SİYASƏT
ABŞ Azərbaycanlılar Şəbəkəsi Amerika ictimaiyyətini Şuşanın işğalı barədə məlumatlandırır
Vaşinqton, 8 may, AZƏRTAC
ABŞ Azərbaycanlılar şəbəkəsi Amerika ictimaiyyətini Şuşa şəhərinin işğal edilməsi və Ermənistanın Azərbaycana qarşı hələ də davam edən hərbi təcavüzü barədə hər il keçirilən, bu dəfə sayca onuncu məlumatlandırma kampaniyasına start verib.
ABŞ administrasiyasının üzvlərinə, konqresmenlərə və Amerika KİV-lərinə ünvanlanmış müraciətdə qeyd edilir ki, BMT Təhlükəsizlik Şurasının Ermənistanın işğalçı qüvvələrinin Azərbaycan ərazilərindən dərhal, tamamilə və qeyd-şərtsiz çıxarılması tələb edilən dörd qətnaməsinə (№ 822, 853, 874, 844), həmçinin BMT Baş Məclisinin müvafiq qətnaməsinə (№ A/RES/48/114) məhəl qoymayan Ermənistana təzyiq göstərməyin vaxtı yetişib.
25 il bundan əvvəl Ermənistan Azərbaycanın beynəlxalq miqyasda tanınmış ərazilərində Azərbaycan xalqına qarşı müharibəyə başlayıb. Azərbaycanın Dağlıq Qarabağ regionu və digər yeddi rayonu işğal edilib, bu ərazilərdə yaşayan 800 min nəfərə yaxın etnik azərbaycanlı əhali öz doğma yurdundan qovulub.
Mayın 8-də Azərbaycan mədəniyyətinin mərkəzi sayılan qədim Şuşa şəhərinin işğalından 25 il keçir. Şuşa öz musiqiçiləri, bəstəkarları və müğənniləri ilə məşhurdur, lakin son 25 ildə bu şəhər Ermənistan tərəfindən dağıntılara, işğala və sistematik etnik təmizləməyə məruz qalıb. 1992-ci ilə qədər Azərbaycanın Dağlıq Qarabağ regionunda ən mühüm şəhər olan Şuşanın əhalisinin 92 faizi etnik azərbaycanlılar idi. Şuşa işğal ediləndən əvvəl, 1992-ci ilin fevral ayında Xocalıda erməni qoşunları tərəfindən törədilmiş qırğın zamanı 613 nəfər dinc azərbaycanlı qətlə yetirilib.
Müraciətin sonunda bildirilir ki, ədalətin təmin olunması üçün tədbirlər görülməsi - BMT Təhlükəsizlik Şurasının və BMT Baş Məclisinin qətnamələrinin yerinə yetirilməsi, Azərbaycan ərazisində qeyri-qanuni olan Ermənistan silahlı qüvvələrinin oradan çıxarılması, Azərbaycanın məcburi köçkünlərinin öz evlərinə qayıtmaları üçün şərait yaradılması, Naxçıvanın Ermənistan tərəfindən blokadasına son qoyulması və bütün hərbi əsirlərin qaytarılması zəruridir.
Yusif Babanlı
AZƏRTAC-ın xüsusi müxbiri
Vaşinqton