CƏMİYYƏT
Azərbaycan gənclərinin ölkənin imkanlarından hərtərəfli faydalanmaları üçün bütün şərait yaradılıb
Bakı, 31 yanvar, AZƏRTAC
Yanvarın 31-də Yeni Azərbaycan Partiyasının Gənclər Birliyi 2 fevral - Gənclər Günü münasibətilə tədbir keçirib.
AZƏRTAC xəbər verir ki, əvvəlcə birliyin 2014-cü ildəki fəaliyyəti ilə bağlı hesabatı təqdim edilib.
Azərbaycan Respublikası Baş nazirinin müavini, Yeni Azərbaycan Partiyası sədrinin müavini-icra katibi Əli Əhmədov tədbirdə çıxış edərək bildirib ki, ulu öndər Heydər Əliyevin müəyyənləşdirdiyi siyasətdə gənclərə qayğı önəmli yer tutur. Məhz onun təşəbbüsü, ideyası və birbaşa tapşırığı əsasında Azərbaycanda Gənclər Günü təsis olunub. Bu gün Azərbaycan gənclərinin qayğısız böyüməsi və inkişaf etdirilməsi üçün dövlətin bütün imkanlarının səfərbər edilməsi kimi çox vacib addımlar atılır. Əsası Ulu Öndərimiz tərəfindən qoyulan siyasət Prezident İlham Əliyevin rəhbərliyi ilə uğurla davam etdirilir. Gənclərin inkişafı, onların Azərbaycanın imkanlarından hərtərəfli faydalanması üçün hər cür şərait yaradılıb.
Azərbaycan gəncliyinin böyük bir hissəsi ümummilli lider Heydər Əliyevin yaratdığı, onun ideyaları ilə yaşayan və bu gün Prezident İlham Əliyevin rəhbərlik etdiyi Yeni Azərbaycan Partiyasının üzvləridir. YAP-ın sıralarında 650 minə yaxın Azərbaycan vətəndaşı birləşib. Onların 40 faizə qədəri gənclərdir. Təxminən 250 min fəal Azərbaycan gənci YAP-ın sıralarında siyasi fəaliyyətini davam etdirir. Azərbaycanın tarixində heç zaman bu qədər fəal gənci bir arada birləşdirən təşkilat olmayıb. Təbii ki, Azərbaycan gənclərinin böyük bir hissəsinin YAP-ın sıralarında birləşməsi onların bütövlükdə ulu öndər Heydər Əliyevin ideyalarına, onun yaratdığı dövlətə, Prezident İlham Əliyevə olan inamının nəticəsidir.
YAP-ın Gənclər Birliyi böyük bir yol keçib və Azərbaycan gənclərinə nüfuz etmək, onun düşüncələrinə, həyat baxışlarına müsbət mənada təsir göstərmək imkanına malikdir və qurum bu imkanı gördüyü işlərlə təsdiq edir.
Əli Əhmədov deyib: “Hər bir ölkənin malik olduğu resurslar var. Azərbaycanın çoxsaylı resurslarından biri də ölkəmizin gəncləridir. Azərbaycan əhalisinin tərkibində gənclər yüksək çəkiyə malikdir. Bu, bizim resursumuzun ən dəyərli cəhətlərindən biridir. Deməli, bizim gələcəyimiz daha parlaqdır”.
Azərbaycanda gənclərlə bağlı siyasətin bir neçə başlıca istiqaməti var. Hər şeydən əvvəl Azərbaycan gəncliyinin qarşısında duran ən müqəddəs məsələ Azərbaycanın qorunmasıdır. Bu mənada vətənpərvərlik tərbiyəsi bütövlükdə qarşımızda duran başlıca vəzifədir. İkinci vəzifə Azərbaycanın gücünün, qüdrətinin artırılmasına gənclərin öz layiqli töhfəsinin verilməsindən ibarətdir. Milli ideyanın, milli dəyərlərin daşıyıcısı olmaq Azərbaycan gənclərinin qarşısında duran ən vacib vəzifələrdən biridir. Azərbaycan gəncinin digər mühüm vəzifəsi isə ölkəmizi layiqincə təmsil etməkdir.
Milli Məclisin sədr müavini Bahar Muradova çıxışında bildirib ki, hər bir xalqın gələcəyi gənclik olduğu kimi, Azərbaycanın da gələcəyinin gənclərin əlində olması ilə yalnız qürur duymaq olar. Bahar Muradova deyib: “Siz öz öhdəliklərinizi bilən, vətəndaş məsuliyyətini dərk edən, öz xalqı, Vətəni, əqidəsi, seçdiyi siyasi yol qarşısında vicdan borcunu məsuliyyətlə yerinə yetirən gəncliyin nümayəndələrisiniz. Yeni Azərbaycan quruculuğu hər biriniz tərəfindən qarşıda duran vəzifələri məsuliyyətlə yerinə yetirməyə hazır olmaq deməkdir. Sizin fəaliyyətinizin ən müxtəlif istiqamətləri belə söyləməyə imkan verir ki, siz ulu öndər Heydər Əliyevin ideyaları ilə yaxşı silahlanmısınız. Sizin qəlbinizdə Azərbaycan sevgisi, Ulu Öndər və onun ideyalarına məhəbbət kök salıb. Yalnız bu sevgidən çıxış edərək layiqli vətəndaş olmaq mümkündür. Bizim Mübariz, Fərid kimi qəhrəmanlarımız Azərbaycan üçün canlarından belə keçdilər, siz də öz həyatınızın bütün şüurlu hissəsini Azərbaycana xidmət etməklə keçirməlisiniz, yeri gələndə siz də onların şəhidlik zirvəsi uğrunda mübarizəsini təkrarlamağa hazır olmalısınız”.
Tədbirdə çıxış edən YAP Gənclər Birliyinin üzvləri Arzu Xəlilova, Güllü Eldarzadə və digərləri Azərbaycanda gənclərin inkişafından, dövlətin onlara göstərdiyi diqqət və qayğıdan danışıb və ölkə rəhbərliyinə, xüsusilə dövlətimizin başçısına minnətdarlıq ediblər.
Sonra bir qrup fəal gəncə fəxri fərman və hədiyyələr təqdim edilib.
Tədbir konsert proqramı ilə davam edib.