“Xəmsə” oyunu üzrə V Azərbaycan çempionatının Astara rayon turu başa çatıb
Bakı, 1 noyabr, AZƏRTAC
Astara şəhərindəki Heydər Əliyev Mərkəzində “Xəmsə” Milli İntellektual Oyunu üzrə yeniyetmələr arasında V Azərbaycan çempionatının rayon turu keçirilib.
AZƏRTAC xəbər verir ki, Astara rayon gənclər və idman idarəsinin əməkdaşı Elnur Qurbanlı çempionatın əsas məqsədinin yeniyetmələrin intellektual səviyyəsini, dünyagörüşünü artırmaq, onlarda elmə və biliyə həvəs oyatmaq, asudə vaxtlarını səmərəli təşkil etmək olduğunu bildirib.
Mərkəzin əməkdaşı Elza Kazımova bu kimi tədbirlərin məhz Heydər Əliyev Mərkəzində keçirilməsinin gənclərimizin ümummilli lider Heydər Əliyevin ideyalarına sadiqliyinin göstəricisi olduğunu vurğulayıb.
Qrup oyunlarından sonra Astara şəhər 1 nömrəli tam orta məktəbin “Azəri-Light”, Təngərüd kənd tam orta məktəbi təmsil edən “Vita”, Astara şəhər 2 nömrəli tam orta məktəbin “Ümid” və Vaqo kənd tam orta məktəbin “Zəka” komandaları finalda iştirak hüququ qazanıblar.
Yarışın yekununda “Vita”, “Azəri-Light” və “Ümid” komandaları müvafiq olaraq ilk üç pillədə qərarlaşıblar.
Qaliblər rayon gənclər və idman idarəsinin diplomları ilə təltif olunub.
Bölmənin digər xəbərləri
