“Səbail rayonunun sosial-iqtisadi inkişafı: real vəziyyət və perspektivlər” mövzusunda jurnalist yazıları müsabiqəsinə yekun vurulub, qaliblər mükafatlandırılıb.

Bununla bağlı oktyabrın 24-də Səbail Rayon İcra Hakimiyyətində Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu ilə birgə “Yerli icra hakimiyyəti orqanları ilə KİV arasında əməkdaşlığın inkişaf etdirilməsi” mövzusunda konfrans keçirilib.

Konfransda icra hakimiyyətinin başçısı Asif Əsgərov Azərbaycan Milli Mətbuatının keçdiyi inkişaf yolundan danışıb. O, ölkəmizdə plüralizmi, söz və mətbuat azadlığını məhdudlaşdıran süni maneələrin aradan qaldırılmasında, KİV-in fəaliyyətini tənzimləyən qanunvericilik, onun maddi-texniki bazalarının formalaşması, inkişafı, jurnalistlərin sosial müdafiəsinin gücləndirilməsi istiqamətində ümummilli lider Heydər Əliyevin xidmətlərini qeyd edib. İcra başçısı Ulu Öndərin bu siyasətinin Azərbaycan Prezidenti İlham Əliyev tərəfindən ardıcıl şəkildə davam etdirildiyini diqqətə çatdırıb.

A.Əsgərov Səbail rayonunun sosial-iqtisadi inkişafı ilə bağlı müsabiqənin artıq ikinci dəfədir keçirildiyini xatırladıb.

Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli məlumat verib ki, Səbail rayonunun sosial-iqtisadi və ictimai-siyasi həyatındakı proseslərin ictimaiyyətə daha yaxından çatdırılmasında peşəkar jurnalist yaradıcılığını stimullaşdırmaq məqsədi ilə keçirilən müsabiqə ilə əlaqədar müxtəlif kütləvi informasiya vasitələrində 26 yazı dərc olunub.

Digər çıxış edənlər fərdi jurnalist yazıları müsabiqələrinin KİV nümayəndələri ilə rayon icra hakimiyyətləri arasında əlaqələrin daha da möhkəmlənməsində, rayonla bağlı dolğun məlumatların ictimaiyyətə çatdırılmasında önəmli rol oynadığını bildiriblər.

Qeyd edilib ki, münsiflər heyətinin qərarına əsasən I yerə “İki sahil” qəzetinin bölmə müdiri Nail Rəhimzadə, II yerə “Bakı Xəbər” qəzetinin müxbiri İradə Sarıyeva, III yerə “Xalq qəzeti”nin baş redaktorunun müavini Tahir Rüstəmov layiq görülüb. Dörd nəfər icra hakimiyyətinin xüsusi mükafatına, on nəfər həvəsləndirici, doqquz nəfər isə digər mükafatlara layiq görülüb.

Qaliblərə müsabiqənin şərtlərinə uyğun müvafiq pul mükafatları, Səbail Rayon İcra Hakimiyyətinin və Kütləvi İnformasiya Vasitələrinin İnkişafına Dövlət Dəstəyi Fondunun fəxri fərmanları təqdim olunub.