MƏDƏNİYYƏT
Bolqarıstanın “Fokus” radiosunun dinləyicilərinə Azərbaycan incəsənəti barədə geniş məlumat verilib
Sofiya, 7 aprel, AZƏRTAC
Mədəniyyət və Turizm Nazirliyinin sektor müdiri, Azərbaycan Dövlət Rəsm Qalereyasının direktoru Qalib Qasımov Bolqarıstanın “Fokus” radiosunun dinləyicilərinə Azərbaycan incəsənəti barədə geniş məlumat verib.
Müsahibədə Q.Qasımov Azərbaycan və Bolqarıstan arasında mədəniyyət və turizm sahəsində geniş imkanların olduğunu, ötən dövr ərzində hər iki ölkənin mədəniyyət nazirlərinin istər beynəlxalq müstəvidə, istərsə də ikitərəfli formatda görüşlər keçirdiklərini ifadə edib.
Nazirliyinin sektor müdiri Sofiya şəhərindəki Milli İncəsənət Qalereyasında açılmış “Azərbaycan sirli rənglər kainatı” adlı sərginin mədəniyyət sahəsində əməkdaşlığımızın inkişafı yolunda növbəti bir addım olacağına inamını ifadə edib.
Azərbaycan Dövlət Rəsm Qalereyasının tarixi barədə məlumat verən direktor qalereyanın əsasən muzey tipli müəssisə kimi fəaliyyət göstərdiyini, fondunda 12 minədək əsərin toplandığı, lakin muzeydən fərqli olaraq ekspozisiyalarını çevik şəkildə yenilədiyini bildirib.
Azərbaycanın zəngin və qədim mədəni irsi ilə bağlı suala cavab olaraq Qalib Qasımov Qərb ilə Şərqin kəsişməsində, Böyük İpək Yolunun üzərində yerləşən ölkəmizin əlverişli təbiəti, qədim tarixi, rəngarəng mədəniyyəti və zəngin iqtisadi resursları barədə məlumat verib. O, Füzuli rayonu ərazisində yerləşən Azıx mağarasının qədimliyindən danışıb və Azərbaycan mədəniyyətinin bir sıra incilərinin UNESCO-nun Qeyri-maddi mədəni irs üzrə Reprezentativ siyahısına daxil edildiyini vurğulayıb.
Ölkəmizdəki multikulturalizm ənənələri barədə danışan mədəniyyət xadimi dinindən və etnik mənsubiyyətindən asılı olmayaraq, Azərbaycanda insanların hüquq və qanun qarşısında bərabər olduqlarını, ölkədə müsəlman məscidləri ilə yanaşı, rus-pravoslav, eləcə də yəhudi dini məbədlərinin sərbəst şəkildə fəaliyyət göstərdiyini qeyd edib.
Daha sonra Ermənistanın Azərbaycana qarşı silahlı təcavüzünün nəticələrinə toxunan Q.Qasımov Bakıda erməni kilsəsinin Azərbaycan dövlətinin dəstəyi ilə təmir olunmasına baxmayaraq, işğal olunmuş ərazilərdə bütün mədəniyyət abidələrinin, muzeylərin və rəsm qalereyalarının dağıdıldığını təəssüf hissi ilə bolqar ictimaiyyətinə çatdırıb.
Azərbaycanın Prezidenti tərəfindən 2016-cı ilin ölkəmizdə multikulturalizm və 2017-ci ilin isə “İslam Həmrəyliyi İli” elan olunduğunu vurğulayan Q.Qasımov ölkəmizin mədəniyyətlərarası dialoq forumlarına, beynəlxalq humanitar forumlara ev sahibliyi etdiyini, Bakıda 2012-ci ildə Euroviziya mahnı müsabiqəsinin, 2015-ci ildə isə dünyada ilk dəfə olaraq Avropa Oyunlarının keçirildiyini vurğulayıb. Natiq, eyni zamanda, cari ilin mayın 12-dən 22-dək Azərbaycanın IV İslam Həmrəyliyi Oyunlarına ev sahibliyi edəcəyini diqqətə çatdırıb.
Hazırda 2000-ə yaxın üzvün təmsil olunduğu Azərbaycan Rəssamlar İttifaqı barədə məlumat verən Q.Qasımov quruma peşəkar rəngkar, heykəltəraş, tətbiqi sənət ustaları və sənətşünasların daxil olduqlarını bildirib. Rəssamlar İttifaqının Gəncə, Naxçıvan və Şəki şəhərlərində bölmələrinin fəaliyyət göstərdiyini qeyd edən sektor müdiri ölkəmizin 34 şəhərində dövlət rəsm qalereyalarının fəaliyyət göstərdiyini, bütün şəhər və rayonlarda musiqi və rəssamlıq məktəblərinin mövcud oluduğunu, hətta orta ümumtəhsil məktəblərində təsviri sənət dərslərinin 1-ci sinifdən etibarən tədris edildiyini vurğulayıb.
Azərbaycan rəssamlarının əsərlərinin nümayiş olunduğu ölkələrin coğrafiyası barədə məlumat verən Q.Qasımov Braziliya, ABŞ, Çin, Koreya Respublikası, Hindistan, Orta Asiya ölkələri, Rusiya, Gürcüstan, Türkiyə, Almaniyada, Fransa, Polşa, Səudiyyə Ərəbistanı, Küveyt, Qətər, İspaniya, Macarıstan, Moldova kimi ölkələrdə təqdimatların keçirildiyini xatırlayıb. Sotbiz, Kristi kimi məşhur auksionlarda Azərbaycan rəssamları Tahir Salahov, Toğrul Nərimanbəyov, Cavad Mircavadov, Mirnadir Zeynalov, Fərhad Xəlilov kimi incəsənət nümayəndələrinin əsərlərinə böyük marağın olduğunu vurğulayan Q.Qasımov böyük rəssamlarımızdan Səttar Bəhlulzadənin 100 illik yubileyinin 2009-cu ildə UNESCO səviyyəsində keçirildiyni qeyd edib.
Azərbaycan dövlətinin rəssamların sərgilərinin keçirilməsi üçün öz dəstəyini əsirgəmədiyini, bir sıra rəssamların dövlət başçısı tərəfindən mükafatlandırıldığını qeyd edən Q.Qasımov onların orden və medallarla təltif olunduqlarını və hər il 50 nəfər orta və yaşlı nəslin nümayəndəsinə, 20 nəfər isə gənc rəssama təqaüdlərin verildiyini vurğulayıb. Daha sonra ötən 10 il ərzində Mədəniyyət və Turizm Nazirliyi tərəfindən müəlliflərə yüksək qonorarlar ödənilməklə 1200-dən çox əsərin alınaraq Azərbaycan Dövlət Rəsm Qalereyasının Fonduna daxil edildiyini bildirən sektor müdiri Heydər Əliyev Fondu tərəfindən olduqca böyük və maraqlı layihələrin də dəstəkləndiyini və həyata keçirildiyini vurğulayıb.
İqbal Hacıyev
AZƏRTAC-ın xüsusi müxbiri
Sofiya