Bakı, 9 dekabr, AZƏRTAC

Kişi basketbolçulardan ibarət milli komandanın və “Xəzri” klubunun kapitanı Amil Həmzəyev AZƏRTAC-ın suallarını cavablandırıb. Həmin müsahibəni təqdim edirik:

-Azərbaycan Basketbol Liqasının 7-ci turunda “Sumqayıt”a qalib gəldiniz. Oyun barədə təəssüratlarınızı almaq istərdik.

-“Sumqayıt”ın bizə qarşı bu cür yaxşı müqavimət göstərəcəyini gözləmirdik. Nəzər Quliyev meydandan kənarlaşdırılsa da, ruhdan düşmədilər və oynamağa davam etdilər. Amma çox maraqlı görüş keçdi. Rəqibin heyətində yerlilərdən İsmayıl Əliyev və Murad Orucəliyev özünü yaxşı tərəfdən göstərməyi bacardı.

-İlk dövrədə geri düşsəniz də, oyunu çevirməyi bacardınız. Oyuna belə başlamağınız nə ilə bağlı idi?

-Kağız üzərində favorit olan komandalar hər zaman oyunlara rahat çıxırlar. Avrokuboklarda mütəmadi oynayan klublar da belə situasiyalar yaşayır. Amma biz ikinci dövrənin sonlarında oyunu öz xeyrimizə dəyişməyi bacardıq və qalib gəldik.

- Azərbaycan Basketbol Liqasında “Xəzri”nin hədəfləri nədir?

- Bu mövsüm məqsədimiz ölkə çempionu olmaq və kuboku qazanmaqdır. Komanda olaraq çəkdiyimiz əziyyətin bəhrəsini görmək istəyirik. İnanıram ki, hər şey yaxşı olacaq.

- Kişi basketbolçulardan ibarət yığmanın yeni baş məşqçisi Tahir Baxşıyev oldu. Millinin kapitanı olaraq, bu təyinatla bağlı fikirləriniz maraqlıdır...

- Həm Tahir Baxşıyev, həm də Anar Sarıyev gənc mütəxəssislərdir. Onlar paralel olaraq özlərini və milli komandanı inkişaf etdirmək üçün çalışacaqlar. Bəzi insanlar məşqçini iki oyun qalib gəldi deyə uğurlu, uduzanda isə uğursuz adlandırırlar. Mən bu fikirlə heç vaxt razı olmamışam. Çünki bir neçə oyunla baş məşqçini qiymətləndirmək düzgün çıxmaz. İnanıram ki, hər iki çalışdırıcı yığmaya düşərli olacaq. Alberto Blanko haqda az da olsa, məlumat toplamışam. Bəzi klublarda idman direktoru, statistik işləyib. Bildiyimə görə də Avropa basketbolunu çox yaxşı tanıyır. Düşünürəm ki, uzunmüddətli planın bəhrəsini gözləmək lazımdır.

-Tahir Baxşıyev və Anar Sarıyevin iki yerdə işləmələri onlar üçün çətinlik yarada bilər?

- Bilirsiniz, necədir? Ötən il Aleksandr Trifunoviç yığmaya gətirilmişdi. Çox yaxşı karyerası olan məşqçi idi. Ancaq millidəki oyunçuları tanımırdı. Tahir Baxşıyev isə uşaqların xarakterini və hansı oyunçuların meydanda bir-birini yaxşı anlayacağını, aralarındakı münasibətləri bilir. Obradoviçi də gətirsəydik, gəlib məni, Endəri tanımağı vaxt alacaqdı. Buna görə də liqanı və basketbolçuları tanıyan birinin bu vəzifəyə keçməsi əla seçimdir.

-Yığma 2027-ci ildə Qətərdə keçiriləcək dünya çempionatının ilkin təsnifat mərhələsində İsveçrə, İrlandiya və Kosovo ilə eyni qrupda mübarizə aparacaq. Millinin şanslarını necə qiymətləndirirsiniz?

- İsveçrə və İrlandiyanın keçən il oynadıqları oyunlarına baxmışam. Məncə, bizə uyğun rəqiblərdir. Səhv etmirəmsə, MBA-da çıxış edən oyunçulardan birinin İsveçrə vətəndaşlığı var. Onun bizə qarşı matçlarda oynayıb-oynamayacağını bilmirəm. Düşünürəm ki, başabaş mübarizə aparıb qrupdan çıxa bilərik. Oyunlar ilyarım ərzində keçiriləcəyi üçün həm bizdə, həm də rəqib cəbhədə oyunçuların zədə almaq qorxusu var. Çünki birinci oyunda yığmaya qoşulan oyunçu növbəti görüşə çıxmaya bilər. Bu amillər işimizi çətinləşdirə bilər. Ancaq inanıram ki, hər şey yaxşı olacaq. Güclü əcnəbi oyunçular milliləşdirilib. Yerli oyunçularımızın da beynəlxalq arenadakı təcrübəsi artıb. Hər şeyin yaxşı olacağına inanıram.