CƏMİYYƏT
Milli Məclisin Əmək və sosial siyasət komitəsinin növbəti iclası keçirilib
Bakı, 2 may, AZƏRTAC
Mayın 2-də Milli Məclisin Əmək və sosial siyasət komitəsinin növbəti iclası keçirilib.
AZƏRTAC xəbər verir ki, komitənin sədri Musa Quliyev gündəlikdə “Sosial sığorta haqqında” Qanunda dəyişiklik edilməsi barədə (ikinci oxunuş) və “Turizm haqqında” Qanunda dəyişiklik edilməsi barədə (ikinci oxunuş) məsələlərin olduğunu bildirdi.
Komitə sədri məlumat verdi ki, Azərbaycan Prezidentinin cari il martın 19-da imzaladığı “Koronavirus (COVID-19) pandemiyasının və bundan irəli gələrək dünya enerji və səhm bazarlarında baş verən kəskin dalğalanmaların Azərbaycan Respublikasının iqtisadiyyatına, makroiqtisadi sabitliyə, ölkədə məşğulluq məsələlərinə və sahibkarlıq subyektlərinə mənfi təsirinin azaldılması ilə bağlı bir sıra tədbirlər haqqında” Sərəncamın 10.2-ci bəndinin icrası ilə əlaqədar Nazirlər Kabineti aprelin 4-də Tədbirlər Planını təsdiqləyib. “Sosial sığorta haqqında” Qanuna təklif olunan dəyişikliklər bu məsələlərlə əlaqədardır. Belə ki, müzakirəyə təqdim olunan qanun layihəsi bir sıra sahibkarlıq subyektlərinin sosial sığorta yükünün azaldılması ilə bağlı güzəştləri əhatə edir.
İclasda çıxış edən Əmək və Əhalinin Sosial Müdafiəsi nazirinin müavini Anar Kərimov, Vergilər Nazirliyinin İqtisadi təhlil və uçota nəzarət Baş İdarəsinin rəisi Natiq Şirinov qanun layihəsi barədə ətraflı məlumat verdilər, koronavirus pandemiyası ilə bağlı ölkəmizdə həyata keçirilən sosial tədbirlərdən danışdılar. Bildirildi ki, ümumilikdə 4,8 milyon vətəndaş sosial dəstək tədbirlərindən faydalanacaq.
İclasda çıxış edən komitə üzvləri Ziyad Səmədzadə, Jalə Əliyeva, Vüqar Bayramov, İlham Məmmədov, Sevinc Hüseynova, Arzu Nağıyev, Sultan Məmmədov, Məlahət İbrahimqızı bu dəyişiklikdən sonra məcburi dövlət sosial sığorta haqlarının ödənilməsində tətbiq ediləcək güzəştləri yüksək qiymətləndirdilər, layihə barədə qeyd və təkliflərini verdilər.
Sonra Əmək və Əhalinin Sosial Müdafiəsi nazirinin müavini Anar Kərimov, Vergilər Nazirliyinin İqtisadi təhlil və uçota nəzarət Baş İdarəsinin rəisi Natiq Şirinov, Dövlət Sosial Sığorta Fondunun direktoru Himalay Məmişov deputatların qaldırdıqları məsələlərə aydınlıq gətirdilər.
Müzakirələrin sonunda “Sosial sığorta haqqında” Qanunda dəyişiklik edilməsi barədə qanun layihəsi ikinci oxunuşda Milli Məclisin plenar iclasında müzakirəyə tövsiyə edildi.
İclasda “Turizm haqqında” Qanunda dəyişiklik edilməsi barədə qanun layihəsi də ikinci oxunuşda müzakirə olundu.
Məlumat verildi ki, qanunun 7-ci maddəsinə təklif olunan dəyişiklik ölkəmizdə ASAN vizanın tətbiqi ilə əlaqədardır və birdəfəlik və ya çoxdəfəlik elektron vizanın verilməsini özündə ehtiva edir.
İclasın sonunda bu qanun layihəsi də ikinci oxunuşda Milli Məclisin plenar iclasında müzakirəyə tövsiyə edildi.
Bununla da Əmək və sosial siyasət komitəsinin iclası başa çatdı.