CƏMİYYƏT
AQTİ-nin regional sınaq laboratoriyaları və bölmələri səriştəlilik proqramında yüksək nəticə göstərib
Bakı, 10 oktyabr, AZƏRTAC
Əhalinin sağlamlığının qorunması, qida təhlükəsizliyi sahəsində laboratoriya sisteminin təkmilləşdirilməsi ilə bağlı Azərbaycan Qida Təhlükəsizliyi İnstitutunun (AQTİ) nəzdində fəaliyyət göstərən laboratoriyaların maddi-texniki bazasının gücləndirilməsi, eləcə də modernləşdirilməsi istiqamətində mütəmadi olaraq tədbirlər həyata keçirilir.
İnstitutun İnformasiya təminatı və innovativ həllər şöbəsindən AZƏRTAC-a bildirilib ki, İngiltərənin VETQAS (APHA SCIENTIFIC) şirkəti tərəfindən AQTİ-nin regional sınaq laboratoriya və bölmələri peşəkarlıq səviyyələrinin ölçülməsi, həmçinin bu sahədə müayinələrin beynəlxalq tələblərə uyğun həyata keçirilməsi məqsədilə səriştəlilik test proqramına cəlb olunub. Dünyanın müxtəlif ölkələrindən laboratoriyaların da iştirak etdiyi brusellyoz xəstəliyinin Rose-benqal sınağı ilə təyinində Mərkəzi Baytarlıq Laboratoriyasının Quba, Bərdə, Sabirabad, Qax regional bölmələri, eləcə də Göygöl, Tovuz və Lənkəran regional sınaq laboratoriyaları uğurla iştirak edib və yüksək nəticə əldə edib.
Qeyd edək ki, regional sınaq laboratoriyaları və bölmələrində istifadə edilən müasir cihaz və avadanlıqlar patomorfoloji, mikrobioloji, virusoloji, seroloji, molekulyar-genetik, kimyəvi-toksikoloji və parazitoloji müayinələri həyata keçirməyə imkan verir. Laboratoriyada həm insanlar, həm də heyvanlar üçün təhlükəli hesab edilən yoluxucu xəstəliklərdən olan brusellyozun ELISA müayinə metodundan, Rose-bengal sınağı metodundan (RBS), Komplementin Birləşmə Reaksiyası (KBR) metodundan, Aqqlütinasiya reaksiyası (AR) metodundan, həmçinin Xlamidioz xəstəliyinin ELISA müayinə metodundan, Şmallenberq xəstəliyinin ELISA müayinə metodundan istifadə edilir.