Bakı, 29 aprel, AZƏRTAC 

Aprelin 27-dən başlayaraq Gənclər və İdman Nazirliyi yeni layihəyə start verib.

Nazirliyin mətbuat xidmətindən AZƏRTAC-a bildiriblər ki, layihə gənclərin diqqət və marağını dünya incəsənəti sahəsinə yönəltməklə yanaşı, eyni zamanda, onların özlərinin yaradıcılıq potensialını inkişaf etdirmələri üçün də gözəl imkan olacaq.

Onlayn keçiriləcək layihənin digər bir üstünlüyü ondadır ki, indiki karantin dövründə gənclər digər ailə üzvlərini də bu fəaliyyətə cəlb edə və ya onların dəstəyindən istifadə edə bilərlər. Onlayn müsabiqə gənclər arasında son zamanlar dəbdə olan kospley yaradıcılığına əsaslanır. Amma bu layihə daha böyük yaradıcılıq və ixtiraçılıq tələb edir. Məhz buna görə məşhur rəsmləri canlandıracaq “Bənzət, baxım!” layihəsinin şüarı “Yarat, öyrən, qazan!”dır.

Müsabiqə bu il mayın 12-dək davam edəcək. Bu müddətdə artcis.az saytında təşkilatçılar tərəfindən seçilmiş 10 rəsm əsərindən istənilən birini seçərək bənzəri yaradılmalı, bunun fotoşəkli çəkilməlidir. Bu fotoşəkil anket forması ilə birgə bu il mayın 12-dək [email protected] ünvanına göndərməlidir. Bütün şəkillər saytda və eyniadlı “Facebook” və “Instagram” səhifələrində yerləşdiriləcək. Qaliblər mayın 15-də elan ediləcək və onlar mükafatlandırılacaqlar.

Gənclərə kömək məqsədilə artcis.az saytında indiyədək “canlandırılmış rəsm əsərləri”nin uğurlu nümunələri yerləşdirilib.

Qeyd edək ki, müsabiqə iştirakçısı öz sənədini karantin rejiminə riayət etməklə ev şəraitində yaratmalıdır, öz istəyinə görə təşkilatçıların təklif etdiyi rəsmdən başqa bir rəsmi canlandıra bilər. Bu halda əsərin və onun müəllifinin tam və düzgün adı göstərilməlidir.

Layihə barədə ətraflı məlumat artcis.az saytında yerləşdirilib.