Fevralin 21-də Amerika Birləşmiş Ştatlarının vitse-prezidenti Dik Çeyni Klivlend şəhərinin klinikasında müalicə olunan Azərbaycan Respublikasının Prezidenti Heydər Əliyevə telefon etmişdir. 

Prezident Heydər Əliyevi səmimiyyətlə salamlayan vitse-prezident Çeyni onun səhhəti və Klivlend klinikasında müalicəsinin gedişi ilə maraqlanmışdır. O, Azərbaycan Prezidenti ilə söhbət etməkdən məmnunluq duyduğunu söyləyərək bildirmişdir ki, ABŞ administrasiyası və şəxsən Prezident Corc Buş Prezident Heydər Əliyevin müalicəsi üçün yaradılmış şəraitlə daim maraqlanır.

Prezident Heydər Əliyev göstərilən diqqət və qayğıya görə vitse-prezident Çeyniyə öz minnətdarlığını bildirmiş və Klivlend klinikasında aldığı müalicənin nəticələrindən tam razı qaldığını söyləmişdir.

Prezident Heydər Əliyev və vitse-prezident Dik Çeyni Azərbaycan-Amerika münasibətlərinin vəziyyəti və perspektivləri haqqında fikir mübadiləsi etmişlər.

ABŞ-ın vitse-prezidenti beynəlxalq terrorizmlə mübarizədə Azərbaycan Respublikasının və şəxsən Prezident Heydər Əliyevin rolunu xüsusi vurğulayaraq demişdir ki, bu sahədə Azərbaycanın göstərdiyi səylər Prezident Buş tərəfindən yüksək qiymətləndirilir.

Prezident Heydər Əliyev beynəlxalq koalisiya tərkibində Azərbaycan Respublikasının rolunu müsbət qiymətləndirdiyinə görə Prezident Buşa təşəkkürünü və səmimi salamlarını çatdırmağı xahiş etmişdir.

Vitse-prezident Çeyni əmin etmişdir ki, Prezident Buş Çin Xalq Respublikasına səfərindən qayıdan kimi Azərbaycan Prezidentinin salamı ona çatdırılacaqdır.

ABŞ-Azərbaycan münasibətləri ətrafında söhbəti davam etdirən vitse-prezident Çeyni Azərbaycanın regiondakı strateji əhəmiyyətini vurğulayaraq demişdir ki, məhz bu səbəbdən ölkələrimiz arasında əməkdaşlıq bütün dünya xalqları üçün çox vacibdir.

Prezident Heydər Əliyev vitse-prezident Dik Çeyninin sözlərini təsdiqləmiş və qeyd etmişdir ki, Azərbaycan özünün strateji mövqeyindən çıxış edərək, beynəlxalq problemlərin həllində, xüsusən terrorizmlə mübarizədə Amerika ilə əməkdaşlığı genişləndirməyə hazırdır.

Prezident Heydər Əliyev və vitse-prezident Dik Çeyni Ermənistan-Azərbaycan, Dağlıq Qarabağ münaqişəsinin həlli məsələsi ətrafında fikir mübadiləsi aparmışlar. Prezident Heydər Əliyev bu münaqişənin həllində Amerikanın rolunu müsbət qiymətləndirərək vurğulamışdır ki, münaqişəyə tezliklə son qoyulması ölkələrimiz arasında strateji əməkdaşlığın imkanlarını xeyli genişləndirərdi.

Azərbaycan Prezidentinin fikri ilə razı olduğunu bildirən vitse-prezident demişdir ki, bu münaqişənin həlli istiqamətində Amerika öz yardımını daim göstərəcəkdir.

Söhbətin sonunda vitse-prezident Dik Çeyni Prezident Heydər Əliyevə bir daha ən xoş arzularını bildirmişdir.