Bakı, 11 oktyabr, Elvin Camalov, AZƏRTAC

İllərdir düyünlənən Qarabağ probleminin həlli üçün işıq ucu axtarırdıq. İllərdir beynimizdə dolaşan kaş kilər, 2020-ci il sentyabrın 27-də nəhayətlə əvəzləndi. Qarabağın işıqlı günlərini həmin tarixdən yalnız 44 gün ayırırdı...

Torpaqlarımızın işğaldan azad olunması uğrunda başlanan “Dəmir yumruq” əməliyyatında Azərbaycan Ordusunun sıralarında düşmənə qan udduran, bayrağımızı azad olunan torpaqlara sancan qəhrəmanlarımız arasında “Azərişıq” ASC-nin əməkdaşları da vardı. Onlardan 5-i şəhidlik zirvəsinə yüksəlib.

30 il həsrətində qaldığımız yurd yerlərimizin azadlığı kimi bərpası, yenidən qurulması da sürətlə aparılır. Müharibənin ilk günündən xüsusi qərargah yaradan “Azərişıq” ASC-nin əməkdaşları təmas xəttində canları bahasına 24 saat - fasiləsiz xidmət göstərirdilər. İndi “Azərişıq”ın əməkdaşları Qarabağı, Şərqi Zəngəzurun qaranlıq günlərini aydınlatmaqla bütün şəhidlərimizin, o cümlədən şəhadətə yüksələn öz əməkdaşlarının da ruhunu şad edir.

Azad olunan torpaqların işıqlı günlərinə qovuşması yolunda çəkilən zəhmət qısa zamanda bəhrəsini verdi. Hələ müharibənin ən ağır vaxtlarında artıq Cəbrayıl şəhərində və Hadrut qəsəbəsində Azərbaycan işığı yanırdı. Qələbə ilə başa çatan müharibədən sonra da yeni işıqlı həyatın bərpası üçün təxirəsalınmaz tədbirlər davam edir. Axı, düşmən illərdir burada yüz minlərlə evin işığını söndürmüşdü...

Oktyabrın 8-də, səhər saatlarında Bakıdan Qarabağa doğru yol aldıq. Yol xəritəmiz Füzuli, Hadrut və Şuşa istiqamətində idi. Mənzil başına çatmamış öyrəndik ki, Füzulidə və Hadrutda tikilməkdə olan, Şuşada isə artıq istifadəyə verilən yeni yarımstansiyalarla tanış olacağıq. Bu yerlərə çatdıqda aparılan işlərin miqyası qarşısında heyrətə gəlməmək mümkün deyildi. Prezident İlham Əliyevin tapşırığı ilə “Azərişıq” işğaldan azad olunmuş ərazilərdə buraya köç edəcək dünyagörüşlü, yenilikçi, işıqlı xəyalları olan nəsil üçün ən qabaqcıl, müasir dövrün tələblərinə cavab verən, yeni nəsil sistemlər qurur. Şanlı ordumuzun Şuşa uğurundakı Zəfər yürüşü Hadrutdan başladı. Azərbaycan işığının yandığı Hadrutda tikilən müasir tipli yeni yarımstansiya Xocavənd rayonunun bir hissəsinin, Şuşa və ətraf ərazilərin işığını daimi edəcək.

Şuşaya səfər də yaddaqalan oldu. Mədəniyyət paytaxtımızda istifadəyə verilən Rəqəmsal İdarəetmə Mərkəzi yeni dairəvi elektrik təchizat sxemi ilə əvəzlənib. İlk dəfə Şuşada tətbiq edilən bu sistem nəticəsində şəhər dayanıqlı və fasiləsiz elektrik enerjisi ilə təmin olunub. Yeni şəbəkənin istifadəyə verilməsi bir çox xərcləri aradan qaldırıb, itkiləri azaldıb, xidmət keyfiyyətini yaxşılaşdırıb. Şuşadakı Mərkəzin ilklərindən biri də yarımstansiyanın qəza hallarında enerji təchizatının təmin edilməsi üçün alternativ və bərpaolunan enerji mənbəyindən - günəş panellərindən istifadədir.

Artıq gec idi. Şuşada axşam düşmüşdü. Buna baxmayaraq, küçələrdə yanan işıqlar şəhərin qaranlığını aydınladırdı. Bir vaxtlar zülmətə dönən bu qədim yurdumuzun gecələri də indi bir başqa olur...

Bu gün Qarabağ, Şərqi Zəngəzur aydınlığa bürünür. “Azərişıq”ın hər bir əməkdaşı azad olunan torpaqlarımızda qarşıya çıxan çətinliklərə, o cümlədən mina təhlükəsinə baxmayaraq, canla-başla çalışır. Onların arasında hətta elələri var ki, 30 ildən sonra öz doğma kəndinin, el-obasının işıqlandırılmasında iştirak edir. Belə işıqlandırılan yurd yerlərimizdən biri də Zəngilanın Ağalı kəndidir. Qarabağa Böyük Qayıdışın sevincini yaşayan Ağalı sakinləri artıq 3 aydır bu işığa toplaşırlar. Bu sevincin ən qısa zamanda Füzulidə, Hadrutda, Şuşada - azad olunmuş bütün ərazilərimizdə yaşanacağına əminik.