Bakı, 7 iyun, AZƏRTAC

Formula 1 çempionatının “Haas” komandasının rəhbəri ümidvardır ki, onun komandası yaxşı nəticə uğrunda mübarizə apara, bununla da Barselona və Monako mərhələlərindəki uğursuzluqlarının əvəzini çıxa bilər.

AZƏRTAC xəbər verir ki, Günter Ştayner qarşıdakı Qran-Pri barədə fikirlərini bölüşüb.

-İyun ayında keçirilən Azərbaycan və Kanada mərhələləri ard-arda keçirilir. Bu, mövsümün təqviminin Formula 1 tərəfindən 2023-cü ildən başlayaraq riayət olunması təklif edilən regional prinsip üzrə tərtib olunmasının zəruriliyini vurğulayır. Yürüşlər arasında interval vur-tut bir həftə olduğu halda hansı əsas çətinlikləri adlamaq lazım gəlir? Siz gələn mövsümün planları barədə nə düşünürsünüz?

-Çətinlik ondadır ki, təyyarə ilə bir qitədən digərinə uçmaq lazımdır, bu, uzun səyahətdir və komanda onu həyata keçirmək üçün böyük səylər sərf etməlidir.

Bundan ötrü kollektiv müntəzəm və effektli işləməlidir. Lakin cəmi bir neçə gün ərzində bütün avadanlığı bir trasa aparmaq və onu hazırlamaq, daha sonra söküb növbəti yürüşə yollanmaq lazımdır. Bu, asan deyil, əgər hansısa bolid zədə alıbsa, o halda vəziyyət daha da mürəkkəbləşir, ümid edirik ki, Bakıda biz belə bir vəziyyətlə qarşılaşmayacağıq.

Növbəti mövsüm üçün planlarımıza gəlincə, yürüşlərin regional prinsip üzrə birləşdirilməsinə nail ola bilsək əla olardı. Bilirəm ki, Stefano Domenikali bundan ötrü çox çalışır və 2023-cü ildə təqvim düzgün tərtib ediləcək.

-Azərbaycan Qran-Prisi Formula 1-in təqvimində xüsusi yer tutub. Çempionatın bu mərhələsi barədə fikirləriniz?

-Bakı haqqında ilk təəssüratım yadımdadır. Şəhərin gözəlliyi və orada əla trasın olması məni valeh etmişdi. Əvvəllər Bakı haqqında məlumatım yox idi, çünki oraya getməyi planlaşdırmamışdım. Lakin indi fikirləşirəm ki, bu tras Formula 1 təqvimində uzun müddət qalacaq.

-“Baku City Circuit” trası onunla tanınıb ki, orada İçərişəhərdən keçən dar dolanbac seksiyalar uzun sürətli düz start-finiş xətti ilə uyğunlaşır. Bu trasda müxtəlif illərdə müxtəlif cür həyəcanlı hadisələr baş verib. Belə tras üçün bolidi necə sazlamaq lazımdır və bu, VF-22 üçün hansı dərəcədə uyğun gəlir?

-Həqiqətən tras iki hissəyə bölünür: çox sürətli və olduqca dolanbac. Fikrimcə, İspaniyada avtomobillərin sazlanmasına optimal yanaşma tapmaqla, biz əhəmiyyətli irəliləyişə nail ola bildik və indi bu sazlama müxtəlif növ trasların öhdəsindən heç də pis gəlmir.

Bakıda bunu düzgün həyata keçirmək lazımdır. Fikrimcə, biz İspaniyada, Monte-Karloda nəzərdə tutduğumuz yaxşı nəticələr uğrunda mübarizə apara biləcəyik. Mən yenidən trasdakı işə qayıtmaq üçün qarşıdakı həftəsonlarını səbirsizliklə gözləyirəm.