SİYASƏT
Tacikistanda keçirilən anım tədbirində Ulu Öndərin Azərbaycan dövləti və xalqı qarşısındakı xidmətlərindən bəhs olunub
Düşənbə, 12 dekabr, AZƏRTAC
Azərbaycanın Tacikistandakı səfirliyində ümummilli lider Heydər Əliyevin xatirəsinə həsr olunan anım tədbiri keçirilib.
AZƏRTAC xəbər verir ki, əvvəlcə səfirliyin əməkdaşları və qonaqlar ulu öndər Heydər Əliyevin səfirlikdəki büstü önünə gül dəstələri qoyublar.
Tədbirdə Tacikistanın dövlət və hökumət nümayəndələri, nazirlik və komitələrin rəhbərləri, bu ölkənin Ali Məclisinin deputatları, diplomatik korpusun və beynəlxalq təşkilatların başçıları, elm, mədəniyyət xadimləri, təhsil işçiləri, diasporumuzun üzvləri, jurnalistlər iştirak ediblər.
Ümummilli Liderin xatirəsi bir dəqiqəlik sükutla yad edildikdən sonra Andrey Konçalovskinin Heydər Əliyev haqqında çəkdiyi ikihissəli “Bremya vlasti” filmi nümayiş etdirilib.
Tədbirdə səfir Abbasəli Həsənov Azərbaycan xalqının böyük oğlu Heydər Əliyevin zəngin həyat təcrübəsi və siyasi fəaliyyəti barədə geniş məlumat verib. O bildirib ki, Azərbaycan xalqının təkidli tələbi ilə siyasi hakimiyyətə qayıdan ümummilli lider Heydər Əliyev ölkənin üzləşdiyi problemləri aradan qaldırdı, vətəndaş müharibəsi təhlükəsinin qarşısını aldı, Azərbaycan dövlətini məhv olmaqdan xilas etdi. 1988-ci ildən Ermənistanın Azərbaycana qarşı başladığı müharibə Heydər Əliyevin qarşısında mühüm vəzifələr qoymuşdu. Ordu yaratmaq, iqtisadiyyatı ayağa qaldırmaq, sosial məsələləri həll etmək, ölkənin təhlükəsizliyini təmin etmək - bütün bu məsələləri həll etmək üçün Heydər Əliyev neft strategiyasının əsasını qoydu. Sabitlik yaranandan sonra xarici investorların ölkəyə cəlb edilməsi nəticəsində inkişaf prosesi başladı. 1994-cü il sentyabrın 20-də “Əsrin müqaviləsi” imzalandı. Bu dövrdən Azərbaycan inkişaf mərhələsinə qədəm qoydu. 1999-cu ildə isə Bakı-Supsa neft kəmərinin tikilib istismara verilməsi nəticəsində Azərbaycan nefti Avropa bazarına çıxış əldə etdi. Bütün bu böyük layihələrin memarı ulu öndər Heydər Əliyev olub.
İranın Tacikistandakı səfiri Xucatullo Fağoni Heydər Əliyevin Azərbaycan-İran münasibətlərinin inkişaf etdirilməsində misilsiz xidmətlərinin olduğunu qeyd edib.
Tacikistanın Xalq Şairi, ölkə himninin sözlərinin müəllifi, Azərbaycan Milli Məclisinin deputatı Elmira Axundovanın “Heydər Əliyev. Şəxsiyyət və Zaman”, eləcə də Nikolay Zinkoviçin “Həyatın kəşməkəşləri” kitablarını tacik dilinə tərcümə edən Qulnozar Keldi Azərbaycan xalqının böyük oğlu Heydər Əliyevin dünya miqyasında siyasətçi və dövlət xadimi olduğunu qeyd edib. Sonra Andrey Konçalovskinin iki hissədən ibarət “Bremya vlasti” sənədli filmi nümayiş etdirilib.
Daha sonra Heydər Əliyevin əziz xatirəsinə ehsan verilib.
Tədbirin iştirakçılarına Heydər Əliyevin həyat və fəaliyyəti haqqında tacik, ingilis, rus və Azərbaycan dillərində hazırlanmış məlumatlar toplusu paylanıb.
Qulu Kəngərli
AZƏRTAC-ın xüsusi müxbiri
Düşənbə