Vilnüs, 27 may (AZƏRTAC). Azərbaycanın Litvadakı səfiri Həsən Məmmədzadənin ölkənin yüksək tirajlı “Lieutos zinios” qəzetində 28 May - Respublika Günü ilə əlaqədar müsahibəsi dərc olunmuşdur.

Səfir müsahibəsində Azərbaycanda da Litvadakı kimi bu il ilk respublikanın yaranmasının 96 illiyinin qeyd edildiyini bildirmiş, hər iki ölkənin XX əsrin əvvəllərində və sonunda eyni tarixi taleləri yaşadığını vurğulamışdır. O, 1918-ci ildə Şərqdə ilk dəfə Azərbaycanda yaranmış demokratik respublikanın 23 ay yaşamasına baxmayaraq, bir çox uğurlara nail olduğunu, həmin dövrdə də Azərbaycanın milli və dini azlıqlara münasibətdə öz tolerantlığı ilə seçildiyini qeyd etmişdir.

H.Məmmədzadə 70 ildən sonra Azərbaycanın öz müstəqilliyini bərpa etdiyi zaman separatizmlə qarşılaşdığını bildirərək Ermənistan-Azərbaycan, Dağlıq Qarabağ münaqişəsi haqqında məlumat vermiş, 1978-ci ildə ermənilərin Dağlıq Qarabağa köçmələrinin 150 illik yubileyini qeyd etdiklərini və bu münasibətlə abidə də qoyduqlarını vurğulamışdır.

Səfir müstəqilliyin ilk illərinin ağır olduğunu, erməni işğalının davam etdiyi bir dövrdə Azərbaycanda vətəndaş qarşıdurmasının baş verdiyini, yalnız 1993-cü ildə ümummilli lider Heydər Əliyevin hakimiyyətə qayıdışı ilə vətəndaş müharibəsinin qarşısının alındığını və təməli Heydər Əliyev tərəfindən qoyulmuş müasir Azərbaycan dövlətinin hazırda regionun qabaqcıl ölkəsinə çevrildiyini qeyd etmiş, son illərdə Azərbaycanda iqtisadi, mədəni və sosial sahələrdə əldə olunmuş nailiyyətlərə barədə məlumat vermişdir.

Nigar Cəfərli

AZƏRTAC-ın xüsusi müxbiri

Vilnüs