Sentyabrın 23-də Sumqayıtın yubileyinə həsr edilmiş Şəhər Günü bayramı qeyd olundu.

Sumqayıt sakinlərinin artıq ənənəyə çevrilmiş bu bayram tədbirlərinə xüsusi həvəs və təşəbbüskarlıqla hazırlaşdıqları hiss edilirdi. Şəhərin siması da dəyişib. Sumqayıtın hər bir guşəsi yubileydən xəbər verir. Bayram ərəfəsində milli geyimli gənclər, içərisində nağıl personajları olan elektromobil karvanı hər kəsi Şəhər Gününə səsləyirdi.

AZƏRTAC xəbər verir ki, bayram münasibətilə dünyanın 23 ölkəsindən və respublikanın bir sıra regionlarından Sumqayıta gəlmiş qonaqlar möhtəşəm, maraqlı və gözəl bir tədbirin şahidləri oldular.

Bayram şənlikləri başlamamışdan əvvəl Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov, Sumqayıt Şəhər İcra Hakimiyyətinin başçısı Eldar Əzizov, Dövlət Sərhəd Xidmətinin rəisi - Sərhəd Qoşunları komandanı, general-leytenant Elçin Quliyev, “Azərenerji” Açıq Səhmdar Cəmiyyətinin prezidenti Etibar Pirverdiyev, Azərbaycan Respublikasının Prezidenti Administrasiyasının nümayəndəsi Əlibala Əliyev, Azərbaycan Respublikası Dövlət Neft Şirkətinin (ARDNŞ) birinci vitse-prezidenti Xoşbəxt Yusifzadə, vitse-prezidenti David Məmmədov, ARDNŞ-in “Azərikimya” İstehsalat Birliyinin Müşahidə Şurasının sədri, Milli Məclisin deputatı Muxtar Babayev, Qubadlı Rayon İcra Hakimiyyətinin başçısı Malik İsaqov, habelə Azərbaycanda akkreditə edilmiş bir sıra diplomatik missiyaların nümayəndələri ümummilli lider Heydər Əliyevin abidəsi önünə tər çiçəklər qoydular.

Ənənəyə görə, bayram şənlikləri Sumqayıtın yaxınlığında yerləşən, yaşı 2 min ildən çox olan Corat qəsəbəsinin qədim qala divarları önündə başlandı. Ümummilli lider Heydər Əliyevin “Sumqayıt Azərbaycan xalqının birlik, həmrəylik şəhəridir” sözləri tədbirin proloqu oldu.

Bayram tədbiri qəsəbənin girəcəyində yaradılmış bazar meydanında keçirildi. Şəhərin keçdiyi bütün təşəkkül yolu tədbir iştirakçılarının gözü qarşısında canlandı. Minlərlə Sumqayıt sakini bu qeyri-adi tamaşadan zövq aldı. Coratın qala divarlarının qarşısından keçən ticarət karvanları, böyük Roma sərkərdəsi Pompeyin və onun qladiatorlarının, həmçinin məşhur fransız yazıçı və səyyahı Aleksandr Dümanın (Ata) obrazları canlandı.

Tamaşaçılar Sumqayıtda aparılan tikinti işlərinin elementlərini də seyr etdilər. Bir göz qırpımında şəhərin rəmzləri meydanda göründü. Coratlı meyxanaçılar duetinin Sumqayıta həsr edilmiş improvizəsi çox orijinal və maraqlı idi.

Coratda keçirilən tədbirin sonunda dövlətimizin başçısı İlham Əliyevin Sumqayıtın sənaye şəhəri kimi yaradılması barədə fikirləri səsləndi. Sumqayıt müasir sənaye şəhərinə çevrilir. Şəhərin dənizə çıxışının olması burada turizm və mədəniyyət infrastrukturunun inkişaf etdirilməsinə əlverişli şərait yaradır.

Sonra bayram şənliyinin iştirakçıları Sumqayıtın mərkəzində yerləşən Dövlət Bayrağı Meydanına yollandılar. Hərbi orkestrin ifasında marş sədaları altında əsgərlər Azərbaycanın böyük dövlət bayrağını meydana gətirdilər. Hərbi texnika, əsgərlər, süvarilər, velosipedçi və motosikletçilər dəstəsi Sumqayıt sakinlərinin və şəhərin qonaqlarının qarşısından keçdilər.

Tədbir iştirakçıları Sumqayıtın qəhrəman idmançılarını alqışlarla qarşıladılar. Dünya və Avropa çempionatlarının mükafatçıları olan yüzdən çox sumqayıtlı idmançı Azərbaycan idmanının şöhrətini dünyaya yayıb.

Sonra idmançıları Sankt-Peterburqdan gəlmiş təbilçi qızlar qrupu və respublikanın regionlarından 11 folklor kollektivi əvəz etdi. Böyük gəminin göyərtəsində Azərbaycan nağıllarının və ədəbi əsərlərin personajları göründü. Onların arxasınca böyük kuklalar üzürdü.

“Şahin” respublika hərbi idman oyununun qalibləri olan Sumqayıt məktəblilərinin dəstələri göz oxşayırdı. Şəhərin orta məktəblərinin şagirdləri və məktəbəqədər müəssisələrdə tərbiyə alan uşaqlar xüsusi müsbət əhval-ruhiyyə yaradırdı. Əllərində bayraqlar, əlvan lentlər, şarlar, çiçəklər tutmuş bu şən, səliqəli uşaqlar sumqayıtlıların quruculuq əzmini təcəssüm etdirirdi.

Paradın sonunda Şuşa şəhər-qalasının böyük maketi meydana gətirildi. Maketdə təsvir edilmiş bu diyarın tanınmış şəxsləri tədbir iştirakçıların belə bir inam aşılayırdı ki, hazırda işğal altında olan torpaqlarımız hökmən azad ediləcək.

Sonra Sumqayıt səmasında Azərbaycan Dövlət Sərhəd Xidmətinin helikopterləri göründü. Xüsusi təyinatlı sərhədçilər dəstəsi meydanda toplaşan bütün tamaşaçıları vəcdə gətirən şou göstərdi. Əllərində dövlətimizin bayraqları olan hərbi desant dəstəsi üzvlərinin Sumqayıt Dövlət Dram Teatrının binasının damına helikopterdən bir-birinin ardınca enməsi anına hamı böyük həyəcanla tamaşa edirdi. Hərbi aviatorlar meydan üzərində bir dəfə də dövrə vurub milli bayrağımızın yaşıl, qırmızı və mavi rənglərinə boyanmış təbrik açıqcaları səpələdilər.

Şəhərin yubileyinə həsr edilmiş bayram öz kütləviliyi, əlvanlığı, insanların çöhrəsindəki təbəssüm, xoş əhval-ruhiyyə, ən başlıcası vətənpərvərlik ruhu ilə yadda qaldı.

ARDNŞ-in birinci vitse-prezidenti Xoşbəxt Yusifzadə Sumqayıtı tərk edərkən dedi: “Əla bayram oldu! Sevindirici haldır ki, tədbirdə uşaqlar və gənclər çox idi, onlar əsl vətənpərvərlik dərsi olan bu bayramda məmnuniyyətlə iştirak edirdilər. Sumqayıt təmiz və qəşəng şəhərdir. Burada Azərbaycan Respublikası Dövlət Neft Şirkətinin bir neçə müəssisəsi fəaliyyət göstərir. Onlar şəhərin həyatında fəal iştirak edirlər”.

Dövlət Sərhəd Xidmətinin rəisi - Sərhəd Qoşunları komandanı Elçin Quliyev öz təəssüratlarını bölüşərək dedi: “Sumqayıt mənim doğma şəhərimdir. O, ilbəil gözəlləşir. Bayram şənliyi uğurlu oldu. Sumqayıtlılar bu təntənələri təşkil etməklə özlərinə gözəl hədiyyə etdilər”.

Həmvətənimiz, Estoniyanın Paldiski şəhərinin vitse-meri Eldar Toonuekk öz emosiyalarını qısaca belə ifadə etdi: “Möhtəşəm bayramdır. Sumqayıt xoşuma gəlir. Qonaqpərvər şəhərdir. Çox şadam ki, şəhərlərimiz arasında qardaşlaşma münasibətləri yaratmaq məqsədilə Sumqayıtda olduğum müddətdə belə bir möhtəşəm bayrama şahidlik etdim”.

Qubadlı Rayon İcra Hakimiyyətinin başçısı Malik İsaqov dedi: “Mən Sumqayıtda yaşayıram. Bura mənim üçün taleyüklü şəhər olub. Ümummilli lider Heydər Əliyevin haqlı olaraq qeyd etdiyi kimi, Sumqayıt – kiçik Azərbaycandır. Burada ölkəmizin bütün regionlarının nümayəndələri mehriban bir ailə kimi yaşayırlar. Əlamətdar haldır ki, bayramda bir sıra rayonların özfəaliyyət kollektivləri iştirak edirdi. Bu bayram qəlbimizdə parlaq təəssüratlar və xoş xatirələr qoydu”.

Sumqayıtda yubiley şənlikləri davam edir.