RƏSMİ XRONİKA
AZƏRBAYCAN PREZİDENTİ İLHAM ƏLİYEVİN XANLAR RAYONUNA SƏFƏRİ
DÖVLƏTİMİZİN BAŞÇISI RAYONUN YENİ ZOD KƏNDİNİN SAKİNLƏRİ İLƏ GÖRÜŞMÜŞDÜR
Xəbər verdiyimiz kimi, Azərbaycan Prezidenti İlham Əliyev martın 4-də, Xanlar rayonuna səfərinin sonunda Yeni Zod kəndinə gedərək, Ermənistandan didərgin düşmüş qaçqınlarla və Kəlbəcər rayonundan olan məcburi köçkünlərlə görüşmüş, onların yaşayış şəraiti ilə tanış olmuş, qayğı və problemləri ilə maraqlanmışdır.
Kənd sakinləri dövlətimizin başçısı İlham Əliyevi və xanımı Mehriban Əliyevanı böyük hörmət və ehtiramla qarşıladılar.
İkinci qrup Qarabağ müharibəsi əlili, “Azərbaycan Bayrağı” ordenli EMİN ORUCOV Prezidenti salamlayaraq dedi:
- Möhtərəm cənab Prezident, Kəpəzin ətəyində yerləşən Xanlar rayonunun ucqar kəndinin camaatı adından Sizə “Xoş gəlmisiniz!” deyirəm. Siz, doğrudan da, bu gün bir daha sübut etdiniz ki, hər bir azərbaycanlının, hər bir vətəndaşın Prezidentisiniz. Siz bunu bir daha təsdiqlədiniz. Siz bizim Prezidentimizsiniz və ömürlük Prezidentimiz olaraq qalacaqsınız. Ümidvaram ki, qarşıdan gələn seçkilərdə yenə Siz bizim Prezidentimiz olacaqsınız.
Cənab Prezident, mən də Qarabağ müharibəsi əliliyəm, Azərbaycanın ərazi bütövlüyü uğrunda döyüşlərdə iştirak etmiş və sol ayağımı itirmişəm. Sinəmdə gördüyünüz “Azərbaycan Bayrağı” ordeni ilə məhz ümummilli liderimiz Heydər Əliyev tərəfindən təltif edilmişəm və bundan şərəf duyuram. Mənə qismət oldu ki, 1998-ci ildə ümummilli liderimiz Heydər Əliyevlə görüşdüm və bu gün də Sizinlə görüşdüm.
Cənab Prezident, Siz dediyiniz kimi, sabitlik olan yerdə inkişaf güclü olur. Ona görə də ümidvaram ki, Siz öz siyasətinizlə torpaqlarımızı geri qaytaracaq, ərazi bütövlüyümüzü təmin edəcəksiniz. Əgər bu, siyasətlə olmasa, Qarabağ müharibəsi əlilləri, müharibə iştirakçıları adından Sizə söz verirəm ki, bir əmrinizlə mənfur düşmənləri öz ərazilərinə kimi qovacaq, işğal olunmuş torpaqlarımızdan çıxaracağıq.
Xoş gəlmisiniz, Sizə bir daha təşəkkür edirik. Ümidvaram ki, Siz hər gəlişinizlə biz sadə insanları həmişə belə sevindirəcəksiniz.
-Çox sağ olun. Mən bu gün sizinlə görüşməyə gəlmişəm. Mən səhərdən Xanlarda idim, orada bir neçə tədbirlər keçirdik. Yaxşı da tədbirlər oldu. O cümlədən, Qarabağ müharibəsi əlilləri, şəhid ailələri üçün yeni tikilmiş binanın orderlərini təqdim etdim. Başqa tədbirlər də var idi. İstədim ki, gəlim sizinlə də görüşüm.
Siz etnik təmizləmə siyasətinə məruz qalmış insanlarsınız. Erməni təcavüzkarları tərəfindən Azərbaycana, azərbaycanlılara qarşı aparılan siyasət belə vəziyyətə gətirib çıxarıb ki, bizim torpaqlarımız işğal altındadır. Burada - Yeni Zod kəndində həm Ermənistandan olan soydaşlarımız, həm də Kəlbəcərdən olan köçkünlərimiz məskunlaşıblar. Mən istəyirəm ki, sizin həyatınız yaxşı olsun, siz yaxşı yaşayasınız. Azərbaycanın hər bir yerində inkişaf, əmin-amanlıq olsun, sülh və tərəqqi olsun. Bunu etmək üçün biz hamımız çalışmalıyıq və ilk növbədə, dövlət strukturları, dövlət orqanları insanlara diqqət qayğı göstərməli, sizin problemlərinizlə məşğul olmalıdırlar. İndi ölkəmizin hər bir yerində bu inkişaf var. İş yerləri açılır, yeni yollar salınır, yeni müəssisələr işə düşür.
Kənd yerlərindəki insanların yaxşı yaşaması üçün də tədbirlər görülür və görülməlidir. Kreditlər verilir, sahibkarlığın inkişafı üçün vəsait ayrılır, kənd təsərrüfatı texnikası ilə təmin olunurlar, digər tədbirlər görülür. Ona görə mən gəldim sizinlə görüşüm, soruşum ki, sizin üçün nə etməliyik, sizə nə lazımdır? Siz mənə deyəsiniz ki, bu kənddə daha da yaxşı yaşamaq üçün nə işlər görülməlidir və mən də bu problemləri həll edim. Çünki mənim bölgələrə səfərlərimin əsas məqsədi bundan ibarətdir ki, gedim, vəziyyətlə tanış olum, çatışmayan məsələləri həll edək. Elə edək ki, Azərbaycanda bütün insanlar yaxşı yaşasınlar.
Siz ucqar kənddə yaşayırsınız və əlbəttə, ucqar dağ kəndlərinin öz problemləri var. Ona görə gəlmişəm həm sizə öz hörmətimi bildirim, həm də soruşum ki, mən sizin üçün nə etməliyəm. Onu deyin, mən də həll edəcəyəm.
AKİF HÜSEYNOV (kənd icra nümayəndəsinin müavini, ağsaqqal): Hörmətli Prezident, çox sağ olun. Kənd ağsaqqalı kimi mən də Sizə və xanımınıza ictimaiyyət adından “Xoş gəlmisiniz!” deyirəm.
Burada yaşayanların əksəriyyəti, 90 faizi 1988-ci ildə Ermənistandan gələn qaçqınlardır, qalanı isə məcburi köçkünlərdir. Sizin qayğınız sayəsində artıq bütün problemlər getdikcə öz həllini tapır. Əminik ki, bundan sonra daha yaxşı olacaqdır. Söz veririk ki, biz həmişə Sizinlə olacağıq. Qarşıdan prezident seçkiləri gəlir. Sizi yekdilliklə özümüzə yenidən Prezident seçəcəyik və bizim əbədi Prezidentimiz Siz olacaqsınız. Ümidvarıq ki, gələcəkdə bizim bütün problemlərimiz həll olunacaq və Azərbaycanın bu gözəl, dilbər guşəsində Sizin sayənizdə daha yaxşı yaşayacağıq. Sağ olun.
İLHAM ƏLİYEV: Siz Ermənistanın hansı rayonundan gəlmisiniz?
AKİF HÜSEYNOV: Göyçə mahalından, Basarkeçər rayonundan gəlmişik.
İLHAM ƏLİYEV: Neçənci ildə gəlmisiniz?
AKİF HÜSEYNOV: 1988-ci ildə gəlmişik, 1990-cı ildən burada məskunlaşmışıq.
İLHAM ƏLİYEV: 1988-ci ildə, yəni orada, Ermənistanda sizə qarşı təcavüz başlayandan sonra.
AKİF HÜSEYNOV: Bəli.
İLHAM ƏLİYEV: Sizi oradan qovdular. Əslində, ora bizim öz torpaqlarımızdır, Azərbaycan torpaqlarıdır.
AKİF HÜSEYNOV: Bəli, bizim torpaqlarımızdır. Söz veririk ki, gələcəkdə o torpaqlara qayıdacağıq.
İLHAM ƏLİYEV: Siz artıq 20 ildir burada yaşayırsınız.
AKİF HÜSEYNOV: Bəli.
İLHAM ƏLİYEV: Burada yaşayış necədir?
AKİF HÜSEYNOV: Cənab Prezident, yaşayış yaxşıdır. Rayonumuzda, o cümlədən kəndlərimizdə güclü abadlıq-quruculuq işləri gedir. Bu ərazidə yaşayan bütün vətəndaşların hamısı islahatla əlaqədar torpaqla təmin olunubdur. Mal-qara saxlayırıq, heyvandarlıqla məşğul oluruq.
İLHAM ƏLİYEV: Texnika necə, çatır, çatmır? Sizə “Aqrolizinq”dən bir şey verirlər, yoxsa yox? Deyin, bilim.
AKİF HÜSEYNOV: Bəli, texnika çatır, hər şey daha da yaxşı olacaq.
İLHAM ƏLİYEV: Bir neçə il bundan əvvəl mən “Aqrolizinq” şirkəti yaratdım ki, dövlət xaricdən texnika alıb, - indi Azərbaycanın özündə də istehsal etməyə başlayıblar, az icarə haqqı ilə - fermerlərə, kəndlilərə paylasın və onlar bundan istifadə etsinlər. Bilirsiniz, indi regionların sosial-iqtisadi inkişafı Dövlət proqramının birinci mərhələsi başa çatmaq üzrədir. Gələn ilin fevralında 5 il olacaq və bu müddət ərzində, demək olar ki, proqram tamamilə icra ediləcəkdir. Ancaq növbəti illər üçün yeni proqram hazırlanır. Ona görə mən bütün icra orqanlarına göstəriş vermişəm ki, bütün kəndlərin, hər bir kəndin problemi mənə deyilməlidir, göndərilməlidir ki, biz onu proqrama salaq. Ona görə mən bilirəm, siz bəzi problemləri burada deməyə bir az çəkinirsiniz. Ancaq ümid edirəm ki, sizi narahat edən, çatışmayan məsələlər mənə göndəriləcəkdir. Çünki hər bir kəndin problemi həll edildiyi təqdirdə, demək olar ki, ölkənin hər bir problemi həll olunacaqdır. Onsuz da böyük layihələr icra edilir, böyük investisiyalar qoyulur. Elektrik stansiyaları elektrik xətləri tikilir, magistral yollar, qaz xətləri çəkilir.
Yəqin ki, indi burada qaz yoxdur.
AKİF HÜSEYNOV: Vaxtilə çəkilmiş qaz xətləri var. Hacıkəndə kimi qaz gəlir. Artıq layihəyə salınıb, kəndə qaz veriləcəkdir.
ARİF SEYİDOV (Xanlar Rayon İcra Hakimiyyətinin başçısı): Cənab Prezident, qaz xətti Aşıqlı kəndinə kimi gəlir. Hacıkənddən bu tərəfə çəkilməlidir.
İLHAM ƏLİYEV: Bu tərəfə də çəkməliyik.
AKİF HÜSEYNOV: Cənab Prezident, qaz gəlsə, yaxşı olacaq, meşələrimizin qırılmasının qarşısı alınacaqdır.
İLHAM ƏLİYEV: İndi bizim ölkədə əhalinin 80 faizi qazla təmin olunur. Ancaq o da həqiqətdir ki, Bakı şəhəri, Sumqayıt, Gəncə - bunlar tam şəkildə təmin edilir. 80 faiz o demək deyil ki, hər bir kənd təmin olunur. 20 faiz təmin edilmir. Biz bunu etməliyik. Özü də indi qaz var, hasilatı artırırıq. Ona görə ən ucqar kəndlərə də xətlər çəkilməlidir və biz bunu etməliyik. Belə olan halda, ekologiya da qorunacaq, meşələr də qırılmayacaq, insanlar da rahat yaşayacaqlar.
İndi bölgələrdə əsas problemlərdən biri içməli sudur. Bütün rayonlarda bu problem var, mən bilirəm. İndi bunun həlli üçün biz xüsusi proqram hazırlayacağıq.
Ümid edirəm ki, elektrik enerjisi ilə bağlı burada problem olmayacaqdır.
KƏND SAKİNLƏRİ: Problem yoxdur.
İLHAM ƏLİYEV: Əvvəllər fasilələr var idi. İndi ola bilsin ki, gecə vaxtı var. Bəzi hallarda qəzalar olur, hava şəraiti pisləşir. Amma bütövlükdə, biz bu problemi həll etmişik. Qaz probleminin 80 faizini həll etmişik, qalan hissəsini də həll edəcəyik. Amma içməli su problemi çox ciddidir. Ona görə xüsusi proqram hazırlanır və bütün rayonlara içməli su veriləcəkdir. Buna bir neçə il vaxt lazımdır. Mən ümid edirəm, biz iki-üç ilə bunu etməliyik. Qalan işlər də sahibkarlığın inkişafından asılıdır.
Əlbəttə, siz burada kənd təsərrüfatı ilə məşğulsunuz. Kənd təsərrüfatı ilə məşğul olmaq üçün də imkan var. İndi kreditlər verilir, gələcəkdə daha da çox veriləcəkdir. Hər halda, mən istəyirəm Azərbaycanda elə bir yer qalmasın ki, orada ciddi problem olsun. Problem onsuz da hər ölkədə var. Ən inkişaf etmiş ölkəyə də baxanda görürsən ki, orada da yoxsulluq, işsizlik və ədalətsizlik var. Amma biz yoxsulluğu azaldırıq, 16 faizə endirmişik, işsizliyi azaltmışıq. İndi bu ətraf bölgələrdə, yəqin Xanlarda da iş tapmaq o qədər də böyük problem deyil. O qədər tikinti gedir, yeni müəssisələr açılır ki, işləmək istəyən özünə iş tapar.
Əlbəttə ki, infrastruktur layihələri ölkəmizin hərtərəfli inkişafı üçün lazımdır. Kənd yerlərində yaşayanların, əlbəttə ki, öz problemləri var, öz xüsusiyyətləri var. Xüsusilə dağ kəndlərində və biz bunları həll edəcəyik.
Görürəm ki, mənə heç bir problem barədə demək istəmirsiniz. Amma mən yenə də araşdıracağam.
AKİF HÜSEYNOV: Cənab Prezident, ona görə demirik ki, Sizin tərəfinizdən hər şey həll olunacaqdır.
EMİN ORUCOV: Cənab Prezident, icazə verin, burada, Kəpəzin qoynunda Sizinlə xatirə şəkli çəkdirək.
X X X
Azərbaycan Prezidenti İlham Əliyev və xanımı Mehriban Əliyeva kənd sakinləri ilə xatirə şəkli çəkdirdilər.
######