CƏMİYYƏT
Ədliyyə naziri vətəndaşların videoqəbulunu keçirib
Bakı, 1 oktyabr, AZƏRTAC
Azərbaycan Prezidenti İlham Əliyevin tapşırıqlarına uyğun olaraq Ədliyyə Nazirliyi tərəfindən vətəndaşların müraciətlərinə hər zaman qayğı ilə yanaşılır, karantin şəraitində videoformatda qəbul davam etdirilir.
Ədliyyə Nazirliyinin mətbuat xidmətindən AZƏRTAC-a bildiriblər ki, nazir Fikrət Məmmədov Şəmkir və Lənkəran regional ədliyyə idarələri vasitəsilə müraciət etmiş vətəndaşların videokonfrans formatında qəbulunu keçirib. Qəbulda Şəmkir, Lənkəran və ətraf rayonlarda yaşayan vətəndaşların, ədliyyə fəaliyyəti ilə bağlı müraciətləri dinlənilib, qaldırılan məsələlərin həlli üzrə təxirəsalınmadan zəruri tədbirlərin görülməsi üçün aidiyyəti məsul işçilərə müvafiq tapşırıqlar verilib.
Qəbul zamanı nazir cəbhə xəttində yerləşən rayonların sakinlərinin qayğıları ilə maraqlanıb. Vətəndaşlar işğalçı Ermənistanın növbəti hərbi təxribatlarına cavab olaraq Ali Baş Komandanının rəhbərliyi ilə Qələbəyə doğru inamla irəliləyən Ordumuza tam güvəndiklərini, böyük ruh yüksəkliyi ilə dövlətimizin başçısının ətrafında sıx birləşdiklərini vurğulayıblar.