Naxçıvan, 12 oktyabr, Rauf Əliyev, AZƏRTAC

Xəbər verdiyimiz kimi, Portuqaliya Respublikasının ölkəmizdəki nümayəndəliyinin müvəqqəti işlər vəkili Mariya Joao Lopes Kardoso oktyabrın 10-da Naxçıvan Muxtar Respublikasına səfərə gəlib. İki gün davam edən səfər çərçivəsində diplomat Naxçıvan şəhərindəki təhsil, mədəniyyət, istehsal, səhiyyə müəssisələri, tarixi abidələrlə yaxından tanış olub.

AZƏRTAC xəbər verir ki, Mariya Joao Lopes Kardoso əvvəlcə ulu öndər Heydər Əliyevin Naxçıvan şəhərinin baş meydanında əzəmətlə ucalan abidəsini və Heydər Əliyev Muzeyini ziyarət edib.

Mariya Joao Lopes Kardoso Naxçıvan Dövlət Universitetində də olub. Xanım diplomat Media Mərkəzində yaradılan rəqəmsal multimedia infrastrukturu, universitet televiziyası, “Nuhçıxan” radiosu və mətbuat şöbəsinin fəaliyyəti ilə maraqlanıb, Naxçıvan Dövlət Universitetinin televiziyasına müsahibə verib.

Portuqaliyalı diplomat “Naxçıvanqala” Tarix-Memarlıq, “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey kompleksləri ilə də tanış olub.

Sonra müvəqqəti işlər vəkili Duzdağ Fizioterapiya Mərkəzinə gəlib. Bildirilib ki, dağın altına doğru 300 metr uzanan mərkəzdə yüksək səviyyəli xidmət şəraiti yaradılıb. Son illərdə ölkəmizin müxtəlif regionlarından, habelə dünyanın bir çox yerlərindən bronxial-astma xəstələri buraya gələrək müalicə alırlar. Müalicə olunanlar və onları müşayiət edənlər üçün mərkəzdə nümunəvi xidmətlər təşkil edilib.

Naxçıvan Biznes Mərkəzində qonağa mərkəzin fəaliyyəti və muxtar respublikanın sosial-iqtisadi inkişaf göstəriciləri barədə ətraflı məlumat verilib.

“Gəmiqаyа Dаş Məhsullаrı Sənаyе Kоmplеksi” Məhdud Məsuliyyətli Cəmiyyəti ilə tanışlıq zamanı qeyd olunub ki, burada istehsal edilən yüksəkkeyfiyyətli məhsulların xarici bazarlara çıxarılması diqqət mərkəzində saxlanılır. Bu məqsədlə Bakı şəhərində və xarici ölkələrdə keçirilən biznes forumlarda müəssisə nümayəndəsinin iştirakı və beynəlxalq sərgilərdə istehsal olunan məhsulların nümayişi təmin edilib, nəticədə, məhsullar xarici şirkətlərin marağına səbəb olub.