək qalıb və keçən il bu göstərici 29 faiz təşkil edib. Qeyri-neft sektorundan daxilolmaların büdcə gəlirlərində payı 47,3 faizə çatıb ki, bu da 2015-ci illə müqayisədə 5,7 faiz çoxdur. 2016-cı ildə dövlət büdcəsinin xərcləri 18495,0 milyon manat proqnoza qarşı 17751,3 milyon manat və ya 96 faiz icra edilib ki, bu da 2015-ci illə müqayisədə 33,2 milyon manat azdır. 2016-cı ildə dövlət büdcəsinin kəsiri 245604,1 min manat təşkil edib. Təqdim olunmuş hesabat və məlumatlarda dövlət büdcəsi kəsirinin maliyyələşdirilməsi mənbələri üzrə özəlləşdirmədən daxilolmalar 31231,6 min manat, xarici qrantlar 12325,5 min manat, daxili və xarici borclanmadan daxilolmalar isə 186818,5 min manat təşkil edib.

Sonra iclasda Hesablama Palatasının sədri Vüqar Gülməmmədov 2016-cı ilin dövlət büdcəsinin icrası ilə bağlı rəhbərlik etdiyi qurumun rəyini təqdim edib. O, bildirib ki, 2016-cı ildə dövlət büdcəsinin gəlirləri 104,1 faiz icra edilib. 2015-ci illə müqayisədə ümumilikdə qlobal makroiqtisadi tərəddüdlər fonunda büdcə gəlirlərində azalmanın olmaması, hətta artım müşahidə edilməsi aparılan islahatların təzahürü kimi qiymətləndirilməlidir.

Vüqar Gülməmmədov hesabat ilində dövlət büdcəsinin xərcləri ilə bağlı əsas meyilləri diqqətə çatdıraraq 2016-cı ildə dövlət büdcəsinin xərclərinin 17751,3 milyon manat təşkil etməklə, 96 faiz icra edildiyini bildirib. O, proqnozlaşdırılmış məbləğlə müqayisədə icra edilməmiş büdcə xərclərinin 743,7 milyon manat təşkil etdiyini, həmin məbləğin 42,7 faizinin əsaslı xərclərin üstünlük təşkil etdiyi “Sənaye, tikinti və faydalı qazıntılar” bölməsinin, 14,2 faizinin isə “Ümumi dövlət xidmətləri” bölməsinin payına düşdüyünü diqqətə çatdırıb. Qeyd olunub ki, il ərzində dövlət büdcəsinin icrası prosesində plan göstəricilərinin funksional təsnifatında bir sıra dəyişikliklər aparılıb. Bu dəyişikliklər əsasən Azərbaycan Respublikası Nazirlər Kabinetinin bəzi sərəncamlarının icrası ilə bağlı olub.

Sonra Milli Məclisin deputatları qanun layihəsi ilə bağlı fikirlərini bildiriblər, sənədin qanunvericiliyə uyğun hazırlandığı qeyd edilib.

Sonra iclasda iştirak edən maliyyə naziri Samir Şərifov çıxış edərək bildirib ki, hazırda ölkədə neftdən asılılığın aradan qaldırılması istiqamətində mühüm tədbirlər görülür. Yeni fiskal qaydalar hazırlanmaqdadır. 2018-ci ilin dövlət büdcəsinin hazırlanmasına başlanılıb. O, qeyd edib ki, dövlət müəssisələrinin dividendləri ilə bağlı proqnoz göstəriciləri dəyişə bilər. İcra olunmayan dividendlər maliyyə sektorunda fəaliyyət göstərən qurumlar tərəfindən həyata keçirilir. Ötən il bank sektoru üçün ağır il olub. Buna görə də dividendlərin ödənilməsində problemlər var. Səhiyyə sahəsində bəzi tədbirlərin görülməsi ilə bağlı qərar verilib. İcbari tibbi sığorta ilə bağlı olan pilot layihə Mingəçevir və Yevlax rayonlarında uğurla həyata keçirilməkdədir.

Sonra nazir sənədlə bağlı deputatları maraqlandıran bəzi məqamlara aydınlıq gətirib. Qanun layihəsi səsvermə yolu ilə təsdiqlənib.

Regional məsələlər komitəsinin sədri Arif Rəhimzadə “Bələdiyyə üzvlərinin etik davranış qaydaları haqqında” qanun layihəsi barədə məlumatı təqdim edib. Bildirilib ki, qanun layihəsi bələdiyyə üzvləri üçün etik davranış qaydalarını, prinsiplərini və onlara əməl edilməsi ilə bağlı hüquqi mexanizmləri müəyyən edir. Qanunun məqsədi yerli özünüidarə orqanlarının və bələdiyyə üzvlərinin nüfuzunun artırılması, vətəndaşların yerli özünüidarə orqanlarına və bələdiyyə üzvlərinə etimadının yüksəldilməsi, onların fəaliyyətində səmərəliliyin və şəffaflığın artırılması, bu sahədə korrupsiyanın və maraqların toqquşmasının qarşısının alınması, bu orqanların fəaliyyətinin qiymətləndirilməsi zamanı vətəndaşların təsir imkanlarının genişləndirilməsindən ibarətdir. Diqqətə çatdırılıb ki, etik davranış qaydalarına əməl olunmasına bələdiyyə sədri nəzarət edir. Qanuna görə, etik davranış qaydalarını pozmuş bələdiyyə üzvü intizam məsuliyyətinə cəlb edilir. İntizam məsuliyyəti bələdiyyə iclasının qərarı əsasında xəbərdarlıq və töhmət şəklində tətbiq edilir.

Sənəd səsə qoyularaq üçüncü oxunuşda qəbul edilib.

Milli Məclis sədrinin birinci müavini, müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov “Cinayət fəaliyyətindən əldə edilən gəlirlərin leqallaşdırılmasına, axtarışına, həbsinə, müsadirəsinə və terrorçuluğun maliyyələşdirilməsinə dair” Avropa Şurası Konvensiyasının təsdiq edilməsi haqqında qanun layihəsi barədə məlumat verib. Bildirilib ki, 2005-ci il 16 may tarixdə Varşavada imzalanmış bu sənədə Azərbaycan müvafiq qeyd-şərt və bəyanatlarla qoşulur. Sənəd səsvermə yolu təsdiqlənib.

Sonra İqtisadi siyasət, sənaye və sahibkarlıq komitəsinin sədri Ziyad Səmədzadə “Azərbaycan Respublikası Hökuməti ilə Danimarka Krallığı Hökuməti arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında” Konvensiyanın təsdiq edilməsi barədə, həmçinin, “Azərbaycan Respublikası Hökuməti və Qətər Dövləti Hökuməti arasında hava daşımalarına dair Sazişə dəyişikliklər edilməsi barədə” Protokolun təsdiq edilməsi haqqında qanun layihələri barədə məlumatı təqdim edib. Hər iki sənəd ayrı-ayrılıqda səsə qoyularaq qəbul olunub.

Deputatlar “Müdafiə tədbirlərinin həyata keçirilməsi ilə bağlı xərclərin ödənilməsi məsələləri üzrə Cinayət mühakimə icraatı iştirakçılarının müdafiəsi haqqında 28 noyabr 2006-cı il tarixli Sazişin həyata keçirilməsinə dair” Protokolun təsdiq edilməsi haqqında qanun layihəsini təsdiqləyiblər.

Sonra iclasda “Sağlamlıq imkanları məhdud şəxslərin təhsili (xüsusi təhsil) haqqında” Qanunda dəyişiklik edilməsi barədə qanun layihəsinə baxılıb. Sənəddəki uyğunlaşdırıcı texniki dəyişiklik təsdiq olunub.

Gündəlikdəki növbəti 11 məsələ barədə məlumat verən komitə sədri Əli Hüseynli bu sənədlərə edilən dəyişikliklərin ötən il “Dövlət qulluğu haqqında” qanunun 28-ci maddəsinə (“Dövlət qulluğuna qəbul” bölməsi) edilmiş əlavə ilə bağlı olduğunu vurğulayıb. Sonra “Diplomatik xidmət haqqında”, “Dövlət qulluğu haqqında”, “Ədliyyə orqanlarında qulluq keçmə haqqında”, “Dövlət qulluqçularının etik davranış qaydaları haqqında”, “Ölçmələrin vəhdəti haqqında” qanun layihələrində, “Azərbaycan Respublikasının daxili işlər orqanlarında xidmət keçmə haqqında”, “Fövqəladə hallar orqanlarında xidmətkeçmə haqqında”, “Gömrük orqanlarında xidmət haqqında”, “Miqrasiya orqanlarında xidmətkeçmə haqqında”, “Vergi orqanlarında xidmət haqqında” Əsasnamələrdə edilən dəyişikliklərlə bağlı sənədlər ayrı-ayrılıqda səsə qoyularaq qəbul edilib.

“Haqsız rəqabət haqqında”, “Müəllif hüququ və əlaqəli hüquqlar haqqında” qanunlara dəyişiklik edilməsi barədə sənədlərin mahiyyətcə “Reklam haqqında” qanuna uyğunlaşdırma məqsədi daşıdığı bildirilib. Hər iki sənəd səsə qoyularaq qəbul edilib.

Səhiyyə komitəsinin sədri Əhliman Əmiraslanov “Əhalinin sağlamlığının qorunması haqqında” Qanunda dəyişikliklər edilməsi barədə sənədlə bağlı məlumat verib. Bildirilib ki, sənədin 11-ci və 50-ci maddələrinə “hamiləliyin süni yolla pozulması və süni mayalanma üzrə tibbi xidmətin reklamının qadağan olunması” ilə bağlı müvafiq dəyişikliklər edilib. Sənəd səsə qoyularaq təsdiqlənib.

Ailə, qadın və uşaq məsələləri komitəsinin sədri Aqiyə Naxçıvanlı “Uşaq hüquqları haqqında” Qanuna edilən dəyişikliklərin də “Reklam haqqında” qanuna uyğunlaşdırma məqsədi ilə edildiyini bildirib. Bu sənəddə təsdiq edilib.

Aqrar siyasət komitəsinin sədr müavini Eldar Quliyev “Üzümçülük və şərabçılıq haqqında” Qanunda edilən dəyişikliklə bağlı məlumat verib. Qeyd edilib ki, “Reklam haqqında” Qanuna uyğunlaşdırmaq məqsədi ilə qanuna yeni maddənin əlavə edilməsi nəzərdə tutulur. Tündlüyü 5 faizdən yuxarı olan şərabçılıq məhsullarının reklamı telekommunikasiya qurğularında, dövri mətbu nəşrin üz və arxa qabığında, internet informasiya ehtiyatlarının ön səhifəsində, yetkinlik yaşına çatmayanlar üçün nəzərdə tutulmuş mətbu nəşrlərdə, audio və video materiallarda, nəqliyyat vasitələrinin üzərində, habelə onların fəaliyyətini təmin edən binaların, qurğuların üzərində və daxilində yerləşdirilə bilməz. Şərabçılıq məhsullarının nümunələrinin paylanılması və dequstasiyası ilə müşayiət olunan reklam aksiyalarının keçirilməsinə yalnız onların pərakəndə satış yerlərində, ixtisaslaşmış sərgilərin dequstasiya zallarında icazə verilir.

Sənəd səsvermə yolu ilə qəbul edilib.

Sonra regional məsələlər komitəsinin sədri Arif Rəhimzadə “Yerli (bələdiyyə) vergilər və ödənişlər haqqında” Qanuna dəyişiklik barədə məlumat verib. O, diqqətə çatdırıb ki, təklif olunan dəyişikliyin əsas mahiyyəti ondan ibarətdir ki, 9.1.1-ci maddədə “küçə” sözü “açıq məkanda” ifadəsi ilə əvəz edilir. Qeyd edilib ki, dəyişiklik “Reklam haqqında” Qanuna uyğunlaşdırmaq məqsədi ilə təklif edilir. Sənəd səsə qoyularaq qəbul edilib.

Mədəniyyət komitəsinin sədri Rafael Hüseynov “Telekommunikasiya haqqında” Qanuna dəyişiklik edilməsi barədə məlumatında deyib ki, sənədə “Reklam haqqında” Qanuna uyğunlaşdırma məqsədilə “telekommunikasiya vasitələri və qurğuları ilə yayımlanan reklam” başlıqlı yeni 50-1 maddə əlavə edilir. Texniki dəyişiklik səsə qoyularaq təsdiq edilib.

Aqrar siyasət komitəsinin sədr müavini Eldar Quliyev Torpaq Məcəlləsində dəyişikliklər edilməsi haqqında qanun layihəsini təqdim edib. Sənədin növbəti iclasda müzakirə edilməsi məqsədəuyğun sayılıb.

Sonra iqtisadi siyasət, sənaye və sahibkarlıq komitəsinin sədri Ziyad Səmədzadə Vergi Məcəlləsinə dəyişiklik edilməsi haqqında sənədi şərh edib. Bildirilib ki, qanun layihəsi “Vergi ödəyicilərinin 2017-ci ilin 1 yanvar tarixinə mövcud olan vergi borclarının tənzimlənməsi haqqında” Qanunun tətbiqi ilə bağlı hazırlanıb. Gündəlikdəki “İcra haqqında” Qanuna dəyişiklik edilməsi barədə sənədin 20-ci maddəsinə düzəliş edilməsi də məhz bununla bağlı idi. Deputatlar hər iki sənədə edilən dəyişiklikləri razılıqla qarşılayıblar.

Sonra Ziyad Səmədzadə gündəlikdəki növbəti - “Sosial təminatı və müdafiəni həyata keçirən müvafiq icra hakimiyyəti orqanının 2017-ci il büdcəsi haqqında” 2016-cı il 16 dekabr tarixli 449-VQ nömrəli qanunun tətbiqi ilə əlaqədar bəzi qanunlarda dəyişikliklər edilməsi ilə bağlı məsələ ilə əlaqədar fikirlərini bildirib. Qeyd olunub ki, qanun layihəsinə edilən dəyişiklik 4 sənədi - “İcarə haqqında”, “Sahibkarlıq fəaliyyəti haqqında, “Veteranlar haqqında, “Azərbaycan vətəndaşlarının pul gəlirlərinin və əmanətlərinin indeksləşdirilməsi haqqında” qanunları əhatə edir. Sənədlərdəki “Dövlət Sosial Müdafiə Fondu” sözləri, “müvafiq icra hakimiyyəti orqanına” sözləri ilə əvəzlənir. Qanun layihəsi səsvermə yolu ilə təsdiqlənib.

Komitə sədri Əli Hüseynli Cəzaların İcrası Məcəlləsində dəyişiklik edilməsi haqqında qanun layihəsini barədə məlumat verib. Bildirilib ki, sənədə edilən dəyişikliklər əmək fəaliyyəti ilə məşğul olan məhkumların qazancından məcburi dövlət sosial siğorta haqqının tutulması prinsipini özündə ehtiva edir. Sənəd səsə qoyularaq qəbul edilib.

Daha sonra “Azərbaycan Respublikasının vətəndaşlığı haqqında” sənəd təqdim edilib. Bildirilib ki, buradakı dəyişikliklər Azərbaycan Respublikası vətəndaşlığına qəbul və vətəndaşlıqdan çıxma ilə bağlı rüsumların bundan sonra “Dövlət rüsumu haqqında” qanunun tələblərinə uyğun olaraq tənzimlənəcəyini ehtiva edir. Sənəd qəbul edilib.

İclasda “Dövlət qulluğu haqqında” Qanunda dəyişiklik edilməsi barədə qanun layihəsi nəzərdən keçirilib. Bildirilib ki, sənədin 2-ci maddəsinə “səfərbərlik və hərbi xidmətə çağırış üzrə dövlət xidməti” sözləri əlavə edilir ki, bu da dövlət qulluğu növü siyahısına Səfərbərlik və Hərbi Xidmətə Çağırış üzrə Dövlət Xidmətinin adının salınmasını nəzərdə tutur. Sənəd səsə qoyularaq təsdiqlənib.

Daha sonra Cinayət Məcəlləsində təklif edilən dəyişikliklər barədə məlumat verilib. Qeyd olunub ki, dəyişikliklərdə İnzibati Xətalar Məcəlləsinin təsdiq edilmiş müvafiq bəndlərinin icrasına uyğunlaşdırmaq məqsədilə Cinayət Məcəlləsinin 17 fəslində cərimələrin artırılması nəzərdə tutulur. Müzakirələrdən sonra sənəd səsə qoyularaq qəbul edilib.

İclasda “Publik hüquqi şəxslər haqqında” Qanuna təklif olunan dəyişikliklər barədə məlumat verilib. Diqqətə çatdırılıb ki, dövlətimizin başçısının qanunvericilik təşəbbüsü qaydasında sənədin 3.4 və 6.4 maddələrinə əlavələr edilir. Belə ki, publik hüquqi şəxslər qanunun tələblərinə uyğun şəkildə hüquqi xidmət göstərirlərsə, “Dövlət rüsumu haqqında” Qanunda nəzərdə tutulmuş qaydada və məbləğdə dövlət rüsumu tuta bilərlər. Onların fəaliyyəti Qanunun tələbləri ilə tam uyğunlaşırsa, “Publik hüquqi şəxslərin nizamnaməsi”nə əsasən həmin əməkdaşlar dövlət qulluqçusu statusuna bərabər tutulurlar. Sənəd səsə qoyularaq təsdiq edilib.

İclasda “Bələdiyyələrin maliyyəsinin əsasları haqqında” qanuna təklif edilən dəyişikliklər də səsə qoyularaq təsdiqlənib.

Sonda “Əhalinin sağlamlığının qorunması haqqında” Qanunun 53-cü maddəsinə edilən “həqiqi hərbi xidmətə çağırılma və səfərbərliklə bağlı” dəyişikliklər də qəbul olunub.

Milli Məclisin sədri Oqtay Əsədov 84 deputatın müraciəti əsasında parlamentin növbədənkənar sessiyasının çağırılacağını söyləyib və Milli Məclisin yas sessiyasını bağlı elan edib.

Azərbaycanın dövlət himni səsləndirilib və Milli Məclisin 2017-ci il yaz sessiyası öz işini başa çatdırıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.