ELM VƏ TƏHSİL
“Dilimizə sevgi ilə yola çıxdıq” adlı beynəlxalq tədbir keçirilib
Bakı, 27 dekabr, AZƏRTAC
Azərbaycan Respublikasının Dövlət Dil Komissiyası yanında Monitorinq Mərkəzinin təşkilatçılığı ilə Dünya Azərbaycanlılarının Həmrəyliyi Gününə həsr olunmuş “Dilimizə sevgi ilə yola çıxdıq” adlı beynəlxalq tədbir keçirilib.
Bu barədə AZƏRTAC-a Monitorinq Mərkəzindən məlumat verilib. Bildirilib ki, Azərbaycan dilinin qorunması, onun beynəlxalq aləmdə rolu və nüfuzunun yüksəldilməsi, dünya miqyasında tanıdılması ilə bağlı təşkil olunan tədbirdə dünyanın 30-a yaxın ölkəsində yaşayan və müxtəlif qurumlarda çalışan 40-dan çox azərbaycanlı iştirak edib.
Tədbiri Monitorinq Mərkəzinin direktoru professor Sevinc Əliyeva açaraq Dünya Azərbaycanlılarının Həmrəyliyi Günü münasibətilə xaricdə yaşayan soydaşlarımızı ürəkdən təbrik edərək bu əlamətdar günün tarixindən söz açıb. O, milli birlik, Azərbaycana məhəbbət, milli-mənəvi dəyərlərimizə hörmət, Vətənə bağlılıq hisslərini özündə təcəssüm etdirən bu günün qeyd olunmasının ulu öndər Heydər Əliyevin adı ilə bağlı olduğunu vurğulayıb.
Sevinc Əliyeva Monitorinq Mərkəzinin fəaliyyəti və ölkə rəhbərinin dövlət dilinə olan qayğısından bəhs edib. O bildirib ki, dil siyasətinin formalaşdırılmasında, ana dilinin dövlət dili statusunun yüksək səviyyədə təmin edilməsində Azərbaycan xalqının ümummilli lideri Heydər Əliyevin böyük xidmətləri olub. Ulu Öndərin dil siyasəti bu gün də Prezident İlham Əliyev tərəfindən uğurla davam etdirilir.
Tədbirdə Ulu Öndərin vaxtilə dünya azərbaycanlılarına etdiyi müraciət səsləndirilib.
Misirdə Azərbaycan Diaspor Təşkilatları Birliyinin və Misir–Azərbaycan Dostluq Cəmiyyətinin sədri və həmtəsisçisi Seymur Nəsirov çıxış edərək yaşadığı ölkədə Azərbaycan dilinə böyük marağın olduğunu bildirib və mindən çox əcnəbi tələbənin bu dili öyrənməsindən bəhs edib. O, tədris prosesini daha da təkmilləşdirmək üçün müxtəlif təkliflər səsləndirib, “Əcnəbilər üçün Azərbaycan dili” proqramlarının hazırlanmasının zəruriliyini, danışıq mühitinin yaradılmasının, eləcə də səviyyələr üzrə xüsusi dərsliklərin nəşr olunmasının vacibliyini qeyd edib.
Tədbirə Çindən qoşulan Pekin Xarici Dillər Universitetinin Asiya–Afrika fakültəsinin Azərbaycan dili kafedrasının yaradıcısı Aqşin Əliyev bildirib ki, hazırda çalışdığı fakültədə 30-a yaxın fənn tədris olunur. Bu, əcnəbilər üçün nəzərdə tutulmuş Azərbaycan dili üzrə ilk ixtisaslaşmış fakültədir. O, məhz əcnəbi tələbələr üçün təhsil mərhələlərinə uyğun olaraq proqram və dərsliklər hazırlanmasının vacibliyini vurğulayıb.
Amerika Azərbaycanlılarının Koordinasiya Şurasının İdarə Heyətinin üzvü, Amerika-Azərbaycan İnteqrasiya Mərkəzinin rəhbəri Samir Novruzov Amerika məktəblərində Azərbaycan dilinin tədris olunması üçün layihə təklif edildiyini və bu mövzu ilə bağlı ingilislərə məxsus metodologiyanın işlənib hazırlandığını diqqətə çatdırıb.
Digər çıxışlarda Azərbaycan dilinin beynəlxalq aləmdə nüfuzunu artırmaq, təbliği və tədrisini təmin etmək məqsədilə bəzi ölkələrdə həftəsonu məktəblərinin olması, Niderlandda “Milli dərs” layihəsinin həyata keçirilməsi, eləcə də Bolqarıstanda Azərbaycan ədəbiyyatı nümunələrinin bolqar dilinə tərcümə edilməsi və Avropada Şuşa haqqında kitabın işıq üzü görməsi haqda məlumat verilib.
Tədbir ölkə xaricində Azərbaycan dilinin təbliği, tədrisi, eləcə də Azərbaycan dilini öyrənmək istəyən əcnəbi tələbələrin ehtiyacları ilə bağlı problemlərin müzakirəsi ilə davam edib. Çıxışlarda Azərbaycan dilinin ölkə xaricində və əcnəbi tələbələrə tədrisində yaranan çətinliklər, resurs və dərsliklərin bəzən qənaətbəxş olmaması, lazımi ədəbiyyatın çatışmazlığı fikirləri səsləndirilib, hüquqi sənədlərdə tərcümə probleminin mövcudluğu xüsusi vurğulanıb.
Aparılan müzakirələrin yekunu olaraq xaricdəki mərkəzlərin, cəmiyyətlərin fəaliyyətləri yaxından öyrənilib, ana dilinin beynəlxalq aləmdə tətbiqi ilə bağlı mövcud problemlər, eləcə də Azərbaycan dilinin dünya miqyasında nüfuzunun yüksəldilməsi və tətbiqi istiqamətində görüləcək konkret tədbirlər müəyyənləşdirilib.