SİYASƏT
Ərzaq təhlükəsizliyi Azərbaycanda sosial siyasətin prioritet sahələrindən biridir
Bakı, 11 aprel (AZƏRTAC). Ərzaq təhlükəsizliyi Azərbaycanda sosial siyasətin prioritet sahələrindən biridir.
Bu fikir aprelin 11-də Yeni Azərbaycan Partiyasının (YAP) İqtisadi məsələlər komissiyasının Atatürk Mərkəzində “Ərzaq təhlükəsizliyi: reallıqlar və perspektivlər” mövzusunda keçirilən iclasında səsləndirilmişdir.
AZƏRTAC xəbər verir ki, iclasda YAP-ın iqtisadi məsələlər komissiyasının sədri, partiyanın İdarə Heyətinin üzvü, Milli Məclisin aqrar siyasət komitəsinin sədri Eldar İbrahimov komissiyanın məqsədləri barədə ətraflı məlumat verdikdən sonra demişdir ki, aqrar sahənin inkişaf strategiyası hər bir ölkə üçün iqtisadi təhlükəsizlik və onun əsas istiqamətlərindən olan ərzaq təhlükəsizliyinin təminatı baxımından əhəmiyyətlidir. Ərzaq təhlükəsizliyinin təmin edilməsi isə respublika rəhbərliyinin daim diqqət mərkəzində saxladığı mühüm məsələlərdən biridir.
Ölkəmizdə həyata keçirilən aqrar islahatlardan söhbət açan komissiya sədri bildirmişdir ki, ümummilli lider Heydər Əliyevin təşəbbüsü ilə ötən əsrin 90-cı illərində MDB məkanında ilk olaraq Naxçıvan Muxtar Respublikasında, daha sonra isə Azərbaycanın bütün bölgələrində torpaq islahatları aparılmışdır. 1996-cı ildə qəbul edilən “Torpaq islahatları haqqında” Qanunun əhəmiyyətindən danışan E.İbrahimov həmin dövrdə həyata keçirilən islahatların bugünkü nəticələrini yüksək qiymətləndirərək demişdir: “Bu qanun çox uğurla həyata keçirildi və Azərbaycanın bütün regionlarında torpaqlar xüsusi mülkiyyətə verildi. Məhz bunun nəticəsidir ki, bu gün kənd təsərrüfatı məsullarının istehsalının 97-98 faizi məhz xüsusi mülkiyyət hesabına ödənilir. Bu da ərzaq təhlükəsizliyinin təmin olunması baxımından mühüm əhəmiyyət kəsb edir”.
Komissiya sədri qeyd etmişdir ki, ölkəmizdə müxtəlif sahələrin inkişafı üçün elmi əsaslara söykənən Dövlət proqramları həyata keçirilir. Kənd təsərrüfatı istehsalçılarına yardım mexanizmlərinin formalaşdırılması, beynəlxalq təşkilatlarla bu sahədə əhəmiyyətli layihələrin həyata keçirilməsi, həmçinin 2001-ci ildə təsdiqlənmiş “Azərbaycan Respublikasının ərzaq təhlükəsizliyi Proqramı” çərçivəsində görülmüş işlər nəticəsində respublikamızda kənd təsərrüfatının inkişafına və ərzaq məhsulları istehsalının artımına nail olunmuşdur. 2008-ci ildə Prezident İlham Əliyevin Sərəncamına əsasən ərzaq təhlükəsizliyi ilə əlaqədar ikinci Dövlət Proqramının qəbul olunması isə daha böyük uğurlar əldə etməyimizə şərait yaratmışdır. O demişdir: “2008-2015-ci illəri əhatə edən həmin Dövlət Proqramında ərzaq təhlükəsizliyi ilə bağlı mühüm məsələlər öz əksini tapmışdır. Bu gün qarşıya qoyulan vəzifələr uğurla icra edilməkdədir. Statistik rəqəmlərin müqayisəsinə əsaslanaraq deyə bilərik ki, kənd təsərrüfatı məhsullarının istehsalı proqramda nəzərdə tutulan rəqəmlərdən də artıq yerinə yetiriləcəkdir”.
Dövlət Torpaq və Xəritəçəkmə Komitəsinin sədri, akademik Qərib Məmmədov müstəqillik illərində Azərbaycanda həyata keçirilən aqrar və torpaq islahatları, bu sahədə tətbiq edilən yeni texnologiyalar barədə məlumat verərək demişdir ki, aqrar sahənin inkişafı iqtisadiyyatın şaxələndirilməsi strategiyasının əsas istiqamətlərindən biri kimi bu gün də gündəmdədir. Azərbaycanda 11 iqlim qurşağından 9-nun mövcud olması kənd təsərrüfatının inkişafına geniş imkanlar açır. Qərib Məmmədov bildirmişdir ki, Azərbaycanın regionları üzrə ənənəvi kənd təsərrüfatı məhsullarının mövcud vəziyyəti öyrənilərək müvafiq təklif və tövsiyələr verilmiş, həmçinin müasir texnologiyalardan istifadə edilməklə ölkə ərazisinin ümumi coğrafi xüsusiyyətləri tam şəkildə araşdırılmışdır. Bununla bərabər, torpaqların məhsuldarlıq keyfiyyətləri öyrənilmiş və münbit torpaqların xəritəsi tərtib olunmuşdur.
Ötən illər ərzində kənd təsərrüfatı sahəsində əldə olunan uğurlar barədə danışan kənd təsərrüfatı nazirinin müavini İlham Quliyev bildirmişdir ki, həyata keçirilən islahatlar nəticəsində artıq Azərbaycan strateji ərzaq məhsulları ilə özünü təmin edəcək səviyyəyə çatmışdır. O demişdir ki, Azərbaycanda aqrar siyasətin düzgün müəyyənləşdirilməsi, seçilmiş strategiyanın reallaşdırılması metodlarının işləkliyi, bununla əlaqədar mühüm tədbirlərin ardıcıl həyata keçirilməsinə olan ciddi qayğı və nəzarət ərzaq təhlükəsizliyinin təmin edilməsinə imkan verir.
Digər çıxış edənlər də kənd təsərrüfatı sahəsində görülən işlərdən və inkişaf perspektivlərindən ətraflı söhbət açmışlar.