RƏSMİ XRONİKA
AZƏRBAYCAN PREZİDENTİ İLHAM ƏLİYEVİN MACARISTANA DÖVLƏT SƏFƏRİ
PREZİDENT İLHAM ƏLİYEVƏ MACARISTANIN NÜFUZLU KORVİNUS UNİVERSİTETİNİN FƏXRİ DOKTORU ADI VERİLMİŞDİR
Xəbər verdiyimiz kimi, fevralın 18-də Budapeştdə Azərbaycan Respublikasının Prezidenti İlham Əliyevə Macarıstanın nüfuzlu dövlət ali məktəblərindən biri olan Korvinus Universitetinin fəxri doktoru adı verilmişdir.
Ali təhsil ocağına gələn Azərbaycan Prezidenti İlham Əliyevi universitetin rektoru Tamaş Mesaroş binanın önündə hörmətlə qarşıladı.
Əvvəlcə Elmi Şura üzvlərinin iştirakı ilə görüş keçirildi. Tamaş Mesaroş dövlətimizin başçısına təhsil ocağı barədə məlumat verərək bildirdi ki, Mərkəzi Avropada ən böyük ali məktəblərdən sayılan bu universitetin 7 fakültəsində 17 mindən artıq tələbə təhsil alır, 620 nəfərdən çox professor-müəllim heyəti çalışır. Son 5 ildə universitet fəxri doktor adını yalnız Azərbaycan Prezidenti İlham Əliyevə vermişdir. 1919-cu ildə yaradılmış universitet İkinci Dünya müharibəsi zamanı bağlansa da, sonradan öz fəaliyyətini bərpa etmişdir.
Prezident İlham Əliyev fəxri doktor mantiyasını geyindi.
Sonra konfrans salonunda mərasim keçirildi. Salona toplaşanlar dövlətimizin başçısını və xanımı Mehriban Əliyevanı alqışlarla qarşıladılar.
Universitetin beynəlxalq əlaqələr üzrə prorektoru NORBERT KİŞ dövlətimizin başçısını və xanımını, eləcə də Azərbaycan nümayəndə heyətini salamladı, universitetin rəhbərliyini və Elmi Şuranın üzvlərini təqdim etdi.
İctimai elmlər fakültəsinin dekanı, professor JOLT ROSTOVANİ Prezident İlham Əliyevin tərcümeyi-halını oxuyaraq dedi:
-Xanımlar və cənablar, bu təqdimat qəbul edilmiş qərarın aid olduğu şəxsiyyətə, Azərbaycanın Avropaya inteqrasiyası yolunda atılmış birinci addımların müəllifinə həsr olunur. O, elə bir şəxsiyyətdir ki, Xavyer Solana onu Avropa İttifaqının böyük dostu adlandırmışdır. Çünki o, ölkəsində siyasi və demokratik islahatların həyata keçirilməsi üçün müvafiq əsasları və Avropanın şərq qapısında yerləşən məkanda müasirləşmə və iqtisadi inkişafa şərait yaratmışdır.
Prezident İlham Əliyev ölkədaxili və beynəlxalq məsələlərin həllinə praqmatik yanaşmadan istifadə edir. O, müasir dünyanı çox yaxşı tanıyır və təşəbbüskardır. Cənab Əliyev Qonşuluq siyasəti çərçivəsində tədbirlər planının tərtib olunmasına fəal şəkildə töhfə vermişdir. Çünki bilir ki, Avropa İttifaqının Qonşuluq siyasəti Azərbaycanın siyasi və iqtisadi meyarlarını Avropa standartlarına uyğunlaşdırmaq imkanı yaradacaqdır.
1990-cı illərin əvvəllərində böyük dəyişikliklərlə üzləşmiş Cənubi Qafqaz ölkələrinə gəldikdə, Prezident İlham Əliyev qətiyyətlə inanır ki, islahatlar prosesi davam etməlidir. Hazırda Azərbaycanın həyata keçirdiyi siyasət ölkənin dəyərlərini Avropa dəyərlərinə daha da yaxınlaşdırır. Prezident aydın şəkildə bəyan etmişdir ki, Azərbaycan Avropa İttifaqına olduqca sadiq qalan maraqlı tərəfdaşdır. O bildirir ki, ölkəsi Avropa İttifaqı ilə münasibətlərinə böyük önəm verir.
Prezident Əliyev 1982-ci ildə Moskva Dövlət Beynəlxalq Münasibətlər İnstitutunu bitirmişdir. Bundan sonra, o, həmin institutda aspiranturaya qəbul olunmuş və tarix elmləri namizədi alimlik dərəcəsi almışdır. 1985-1990-cı illərdə cənab İlham Əliyev Moskva Dövlət Beynəlxalq Münasibətlər İnstitutunda mühazirələr oxumuşdur.
Cənab Əliyev siyasi elmlər üzrə ekspertdir. O, beynəlxalq münasibətlər və suveren Azərbaycanın neft strategiyasının geosiyasi aspektləri sahəsində bir çox tədqiqat işlərinin müəllifidir. Onun yazdığı əsas kitablardan ikisi “Azərbaycan nefti dünya siyasətində” və “Azərbaycanın Xəzər nefti” adlanır. 1991-1994-cü illərdə o, özəl sənaye-kommersiya müəssisələrinə rəhbərlik etmişdir.
1994-2003-cü illərdə cənab İlham Əliyev Azərbaycan Respublikası Dövlət Neft Şirkətinin vitse-prezidenti, sonra isə birinci vitse-prezidenti olmuşdur. O, Azərbaycanın neft strategiyasının həyata keçirilməsində fəal iştirak etmişdir. Prezident Əliyev Avropada, o cümlədən Macarıstanda enerji təchizatı mənbələrinin şaxələndirilməsini dəstəkləyir. Onun prezidentliyi dövründə Bakı-Tbilisi-Ceyhan neft kəməri və Bakı-Tbilisi-Ərzurum qaz kəməri istismara verilmişdir. Həmin addımlar Azərbaycanı Avropa ailəsinə inteqrasiya etməkdə yardımçı olmuşdur.
1995-2000-ci illərdə, o, iki dəfə Azərbaycan Respublikasının Milli Məclisinə - parlamentə seçilmişdir.
2001-2003-cü illərdə o, Avropa Şurası Parlament Assambleyasında (AŞPA) Azərbaycanın parlament nümayəndə heyətinin rəhbəri olmuşdur. 2003-cü ilin yanvar ayında Avropa Şurası Parlament Assambleyası sədrinin müavini və AŞPA-nın büro üzvü seçilmişdir. 2004-cü ilin aprel ayında cənab Əliyev AŞPA-nın tədbirlərində fəal iştirakına və Avropa dəyərlərinə sadiqliyinə görə AŞPA-nın medalı və fəxri üzvü diplomu ilə təltif olunmuşdur. 1997-ci ildən etibarən cənab İlham Əliyev Azərbaycan Milli Olimpiya Komitəsinin prezidenti seçilmişdir. İdman və Olimpiya hərəkatının inkişafında göstərdiyi xidmətlərinə görə cənab Əliyev Beynəlxalq Olimpiya Komitəsinin ən yüksək ordeni - Beynəlxalq Hərbi İdman Şurasının “Böyük Şöhrət zolağı” ilə təltif olunmuşdur.
2003-cü ilin oktyabrın 15-də, o, Azərbaycan Respublikasının Prezidenti seçilmişdir.
Prezident Əliyev Macarıstanla əlaqələri olduqca mühüm sayır. Azərbaycan Prezidenti seçildikdən bir neçə ay sonra məhz cənab Əliyev Macarıstanda səfirlik açmaq barədə qərar qəbul etmişdir. Həmin vaxtdan etibarən o, müxtəlif sahələrdə çalışan bir çox macar nümayəndələrini Azərbaycanda qəbul etmişdir.
Prezident Əliyevin ölkələrimiz arasında elmi əlaqələrə dəstəyi sayəsində son iki il ərzində Budapeştdə iki dəfə Azərbaycan-Macarıstan elmi konfransları təşkil olunmuşdur.
Biz həmçinin qeyd etmək istəyirik ki, açıq qapılar siyasətini və yaxşı idarəçiliyi uğurla həyata keçirdiyini nəzərə alaraq, cənab Əliyev ölkəsində dünyada ən yüksək iqtisadi artım sürətinə nail olmuş və beləliklə, Azərbaycanı regionun aparıcı dövlətinə çevirmişdir.
Prezident Əliyev Budapeştin Korvinus Universiteti ilə Azərbaycan universitetləri arasında əməkdaşlığın möhkəmləndirilməsini arzulayır. Təhsil sahəsində əməkdaşlıq sazişi rektor Mesaroş və Bakı Dövlət Universitetinin, Bakı Ali Diplomatiya Kollecinin rektorları tərəfindən artıq imzalanmışdır.
NORBERT KİŞ: Cənab professor, çıxışınıza görə Sizə minnətdaram.
İndi isə, mən Budapeştin Korvinus Universitetinin rektoru, professor Mesaroşdan fəxri doktor adını namizədə verməsini xahiş edirəm.
TAMAŞ MESAROŞ: Biz - Budaspeştin Korvinus Universitetinin rektoru və Elmi Şurası Sizə, professor İlham Heydər oğlu Əliyevə universitetimizin fəxri doktoru adını veririk. Mənə düşən bu imkandan istifadə edərək, Sizin elmi və peşə işlərinizi yüksək dəyərləndirərək, Mən Sizi fəxri doktor adına layiq görürəm, qanunla və ənənələrlə fəxri doktorlara düşən bütün hüquq və imtiyazları Sizin üzərinizə qoyuram. İndi isə mən ictimai elmlər üzrə fəxri doktor diplomunu Sizə verirəm.
Rektor fəxri doktor diplomunu dövlətimizin başçısına təqdim etdi.
NORBERT KİŞ: İndi isə, mən çıxış etmək üçün yenicə fəxri doktor adını almış İlham Əliyevə söz verirəm. Buyurun, cənab Prezident, söz Sizindir.
######