Bakı, 8 may, AZƏRTAC

Aprelin 22-də Argentinanın “Clarin” qəzetində Ermənistan-Azərbaycan, Dağlıq Qarabağ münaqişəsinin mahiyyətinin təhrif edildiyi “Qarabağ-Cənubi Qafqaz burulğanında öz kimliyini müdafiə edən yazıq xalq” adlı məqalə dərc olunmuşdu.

Azərbaycan Xarici İşlər Nazirliyinin mətbuat xidmətindən AZƏRTAC-a bildiriblər ki, həmin qəzetdə Azərbaycanın Argentinadakı səfəri Rəşad Aslanovun cavab məqaləsi dərc olunub.

Səfir yazır: “Həmin məqalənin bir ölkə tarixinin saxtalaşdırılmasının, separatizmin, işğalçılığın təşviqinin təmiz nümunəsi olduğunu deyərdim. Təəssüf edirəm ki, məqalədə Ermənistan və Azərbaycan arasındakı münaqişə barədə məlumat tamamilə qərəzli şəkildə təqdim olunur.

Məqalədə Azərbaycan və onun Ermənistan tərəfindən işğal olunmuş Dağlıq Qarabağ bölgəsi barədə verilmiş yanlış məlumatlara dəqiqlik gətirməyi zəruri hesab edirəm. İlk növbədə, qeyd etmək istərdim ki, Dağlıq Qarabağ münaqişəsi məqalədə ifadə olunduğu kimi, müsəlmanlar və katoliklər arasında olan dini münaqişə deyil (erməni kilsəsinin rəsmi adı Erməni Apostolik Kilsəsidir. Müəllifin qeyd etdiyi kimi Katolik deyil).

Azərbaycan xalqı əsrlərdir ki, dini tolerantlıq və müxtəlifliyə malik bir cəmiyyətə sahibdir. Papa Fransiskin da bəyan etdiyi kimi, Azərbaycanda müxtəlif dinlərə etiqad edən yəhudilər, xristianlar və müsəlmanlar sülh və əmin-amanlıq şəraitində yaşayırlar.

Bundan başqa, adı azərbaycanca “qara” və “bağ” sözlərinin birləşməsindən yaranan Qarabağ bölgəsinin tarixi haqqında məlumat vermək istərdim. XIX əsrin əvvəllərində Rusiya imperiyasının işğalına qədər bu bölgə əsrlər boyu müxtəlif Azərbaycan dövlətlərinin ayrılmaz tərkib hissəsi olub.

Azərbaycan torpaqlarına ermənilərin köçürülməsi 1813-cü ildə Gülüstan və 1823-cü ildə Türkmənçay müqavilələrinin imzalanmasından sonra başlanılıb. Daha sonra ermənilər Azərbaycanın torpaqları hesabına məskunlaşdıqları əraziləri genişləndirməyə və azərbaycanlıları öz doğma torpaqlarından çıxarmağa nail olublar. Bu prosesin davamı nəticəsində hətta sovet hakimiyyəti dövründə də Azərbaycan ərazisi 114 min kvadratmetrdən 86 min kvadratmetrə qədər azalıb.

Məqalədə qeyd olunan qanunsuz “referendum”a gəldikdə isə bu əməl Azərbaycan Respublikasının Konstitusiyasını və beynəlxalq hüququn norma və prinsiplərini pozur. Belə ki, bu, heç bir hüquqi əsasa malik deyil. Eyni zamanda, bu qondarma “referendum” işğal edilmiş ərazilərdə Ermənistan tərəfindən Azərbaycanın ərazi bütövlüyünə qarşı güc tətbiqi və təhdidi, etnik təmizləmə və beynəlxalq hüququn digər norma və prinsiplərinin kobud şəkildə pozulması ilə yaradılmış şərait altında keçirilib”.