RƏSMİ XRONİKA
AZƏRBAYCAN PREZİDENTİ İLHAM ƏLİYEVİN NİTQİ
Əziz bacılar və qardaşlar!
Mən sizin hamınızı ürəkdən salamlayıram. Bu gün Beyləqan rayonunun həyatında çox gözəl, əlamətdar bir gündür. Uzun fasilədən sonra rayona təbii qazın verilməsi bərpa olunubdur. Bu münasibətlə sizi ürəkdən təbrik edirəm. 20 ilə yaxındır ki, Beyləqana təbii qazın verilməsi dayandırılmışdı. Əlbəttə, hamımız yaxşı bilirik ki, təbii qazın olmaması insanlara əlavə problemlər yaradır. Həm sosial məsələlərin həllinə, həm də iqtisadi inkişafa, sənaye sahəsindəki uğurlara böyük problemlər yaradır.
“Azəriqaz” bu qaz xəttinin çəkilişi üçün çox fəal işlədi və böyük işlər gördü. Son illər ərzində bütövlükdə ölkəmizin hər bir yerinə təbii qazın verilməsi bərpa olunur və hətta tarixdə heç vaxt qazlaşdırılmayan bölgələrə də qaz xətləri çəkilir. Biz bunu ona görə edirik ki, Azərbaycanda bütün bölgələrin inkişafı daha da sürətlə getsin, insanların sosial problemləri həll olunsun, onları narahat edən məsələlər tezliklə öz həllini tapsın. Bu gün Beyləqanda 500 abonentə qazın verilməsi bərpa olunubdur. Bu, sadəcə olaraq, başlanğıcdır, birinci mərhələdir. Ondan sonrakı mərhələlərdə daha 500 abonentə qaz veriləcəkdir. Gələcəkdə, Azərbaycanda qaz hasilatı artdıqca və şəbəkə yarandıqca, əlbəttə, biz çalışacağıq ki, bütün əhalini təbii qazla təmin edək.
Bu gün Azərbaycanda qazlaşdırma bütövlükdə yüksək səviyyədədir. Ölkəmizin 80 faizi qazla təmin olunub. Çalışmalıyıq ki, bu rəqəmi artıraq və bunu etmək üçün imkanlarımız var. Azərbaycan indi böyük həcmdə qaz hasil edən ölkəyə çevrilibdir. Bütün bu uğurların səbəbkarı ulu öndər Heydər Əliyevdir. Məhz onun fəaliyyəti nəticəsində, o cümlədən onun təşəbbüsü ilə icra olunan Azərbaycanın yeni neft strategiyası sayəsində biz bütün bu uğurlara nail ola bilmişik. 1994-cü ildə birinci neft müqaviləsi imzalanmışdır, 1996-cı ildə isə “Şahdəniz” qaz yatağının istismarı üzrə böyük müqavilə bağlanmışdır. Əgər o vaxt bu cəsarətli və müdrik addımlar atılmasaydı, bu gün Azərbaycanın nəinki enerji sahəsində, bütövlükdə, inkişafını təsəvvür etmək çətin olardı.
Siz yaxşı bilirsiniz ki, indi dünyada enerji amili gündəliyin birinci sıralarındadır. Ölkələrin müstəqilliyi, inkişafı və təhlükəsizliyi daha çox enerji daşıyıcılarının olması ilə bağlıdır. Azərbaycan qədim neft ölkəsidir və bizim çox zəngin neft-qaz yataqlarımız vardır. Ancaq onları işə salmaq, investisiyalar gətirmək, neft-qaz kəmərləri çəkmək böyük müdriklik, böyük siyasət tələb edirdi. Ulu öndər Heydər Əliyevin bütün bu sahədəki addımları Azərbaycanın inkişafına, müstəqilliyimizin möhkəmlənməsinə yönəldilmişdi.
Bu gün biz özümüzü enerji resursları ilə təmin edirik. İndi Azərbaycan enerji təhlükəsizliyi baxımından dünya üçün, Avropa üçün əvəzolunmaz ölkəyə çevrilmişdir və bu, təbii ki, bizə əlavə imkanlar yaradır. Biz bu amillərdən çox böyük səriştə ilə istifadə edirik və öz müstəqilliyimizi gücləndiririk. İlk növbədə, ölkəmizin enerjiyə olan tələbatı, demək olar ki, tam şəkildə ödənilir. Əvvəllər elektrik enerjisinin verilməsində olan fasilələr, bu gün demək olar ki, yoxdur. Hətta ən sərt keçən qış mövsümündə də bu baxımdan vəziyyət qənaətbəxş idi. Nəzərə alsaq ki, Azərbaycanda son illər ərzində bir neçə elektrik stansiyası tikilmişdir və növbəti illərdə əlavə stansiyalar tikiləcək, qaz xətləri çəkilir, qazpaylayıcı şəbəkə yaradılır - bu, deməyə əsas verir ki, Azərbaycan həm öz tələbatını maksimum dərəcədə ödəyəcək, həm də qonşu ölkələr, Avropa ölkələri üçün etibarlı tərəfdaşa çevriləcəkdir. Bu, bizə həm iqtisadi dividend gətirir, həm də siyasi çəkimizi artırır.
Azərbaycan artıq dünyada böyük hörmətə malik olan bir ölkədir. Bizim xarici siyasətimiz çox açıqdır, səmimidir və Azərbaycan xalqının milli maraqlarına əsaslanır. Biz iqtisadi inkişafa nail ola bilmişik. Son dörd il ərzində iqtisadi inkişaf baxımından ən sürətlə inkişaf edən ölkəyik. Bunun nəticəsində Azərbaycanda çoxsaylı proqramlar icra olunur və insanları narahat edən məsələlər aradan qaldırılır. Bax, bu gün biz görürük ki, uzun illər, 20 ilə yaxın müddətdə qazsız qalan Beyləqan əhalisi indi təbii qazla təmin olunur.
Biz enerji sektorundakı uğurlarla, əlbəttə ki, fəxr edə bilərik. Amma bizim əsas vəzifəmiz Azərbaycanın hərtərəfli inkişaf etdirilməsidir. Biz indi elə mərhələdəyik ki, ölkəmizdə quruculuq-abadlıq işləri dünya səviyyəsində aparılmalıdır. Yaradılan bütün infrastruktur, yeni müəssisələr, fabriklər dünya səviyyəsində olmalıdır. Bunu etmək üçün bizdə imkanlar var. Büdcəmiz dövlət investisiya xərcləri ildən-ilə artır. Son dörd il ərzində biz dövlət xərclərimizi 10 dəfə artıra bilmişik və bu yaxınlarda yenə də bu məsələyə baxılacaqdır, əlavə xərclər nəzərdə tutulmuşdur.
Bildiyiniz kimi, dörd ildən artıqdır regionların sosial-iqtisadi inkişafı Dövlət proqramı icra olunur. Proqram, demək olar ki, 98 faiz yerinə yetirilib və qalan məsələlər ilin sonuna qədər tam həll ediləcəkdir. Ancaq bu illər ərzində proqrama daxil edilən məsələlər də kifayət qədərdir. Əvvəllər nəzərdə tutulmamış böyük infrastruktur layihələri, elektrik stansiyaları, qaz xətləri, su kəmərləri, yollar, fabriklər, zavodlar - bütün bunlar Azərbaycanı inkişaf etdirən amillərdir.
Bu yaxınlarda Nazirlər Kabinetinin birinci rübün yekunlarına həsr edilmiş iclasında bütün iqtisadi göstəricilər bir daha səsləndi. Xüsusilə sevindirən odur ki, bölgələrdə iş yerləri açılır, infrastruktur layihələri həyata keçirilir və Azərbaycanın bölgələri inkişaf edir. Bizim məqsədimiz ondan ibarətdir ki, hər bir qəsəbə, kənd, hər bir rayon mərkəzi inkişaf etsin, insanlar daha da yaxşı yaşasınlar, məktəblər, xəstəxanalar tikilsin, bütün sosial infrastruktur yeniləşsin, yeni yollar çəkilsin. İnsanların yaxşı yaşaması üçün bütün lazımi tədbirlər görülməlidir. Əlbəttə ki, bunu etmək üçün bizim iqtisadi potensialımız daha da güclənməlidir. Biz qısa müddət ərzində buna nail ola bilmişik. Bir daha demək istəyirəm, heç bir başqa ölkədə bunu görmək mümkün deyil ki, dövlət xərcləri 10 dəfə artsın, 600 mindən çox iş yeri açılsın, yoxsulluğun səviyyəsi bu qədər aşağı düşsün və ölkədə böyük quruculuq işləri aparılsın. Onu da demək istəyirəm ki, bütün bunları biz özümüz etmişik. Azərbaycan xalqı öz iradəsini, öz istedadını nümayiş etdirərək buna nail ola bilmişdir.
Biz müstəqil ölkəyik, müstəqil siyasət aparırıq. Həm xarici siyasətdə, həm daxili siyasətdə, iqtisadi siyasətdə, enerji sahəsindəki siyasətimizdə bizim xəttimiz açıqdır, aydındır və Azərbaycan xalqının maraqlarının tam şəkildə təmin olunmasına yönəldilibdir. Eyni zamanda, bizə dost olan ölkələrlə də səmərəli işləyirik və son illər ərzində daha da çox müttəfiqlər qazanmışıq.
Azərbaycan dünyada böyük hörmətlə qarşılaşır. Beynəlxalq təşkilatlarda bizim imkanlarımız artır, yerləşdiyimiz bölgədə imkanlarımız genişlənir, nüfuzumuz artır və Azərbaycan artıq bölgənin lideri adını qazana bilmişdir. Biz növbəti illərdə bütün bu uğurları daha da möhkəmləndirməliyik. Növbəti illər üçün də açıq-aydın proqramlarımız var. Necə ki, 2004-cü ilin fevral ayında regional inkişaf proqramını qəbul etdik və demək olar ki, onu 5 il keçmədən icra etdik. Eyni qaydada 2009-2013-cü illər üzrə dövlət proqramı hazırlanır. Bu proqram yenə də bütün ölkəni əhatə edəcək, bütün bölgələrdə çatışmayan cəhətlərin aradan qaldırılması üçün praktik tədbirlər nəzərdə tutulacaqdır. Proqramda hər bir rayonun, hər bir qəsəbənin və hər bir kəndin problemləri öz əksini tapacaqdır. Onlar həm proqramda göstəriləcək, həm də icra mexanizmi və maliyyə mənbələri müəyyən ediləcəkdir. Bizim proqramlar konkretdir, onlar təbliğat naminə qəbul olunmur, şüarlardan kənardır. Biz konkret proqramlar icra edirik və bundan sonra da edəcəyik.
Yenə də deyirəm ki, bahalaşma artıq bütün dünya üçün bir problemdir. Amma bu bizi arxayınlaşdırmamalıdır. Yəni biz öz problemlərimizi həll etməliyik. Elə etməliyik ki, insanların həyat səviyyəsi ildən-ilə yaxşılaşsın. Biz maaşları, pensiyaları artırırıq. İlin əvvəlindən minimum əmək haqqını 60 manata qaldırmışıq, bu yaxınlarda, gələcəkdə də artıracağıq. Hər il pensiyalar və əmək haqqı iki dəfə artırılır. Hələ ki, minimum əmək haqqının və pensiyanın səviyyəsi bizi təmin edə bilməz. Ancaq inkişaf da göz qabağındadır, bunlar bir neçə dəfə artmışdır.
Əziz dostlar, bir sözlə, bölgələrin inkişafı, sahibkarlığın, qeyri-neft sektorunun inkişafı, yeni zavodların, fabriklərin tikilməsi - bu, Azərbaycanı inkişaf etdirən əsas amillərdir. Bunu etmək üçün dövlət öz tərəfindən lazımi tədbirləri görür - infrastruktur layihələri, kreditlər və sahibkarlara dəstək. Yerlərdə isə, əlbəttə, qəbul edilmiş bütün qərarlar icra olunmalıdır, təşəbbüskarlıq göstərilməlidir. Mövcud olan problemləri yerlərdə insanlar daha yaxşı bilir, onların həlli yollarını daha yaxşı araşdırırlar və biz də verilən təkliflər əsasında öz siyasətimizi davam etdirəcəyik.
Bu gözəl gündə mən sizin hamınızı bir daha ürəkdən salamlamaq, təbrik etmək istəyirəm. Bu gün yanan bu məşəl inkişafın simvoludur. Gələcəkdə görüləcək işlər və bizim bütün planlarımızın həyata keçməsi nəticəsində güclü Azərbaycan dövləti yaranacaq, insanlar rifah içində yaşayacaqlar, sosial məsələlər öz həllini tapacaq və ölkəmiz güclənəcək, müasir dövlətə çevriləcəkdir. Bu yolda, bu işlərdə sizə uğurlar arzulayıram. Sizə bir daha öz dərin hörmət və məhəbbətimi bildirmək istəyirəm. Sağ olun.
######