CƏMİYYƏT


Təbiəti sevək, qoruyaq və qayğısına qalaq!

Bakı, 5 iyun, AZƏRTAC

Hər il iyunun 5-də ətraf mühit problemləri haqqında əhalinin maarifləndirməsi və təbiətin qorunması üçün fəaliyyətin gücləndirilməsi məqsədilə keçirilən Ümumdünya Ətraf Mühit Gününün builki mövzusu “İnsanlarla təbiəti qovuşduraq” adlanır.

AZƏRTAC xəbər verir ki, bu barədə BMT-nin Azərbaycandakı nümayəndəliyi, Ekologiya və Təbii Sərvətlər Nazirliyi və “IDEA” İctimai Birliyi birgə təşəbbüs göstəriblər. Onların birgə təşkilatçılığı ilə ölkəmizin ilk etno-ekoloji və arxeoloji qoruğu olan Qala Dövlət Tarix-Etnoqrafiya Muzeyində tədbir keçirilib. Bu muzey kompleksinə təsərrüfat (qoyunçuluq, taxılçılıq, meyvəçilik), ənənəvi sənət (xalçaçılıq və keçəçilik), eləcə də təbii qida və sənətkarlıq emalatxanaları daxildir.

Tədbirdə BMT İnkişaf Proqramının (BMTİP) Azərbaycan nümayəndəliyinin dəstəyi ilə 7-10 yaşlı uşaqlar arasında rəsm müsabiqəsi üçün çəkilmiş şəkillərdən ibarət sərgi təşkil edilib. “Ətraf mühit və insan sağlamlığına məişət tullantılarının mənfi təsirini azaldaq” mövzusunda rəsm müsabiqəsi uşaqlara, müəllimlərə və valideynlərə məsuliyyətsiz istehsal və istehlakın təbiət və insan sağlamlığına mənfi təsirlərini daha dərindən anlatmaq məqsədi ilə təşkil edilib.

BMT-nin rezident əlaqələndiricisi və BMTİP-in rezident nümayəndəsi Qulam İshaqzai xatırladıb ki, Ümumdünya Ətraf Mühit Günü 1974-cü ildən etibarən qeyd edilir. “Bu tarix dünya ictimaiyyətini ətraf mühit məsələləri barədə məlumatlandırmaq üçün istifadə edilən bir vasitədir. Ümumdünya Ətraf Mühit Gününün builki mövzusu uşaqlara da yaxındır və şadam ki, onlar bu günü bizimlə birlikdə qeyd edirlər. Onların ətraf mühitin qorunmasında böyük rolu var. Vaxtilə bizə həvalə olunmuş dünyanı biz də gələcək nəsillərə ötürəcəyik. Bu mənada uşaqların ətraf mühitlə bağlı məsələlər haqqında məlumatlandırılması son dərəcə əhəmiyyətlidir. Ümumiyyətlə, uşaqlar hazırda ətraf mühitlə bağlı məsələlərdə çox həssas və məlumatlıdırlar. Məsələn, mən əlimdəki kağızı təsadüfən yerə atanda, yaxud ərzaq məhsullarını israf edəndə 12 yaşlı kiçik qızım məni buna görə tənbeh edir və deyir ki, mən bu zibili qutuya atmalıyam, yaxud ərzaqdan istifadə edərkən ətrafımdakı insanları da fikirləşməliyəm”, - deyə Qulam İshaqzai qeyd edib.

Müsabiqədə uşaqların çox fəal iştirakını vurğulayan Q.İshaqzai təqdim edilən rəsmlərdə onların öz fikirlərini düzgün ifadə etdiklərini bildirib. O, BMT-nin baş katibi Antoniu Quterrişin Ümumdünya Ətraf Mühit Günü ilə bağlı müraciətini də yığcam şəkildə diqqətə çatdırıb. Qeyd edib ki, ətraf mühit sağlam olmasa, yoxsulluq aradan qaldırıla bilməz, insanların xoşbəxt həyatı, rifahı təmin olunmaz. Biz hər birimiz yaşadığımız bu dünyanı qorumaq üçün özümüzə görə töhfə verə bilərik. Məsələn, daha az plastik qablardan istifadə edər, daha az maşın sürər, ərzaq məhsullarından israfla istifadəni xeyli azalda bilərik. Hər birimiz başqalarına ətraf mühitə qayğı ilə yanaşmanı öyrədə bilərik.

Qulam İshaqzai ətraf mühitin qorunması, eləcə də dayanıqlı inkişaf məsələsi baxımından Ekologiya və Təbii Sərvətlər Nazirliyinin fəaliyyətini yüksək qiymətləndirib. Diqqətə çatdırıb ki, bu tədbirin Qala Dövlət Tarix-Etnoqrafiya Muzeyində təşkili təsadüfi deyil. Məhz bu ərazidə tullantıların təkrar emal olunaraq faydalı əşyalara çevrildiyi nümayiş etdirilib.

Planetimizin qorunmasında gənclərin böyük potensialının və mühüm rolunun olduğunu vurğulayıb. “Uşaqlar təbii olaraq ətraf mühiti qorumağa meyillidirlər. Onlar ağac əkmək, təmizlik işləri aparmaq, heyvanların qayğısına qalmaq üçün öz vaxtlarını və səylərini sərf etməyə hazırdırlar”, - deyən Qulam İshaqzai uşaqların davranışının dəyişməsində məktəb təhsilinin əhəmiyyətini vurğulayıb.

Tədbirdə çıxış edən ekologiya və təbii sərvətlər naziri Hüseynqulu Bağırov uşaqlara müraciətlə deyib: “Sizin çəkdiyiniz şəkillərə baxdım. Çox mənalı şəkillər çəkmisiniz. Görünür ki, Azərbaycanın təbiətini çox sevirsiniz, ona qayğı ilə yanaşırsınız. Elə də davam edin. Valideynlərinizə, qonşularınıza, tanıdıqlarınıza imkan verməyin ki, maşın gedə-gedə hansısa zibil tullantısını pəncərədən bayıra atsın, hansısa kağız parçasını hara gəldi tullasın. Azərbaycan bizim Vətənimizdir, onu sevmək və qorumaq lazımdır. Vətənimizin təbiətini də qorumaq bizim borcumuzdur”.

H.Bağırov qeyd edib ki, ətraf mühitin təmiz saxlanması ilə bağlı uşaqların təkidli müraciəti çox yaxşı effekt verəcək. Bu gün Azərbaycan haqqında təsəvvür təkcə burada yaşayan insanlarla bağlı deyil. Ölkəmizin çölləri, dağları, qayaları, dənizi, ceyranları, bir sözlə, təbii mühiti də bu təsəvvürü formalaşdırır. “Bizim təbiətimiz, onun bitkiləri, ağacları, otları, quşları, həşəratları, heyvanları yaşamalıdır. Əziz uşaqlar, bu, sizdən də asılı olacaq. Düzdür, bizdən lap çox asılıdır ki, siz böyüyənə qədər bunları salamat şəkildə sizə çatdıraq. Amma siz də buna hazır olun”.

Qeyd edək ki, müsabiqəyə bir ay ərzində ümumilikdə 120-dən çox şəkil daxil olub. Yeddi nəfərdən ibarət münsiflər heyəti şəkillərin arasından ən yaxşılarını seçib. Rəsm müsabiqəsinin iştirakçıları beş yaş qrupunda mükafatlandırılıblar, həmçinin həvəsləndirici mükafatlar təqdim edilib.

Tədbirdə uşaq rəsm müsabiqəsinin iştirakçılarının qaliblərinə mükafatlar verilib.

Sonda xatirə şəkli çəkdirilib. Müsabiqə iştirakçıları üçün lanç və əyləncə proqramı təşkil edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.