Bakı, 4 iyul, AZƏRTAC

Neft-qaz sənayesi iqlim dəyişikliyi ilə bağlı problemlərin həllində aparıcı rol oynayır. Bu baxımdan qlobal enerji səhnəsində həm inkişaf etmiş, həm də inkişaf etməkdə olan dövlətlərin, eləcə də bütün maraqlı tərəflərin iştirakı ilə dialoqun təşviq edilməsi çox vacibdir.

AZƏRTAC xəbər verir ki, bu fikirləri Vyanada keçiriləcək OPEC-in 8-ci Beynəlxalq seminarından əvvəl BƏƏ-nin rəsmi WAM informasiya agentliyinə müsahibəsində təşkilatın baş katibi Haysam Əl-Qays söyləyib. Onun sözlərinə görə, hazırda əsas məqsəd bütün enerji mənbələri və texnologiyalarını nəzərə alaraq, bütün millətlərin maraqlarına hörmət edərək, bütün fikirləri dinləyərək və qlobal karbon emissiyalarını azaltmaq üçün bir çox vasitələrdən istifadə edərək enerji davamlılığına nail olmaqdır. Baş katib əlavə edib: “Enerji davamlılığı ilə bağlı çağırışlar arasında enerji təhlükəsizliyi, xərclərin münasibliyi və emissiyaların azaldılması imperativi ilə bağlı məqsədlər əsas yer tutur. OPEC sərmayələri karbon tutma, utilizasiya və saxlama, dairəvi karbon iqtisadiyyatı, metan emissiyalarının azaldılması və məşəldə yandırılması, hidrogen istehsalı və bərpa olunan enerji mənbələrinin neft və qaz əməliyyatlarına inteqrasiyası kimi emissiyaların azaldılması texnologiyalarına yönəldilməsinin zəruriliyinə inanır. Hazırda enerji səmərəliliyini artırmaq üçün ağıllı texnologiyalardan istifadə edilir”.

Əl-Qays qeyd edib ki, 2022-ci ildə orta qlobal neft hasilatı gündəlik 100 milyon barelə, təbii qaz istehsalı isə 4000 milyard kubmetrə çatıb. OPEC-in proqnozları 2045-ci ilə qədər qlobal iqtisadiyyatın iki dəfə artacağını göstərir. Dünya əhalisinin sayı çoxalacaq və beləliklə, bütün enerji mənbələrinə, o cümlədən neft və təbii qaza tələbat da təxminən 23 faiz artacaq.

Seminarın gündəliyinə toxunan baş katib bildirib ki, bu tədbirdə enerji istehsalçısı və istehlakçısı ölkələrdən 50-yə yaxın yüksək səviyyəli məruzəçi, o cümlədən həm dövlət, həm də özəl sektordan olan beynəlxalq təşkilatların və şirkətlərin rəhbərləri və icraçı direktorları iştirak edəcəklər. Onlar enerji təhlükəsizliyi, enerji keçidi və investisiyaların cəlb edilməsi kimi digər mühüm məsələlərlə yanaşı, enerji sektoru və onun inkişafı ilə bağlı konstruktiv təkliflər ətrafında müzakirələr aparacaqlar.

2023-cü ilin sonunda BƏƏ-nin ev sahibliyi edəcəyi COP28 iqlim sammitindən bəhs edən OPEC-in rəhbəri qeyd edib ki, milli şərait və prioritetləri nəzərə alaraq, inkişaf etməkdə olan ölkələri ədalətli şəkildə dəstəkləməklə enerji keçidini təmin edən iqlim fəaliyyəti ilə iddialı, ədalətli və balanslaşdırılmış nəticələr əldə etmək potensialı var. O, həmçinin innovasiyaları təşviq etmək, kollektiv iqlim fəaliyyətinə maneələri aradan qaldıran texnoloji həlləri inkişaf etdirmək üçün iqlimin maliyyələşdirilməsinə, informasiya mübadiləsinə və texnologiya transferinə xüsusi diqqət yetirilməsinin zəruriliyini qeyd edib.

Əl-Qays OPEC-ə üzv ölkələrin seminarın məqsəd və prinsiplərinə sadiq olduqlarını və neft-qaz sənayesinin iqlim probleminin həlli istiqamətində mühüm rol oynaya biləcəyini vurğulayıb. “Bir çox neft hasil edən ölkələr bərpa olunan və ekoloji cəhətdən təmiz enerji mənbələrini qəbul edir və karbon emissiyalarını azaldır. Daha dayanıqlı enerji sistemlərinə qlobal keçidi inkişaf etdirməyə kömək edəcək UNFCCC çərçivəsində inkişaf etməkdə olan ölkələrin iqlim fəaliyyətinə kömək etmək üçün hər il qabaqcıl dövlətlərin 100 milyard ABŞ dolları ayırması kimi əlaqəli qlobal maliyyə öhdəliklərinin yerinə yetirilməsi də mühüm amildir”, – deyə təşkilatın rəhbəri qeyd edib.